1 Naboti, mwenikaya gwa Yezeeli, kaweriti na lirambu lya mizyabibu aku Yezireeli, pakwegera na liboma lya Ahabu mfalumi gwa Samaliya. 2 Lishaka limu Ahabu kamgambiriti Naboti, "Gumpanani lirambu lyaku lya mizyabibu nilitendi lirambu lya likolu, toziya lyapakwegera na numba yaneni. Hanikupanani lirambu limonga liherepa nentu, ama pagufira hanikulipi mpiya kulinganira na ulunda wakuyi." 3 Kumbiti, Naboti kamwakula, "Mlandu gwa kukupanana gwenga uhala yaniwupatiti kwa wazewi waneni, Mlungu kaliwusiliri patali." 4 Panu, Ahabu kagenda zakuyi ukaya kana nkalaliru na maholu gavuwa, toziya Naboti mwenikaya gwa Yezireeli, kamgambiriti handa hapeni kampanani shirii shakahaliti kulawa kwa wazewi wakuyi. Su, kaligonjeka mshitanda shakuyi, kashififa sheni shakuyi na kulema kuliya. 5 Yezebeli mdala gwakuyi kamgendera na kumkosiya, "Mbona gwana hinginika mmoyu ata guliya ndiri?"

6 Yomberi kamwankula, "Toziya nyoweriti na Naboti mwenikaya gwa Yezireeli, kambuziri lirambu lyakuyi lya mizyabibu, ama pakafira numpanani lirambu limonga handa ali. Kumbiti yomberi kang'ambira, nikupanani ndiri lirambu lyangu lya mizyabibu."

7 Panu, Yezebeli, mdala gwakuyi, kamgambira, "Yakakolamlima gwa Israeli ndo gaa? Gwenga ndiri? Gwimuki, gulii na gukalamuki, neni hanikupanani lirambu lya mizyabibu lya Naboti kulawa Yezireeli."

8 Shakapanu, Yezebeli kalembiti hamba zyamu kwa litawu lya Ahabu na kukomelera shimaniziyu sha mfalumi. Shakapanu kajega luhamba alu kwa wazewi na wantu wamanika, yawalikaliti na Naboti aku kumjini. 9 Hamba zyeni zilembwa hangu, "Mbweri shaka cha kwoya kuliya, mliwoni na kumpanana Naboti pahali pa ligoya pakati pa wantu. 10 Shakapanu, muwawasakuli wantu yawatenda madoda wawili wamgenderi na kumsitaki pawalonga, gwenga gumpangira Mlungu na mfalumi. Shakapanu mmulaviyi kunja, mmulagi kwa kumgumanga mabuwi."

11 Su, wenikaya wayaguyi Naboti, wazewi na wantu wamanika wa mji Yezireeli, watenda handa Yezebeli ntambu yakawalagaliriti. Kulawirana na luhamba lwakawajegeriti. 12 Wabwera shaka sha kwoya kuliya, waliwona na kumtula Naboti pahala pa ligoya pakati pa wantu. 13 Watenda madoda wawili walii walivaga kumlola Naboti, shakapanu wamsitaki paweru pawalonga, "Naboti kampangira Mlungu na mfalumi." Naboti wamlaviyiti kunja kumji, kalaguwa kwa kugumangwa mabuwi. 14 Shakapanu, Yezebeli kajegelwa shisoweru handa "Naboti kalaguwa kala kwa kugumangwa mabuwi."

15 Katepu hera Yezebeli pakapatiti shisoweru handa Naboti kalaguwa kala kwa kugumangwa mabuwi, kamgambira Ahabu, "Gugoloki! Gugendi gwakalitoli lirambu lilii lya mizyabibu lya Naboti kulawa Yezereeli, lyeni kalemiti kukuwuzira. Naboti kankali mkomu kayi ndiri, kahowa kala." 16 Katepu Ahabu pakapikaniriti Naboti kahowa kala, kagoloka kagenda kutola lirambu lya mizyabibu lya Naboti.

17 Su, shisoweru sha Mlungu shimwizira mbuyi gwa Mlungu Eliya kulawa Tishibe, 18 "Gugoloki gugendi kuliwona na Ahabu mfalumi gwa Israeli, mweni ka Samaliya. Hagumwoni mulilambu lya mizyabibu lya Naboti, kalitola. 19 Gumgambiri, Mtuwa Mlungu kalonga hangu, gumlaga su gutola lilambu lyakuyi? Gumgambiri Mtuwa Mlungu kalonga hangu, pahala palii ng'ang'a pakalambititi mwazi gwa Naboti, ndo hawagulambiti mwazi gwaku."

20 Su, Ahabu pakamwoniti Eliya, kalonga, "Gwenga mnkondu gwangu, gumbata?" Eliya kamwankula, "Yina! Nukupata, Toziya gwenga gupanga nakamu kutenda madoda palongolu pa Mtuwa Mlungu. 21 Mtuwa Mlungu kalonga hangu, nakaka, hanikujegeri maagamiziya. Hanikulagi gwenga na kuwalaga kila mpalu gwa lukolu lwaku Muisraeli, kaweri mmanda ama mlekeru. 22 Kaya yaku haniyitendi handa kaya ya Yerobowamu, mwana gwa Nebati na handa kaya ya Baasha mwana gwa Ahiya, toziya gwimiziya maya gangu na kuwatenda wantu wa Israeli watendi vidoda. 23 Kayi, Mtuwa Mlungu kalonga hanga kwa Yezebeli, wang'ang'a hawayiliyi nshimba ya Yezebeli mshibambaza sha numba ya shifalumi ya liboma lya Yezireli. 24 Yina, yoseri gwa kaya yakuyi yakahowera kumjini, wang'ang'a hawamliyi, na yoseri yakahowera kulilambu, kapungu wa kulyera hawamliyi."

25 Kwahera muntu yakafira kutenda madoda palongolu pa Mtuwa Mlungu handa Ahabu, mweni kapayiritwi na Yezebeli mdala gwakuyi. 26 Katenditi nkalaliru kwa kuguwira shinyagu sha wamlungu ntambu yawatenditi Waamori weni mashaka gapititi Mtuwa Mlungu kawawingiti palongolu pa wantu wa Israeli. 27 Kumbiti, Ahabu pakapikaniriti visoweru avi, kazipapula nguwu zakuyi kavala mafafa gweka yakuyi kwoya kuliya na kugonja pampindi pa mafafa katyanga agawu na agawu kwa hinginika.

28 Su, ulagilagi awu wa Mtuwa Mlungu umwizira mbuyi Eliya kulawa Tishibe, 29 "Gumwona Ahabu ntambu yakalinanagaziya palongolu paneni? Toziya gulinanagaziya, njegi ndiri maagamiziya pakawera mkomu, kumbiti shaka sha ukolamlima wa mwana gwakuyi haniagamiziyi kaya yakuyi Ahabu."