1 Yoabu kagambiritwi handa mfalumi Dawudi kaweriti kankulira na kudaya kwa kuhowa kwa Abisalomu. 2 Hangu, ukanka wa lishaka ali ugalambulitwi kuwera kudaya kwa wantu woseri, pawapikiniriti kuwera mfalumi kankumdayilira Abisalomu. 3 Hangu, lishaka ali, wantu wingiriti kumji jiijii handa wantu yawawuya kumji pawawona soni kwa kutira nkondu. 4 Mfalumi kaligibikiriti sheni shakuyi na kulila kwa kuguta pakalonga, "Nyeno mwana gwangu Abisalomu! Nyeno Abisalomu, mwana gwangu! Mwana gwangu!"

5 Yoabu kingiliti ukaya kwa mfalumi, kamgambira, "Leru gutusoniziya twenga wantumintumi waku woseri weni leru tuwulopuziya ukomu waku, ukomu wa wana waku wapalu, ukomu wa wadala waku na ukomu wa wadala waku wa kunja. 6 Gwenga guwafira walii yawakukalalira na guwakalalira walii yawakufira. Gutulanguziya pota kufifa leru handa wakulu wa lishonta na wamashonta wawu shintu ndiri kwagwenga. Mona kuwera leru, handa Abisalomu mekaweri mkomu na twawoseri metuhowi na gwenga megunemeleri. 7 Vinu, gugoloki gwakayoweri na wamashonta waku kwa kunanagala toziya nililapa kwa Mlungu, handa gugenda ndiri kuyowera na womberi, kwahera ata yumu yakasigala pamuhera na gwenga leru pamihi. Ashi hashiweri shitwatira shidoda nentu kwa gwenga kuliku makontola goseri yagakupatiti kwanjira untemba waku mpaka leru." 8 Shakapanu, Mfalumi kalawa kagenda kalivaga pahala pakuyi pakwegera na ligomi likulu. Wantu woseri pawagambiritwi handa mfalumi kakuligomi. Woseri wamgenderiti.

Shaka ashi wantu woseri wa Israeli watuga na kugenda ukaya kwakuyi. 9 Wantu woseri waweriti wangusingana mumakabila goseri ga Israeli, pawalonga, "Mfalumi Dawudi katulopoliti muwankondu mwetu Wafilisti. Kumbiti vinu kayituga isi toziya ya Abisalomu. 10 Kayi Abisalomu tumswagiti lipaki kaweri mfalumi gwetu, vinu kalaguwa kunkondu. Ntambu gaa vinu tuyowelera ndiri kumuwuziya mfalumi Dawudi?"

11 Mfalumi Dawudi kalagalira ulagilagi kwa watambika Sadoki na Abiatali, Muwagambiri wazewi wa Yuda, "Ntambu gaa womberi wawera wa upeleru kumwuziya mfalumi ukaya kwakuyi? Ulagilagi wa Israeli yoseri unsokera neni mfalumi. 12 Mwenga ndo walongu wangu na mwazi gwangu, ntambu gaa muweri wa upeleru kumbuziya neni mfalumi ukaya?" 13 Mmukosiyi viraa Amasa, "Yomberi ndo mlongu gwangu. Kayi Mlungu kandagi payiwera nimtenda ndiri yomberi kaweri mkulu gwa lishonta lyangu kwanjira leru pa Yakobu!" 14 Visoweru avi vya Dawudi viwatenditi wantu woseri wa Yuda wamjimili na waweriti handa muntu yumu. Hangu, wamjegera ulagilagi kulonga "Guwuyi ukaya, gwenga na wantumintumi waku woseri."

