1 Dawudi kamwimbiriti Mtuwa Mlungu visoweru vya lwimbu alu lishaka lilii Mtuwa Mlungu pakamlopoliti mumawoku mwa wankondu wakuyi na mumawoku mwa Sauli.

2 "Kalongiti, Mtuwa Mlungu ndo mlolera gwangu,

liboma lya neni na mkombola gwangu.

3 Mlungu gwangu, mlolera gwangu,

kwakuyi mponeka,

kandolelera handa ngawu,

kandolera na kunopola kulawa kwa wantu njimbituwa.

4 Nimshema Mtuwa Mlungu,

Mlungu yakana zyumwa

yomberi kanopola kulawa kwa wankondu wangu.

5 Makupala ga kuhowa gazyengetiti,

lirawa lya maagamiziya gankankaliti,

6 Ngoyi za isi ya wantu wahowa zizyengeta,

migomiziwu ya kuhowa iweriti kwangu.

7 Mukutabika kwa neni, nimshemiti Mtuwa Mlungu,

Nimlilila Mlungu gwangu kantangi.

Yomberi kapikaniliti liziwu lyangu kulawa kunumba nkulu yakuyi,

gumpikaniliti kulira kwangu panikuluwiti utanga.

8 Pasipanu hapalendemeri na kubegeziwa,

miyanjiru ya kumpindi itikanyika,

toziya Mlungu kaweriti kakalala!

9 Lyosi litumiti kulawa mumpula mwakuyi,

motu gwagulunguziya gulawa mmulomu mwakuyi,

makala ga motu yagakiti galawa amu.

10 Kalipanda liyera, kasuluka pasi,

liwundi lititu liweriti pasi pa magulu gakuyi.

11 Kakweniti shiwumbi shana mbapatiru na kuguluka,

kuwoneka luwindi pampindi handa mbapatiru.

12 Kaligibikiliti luwindu wega zoseri,

shifiniku shakuyi shiweriti mawundi gazotopa ga mvula.

13 Lumeta lumulikiti kulongolu kwakuyi,

miyali ya motu ilawiti mumakala.

14 Mtuwa Mlungu kalindimila kulawa kumpindi,

liziwu lyakuyi Mlungu mkulu lipikanika.

15 Kawaguma misali wankondu wakuyi,

kwa lumeta kawatenda watugi.

16 Mtuwa Mlungu pakawakalipiliti

kulawilana na pumula yayilawa mumpula mwakuyi,

pasi nakamu pa bahari pagubutulitwi,

miyanjiru ya pasipanu iwoneka.

17 Mlungu katalapisiyiti liwoku lyakuyi kulawa kumpindi,

kantola, kulawa kumashi gavuwa kanyasuliti.

18 Kanopoliti kulawa mwa nkondu wangu yakana likakala,

kanopoliti kulawa kwa awa yawankaliliti

toziya waweriti na makakala gavuwa kunkanka.

19 Wankankaliti paweriti mukutabika,

kumbiti Mtuwa Mlungu kantangiti. 20 Kanjegiti na kantula pahala pa uponera,

kamponiziyiti, toziya kafiriziwitwi na neni.

21 Mtuwa Mlungu kanupiti lifupu toziya nahera shidoda,

kantuliti weri toziya nahera shidoda.

22 Toziya, nfata njira za Mtuwa Mlungu,

pota kumleka Mlungu gwangu kwa ukontola.

23 Nkola malagalira gakuyi goseri,

noya ndiri kufata lagiru zakuyi.

24 Kulongolu kwakuyi weriti ndiri na shidoda,

nililolera nawera na shidoda.

25 Mtuwa Mlungu kantula weri ntambu ya waminika wa neni,

yomberi kavimana uherepa wa neni.

26 Gwenga Mtuwa Mlungu ndo mwaminika kwa yawawera waminika,

mheri kwa walii wayawera waheri.

27 Gwenga gulilangaziya gwahera madoda kwa walii yawahera madoda,

kumbiti gwahera lusungu kwa wantu wakontola.

28 Gwenga guwalopola yawawera wananaga,

kumbiti guwalola wanamalingu guwasulusiya.

29 Gwee Mtuwa Mlungu, gwenga gwa lumuliku lwa neni,

Mlungu gwangu, yaguwinga luwindu lwa neni. 30 Kwa utanga waku,

gushikomanga shipinga.

Gwenga gunupa likakala lya kukopoka vibambaza vyakuyi.

31 Shakatenda Mlungu shahera madoda!

Shakalongiti Mtuwa Mlungu ndo shaminika,

yomberi ndo mlolera kwa woseri yawamtugira.

32 Kwahera mlungu handa gwenga ila gwenga?

Gaa yakawera mlolera gambira Mlungu gwetu?

33 Mlungu ayu ndo tugira ya neni igangamala,

na kayitenda njira ya neni iweri uponera.

34 Kagagangamiziya magulu ga neni handa ga funu,

na kuntula ponera pahala pampindi.

35 Kanfunda kulikomanga nkondu,

mawoku gangu gaweza kunika upindi wa shaba.

36 Gundolera na gundopola,

utanga waku untenda weri mkulu.

37 Njira ya neni ikamala ndiri,

pota magulu gangu gatyerebuka ndiri.

38 Niwafatiti wankondu wangu na kuwagamiziya.

Mbuyiti ndiri kumbeli mpaka niwagamiziya woseri.

39 Niwagusiya pasi na kuwagamiziya, nawaweza kugoloka kayi,

waguwiti pasi pa magulu gangu.

40 Gunupiti likakala lya kulikomanga nkondu,

gumpanana ukanka kwa wankondu.

41 Guwatenditi wankondu wa neni watugi,

na walii yawankalaliriti niwagamiziyiti.

42 Wasakuliti utanga,

kumbiti paweriti ndiri na gwa kuwalopola,

wamliliriti Mtuwa Mlungu, kawawankula ndiri,

43 Niwatwangiti na kuwaposhola handa madiku ga pasi,

niwaposhola na kuwatimbanga handa madika mnjira.

44 Gunopola na makomangu ga wantu wangu,

guntenda kuwera mkolamlima gwa isi zimonga.

Wantu yaniwamana ndiri wantendendera.

45 Wahenga waniziliti pawananagala,

katepu pawapikiniriti visoweru vyangu wanjimiliti.

46 Wahenga wiza na kung'ong'onalira,

wiza kulawa mumaboma gawu pawalendemera.

47 Mtuwa Mlungu ka mkomu!

Kazyumwi mlolera gwangu! Kakwiswi Mlungu gwangu,

mlolera gwa ulopola wangu!

48 Yomberi kantenda mbezi kuwankaka wankondu wangu

kantula niwakolimlima wantu wa maisi gamonga.

49 Kampanana ukanka kulawa kwa wankondu wangu.

Gwee Mtuwa Mlungu,

gumpanana ukanka kwa wankondu wa neni na kumponiziya kutali na wantu wangesera.

50 Hangu hanikuzyumi pakati pa wantu wa isi zimonga,

hanimbi zyuma zaku gwee Mtuwa Mlungu.

51 Mlungu gumpanana mfalumi gwaku ukanka mkulu,

gumlanguziya utanga waku ayu yakamlumikitwi, yina,

gumtangi Dawudi na walera wakuyi mashaka goseri."