15 Su, mfalumi kiza lushemba Yoridana na wantu woseri wa Yuda wiza mpaka Giligali kumwanka mfalumi na kumlosiya lushemba Yoridani. 16 Shimeyi mwana gwa Gera gwa likabila lya Benjamini, kulawa Bahurimu, katenditi kalongola kugenda pamuhera na wantu wamonga su kumwanka mfalumi Dawudi. 17 Shimeyi kagenditi pamuhera na Wabenjamini elufu yimu. Siba ntumintumi gwa walongu wa Sauli, kiziti pamuhera na wana wakuyi lilongu na mhanu na wantumintumi malongu mawili, wagenditi kalongola kulushemba lwa Yoridani kumlongolera Dawudi. 18 Su, waloka lushemba pamuhera na walongu wa mfalumi na kumtendera mfalumi goseri gakakafiriti. Shimeyi mwana gwa Gera kiza, kaliyasa kulongolu kwa mfalumi, kasuntamala, shaka mfalumi pakaweriti pakwegera kuloka lushemba Yoridani.

Mfalumi kaweriti kala kuloka lushemba lwa Yolidani, Shimeyi kamsundamalira kulongolu kwakuyi 19 Shimeyi kamgambira mfalumi, "Nikuluwa, mtuwa gwangu mfalumi, naguhola kuwera nanashidoda pota kulihola lidoda lyanilitenditi lishaka lilii paguweriti gwakuwuka Yerusalemu. Nikuluwa nagugaholera. 20 Toziya, neni ntumintumi gwaku nivimana handa ntenditi vidoda. Niza leru, pawera gwa kwanja mulikabila lya Yosefu, kwiza kukwanka gwenga mtuwa gwangu, mfalumi."

21 Abishai mwana gwa Seruya kalonga, "Hashi, mpaka ndiri Shimeyi kalaguwi? Toziya kapangiluwi muntu mweni Mlungu kamsyagula kwa kuswaga lipaki."

22 Kumbiti Dawudi kalonga, "Wana wa Seruya, nahera shoseri na mwenga. Ntambu gaa mlitenda handa wankondu waneni leru? Hashi, kalaguwi muntu yoseri Muisraeli lishaka lya leru? Hashi, muvimana ndiri handa neni na mfalumi gwa Israeli lishaka lya leru?" 23 Shakapanu mfalumi kamlapira Shimeyi pakalonga, "Hapagulaguwi."

24 Mefibosheti mzukulu gwa Sauli, kagenditi viraa kumwanka mfalumi Dawudi. Kwanjira lishaka lilii mfalumi pakawukiti Yerusalemu mpaka pakawuyiti mukomu, Mefibosheti kaweriti kagulula ndiri na kukuwa magulu gakuyi, kumoga ndevu zakuyi na kalishera ndiri kuputa nguwu zakuyi. 25 Su, pakasokiti Yerusalemu kumwanka mfalumi, Dawudi kamkosiyiti, "Hashi, Mefibosheti, ntambu gaa gugenda ndiri na neni?"

26 Mefibosheti kalonga, "Gwee mtuwa gwangu mfalumi, guvimana handa neni nashikwawakwawa, nimgambiriti ntumintumi gwaku Ziba kantandiri punda su nimkweni ng'endi na gwenga mfalumi kumbiti kampayira. 27 Vinu, kampayikira kwa gwenga, gwee mtuwa gwangu mfalumi. Kumbiti gwenga, mtuwa gwangu mfalumi, guwera handa lihoka lya Mlungu. Gutendi lyoseri lyaguliwona ndo liheri kwa gwenga. 28 Toziya, walongu woseri wa wambuyi wa neni wafiruwitwi kulaguwa kulongolu kwaku, mtuwa gwangu mfalumi. Kumbiti guntuliti neni ntumintumi gwaku muwamu mwa walii yawaliya pameza paku. Hashi, nikuluwi shintu shimonga kwa gwenga?"

29 Mfalumi kamgambira, "Ntambu gaa gongera kuyowera vitwatira vyaku gamweni. Neni ntakula kala gwenga pamuhera na Siba hambagulani isi ya Sauli."

30 Kumbiti Mefibosheti kamgambira mfalumi, "Gumjimili Siba kagatoli malambu goseri gweka yakuyi. Neni ntosiya handa gwenga mtuwa gwangu mfalumi guwuya ukaya mkomu."

31 Barizilayi, kulawa Gileadi kaweriti kasoka kulawa Rogelimu. Kaweriti kagenditi pamuhera na mfalumi kulushemba Yoridani su kamlosiya mpaka kumwambu kulushemba. 32 Barizilayi kaweriti mzewi nentu, yakana mivinja semanini. Yomberi kaweriti kamjegera shiboga mfalumi pakalikaliti aku Mahanaimu, toziya kaweriti mlunda nentu. 33 Su, mfalumi Dawudi kamgambira Barizilayi, "Tugendi woseri aku Yerusalemu Na neni hanikupanani vintu vyoseri vyagufira."

34 Kumbiti Barizilayi kamgambira mfalumi, "Hashi, nana vinja vivuwa ndiri vya kulikala, ntambu gaa ng'endi na gwenga mfalumi mpaka Yerusalemu? 35 Neni leru nana mivinja semanini. Hashi, neni ntumintumi gwaku, mbeza kuvimana yagawera gaherepa na gadoda? Hashi, neni ntumintumi gwaku mbeza kuvimana kunoga kwa shilii shandiya ama kulanda? Hashi, mbeza kuvimana maziwu ga uherepa gawimba wapalu ama wadala? Ntambu gaa neni ntumintumi gwaku weri shisanka kwa mtuwa gwangu mfalumi? 36 Neni ntumintumi gwaku hang'endi na gwenga mwanja mfupi kumwambu Kuyoridani. Ntambu gaa, mfalumi gundipi lifupu likulu hangu? 37 Nikuluwa, gunjimiri neni ntumintumi gwaku, nfuwiri kumji gwangu, pakwegera na lisembi lya tati gwangu na mawu gwangu. Kumbiti ayu ntumintumi gwaku Kimhamu, gunjimiri ng'endi pamuhera na gwenga mtuwa gwangu mfalumi na gumtenderi shoseri shagushiwona shiherepa."

38 Mfalumi kamgambira Barizilayi, "Kimhamu hakagendi na neni na hanimtenderi shoseri shashiwera shiheri kwa gwenga. Shoseri shagushifira, hanikutenderi." 39 Wantu woseri ndo waloka lushemba lwa Yoridani na mfalumi na yomberi kaloka. Mfalumi kamnonera na kumtekelera Barizilayi na Barizilayi kawuya ukaya kwakuyi.

40 Mfalumi kendereya mpaka Gileadi, Kimhamu kawera kankulifata na yomberi. Wantu woseri wa Yuda na nusu ya wantu wa Israeli waweriti wankugenda nayu pamuhera. 41 Shakapanu, wantu woseri wa Israeli wiza kwa mfalumi na kumgambira, "Ntambu gaa walongu wetu wantu wa Yuda waweriti wakutola gwenga na wakulosiya lushemba lwa Yoridani, gwenga na walongu waku, pamuhera na wantu waku?"

42 Wantu wa Yuda wawagambira wantu wa Israeli, "Tutenda hangu toziya mfalumi Dawudi mlongu gwetu. Ntambu gaa mkalala kwa shitwatira ashi? Hashi, tuliya shoseri shilawiti kwa mfalumi? Yomberi katupanana lifupu lyoseri?"

43 Wantu wa Israeli wawankula wantu wa Yuda, "Twana vintu vya kulidumbila mala lilongu kwa mfalumi, kuliku vyamwera navi mwenga na Dawudi mweni. Ntambu gaa, mtubeziyiti? Tuwera ndiri wakwanja kulonga mfalumi gwetu kawuziwi!"

Visoweru vya wantu wa Yuda viweriti vikalipa kuliku visoweru vya wantu wa Israeli.