1 Aku Giligali kuweriti na muntu yumu mpayira yawamshema Sheba mwana gwa Bikiri muntu kulawa Benjamini. Su Sheba kagomba lipenga na kulonga, "Twahera ulongu nayu, mwana ayu gwa Yese, mwenga wantu wa Israeli, kila yumu na kaligenderi kulilingu kwakuyi!" 2 Hangu, wantu woseri wa Israeli wamleka Dawudi, wamfata Sheba mwana gwa Bikiri. Kumbiti wantu wa Yuda wamfatiti mfalumi Dawudi kwa uwaminika kulawa lushemba lwa Yoridani mpaka mji gwa Yerusalemu.

3 Shakapanu, Dawudi kasokiti ukaya kwakuyi kumjini Yerusalemu. Mfalumi kawatoliti wadala lilongu yawaweriti kawalekiti kulolera numba yakuyi kawatuliti mnumba yimu pasi pa ulolera, kawapananiti kila shintu, kumbiti kagonja ndiri nawa. Hangu, wadala awa waweriti wawatatira mngati mpaka lishaka lya kuhowa kwawomberi, walikala handa, waweriti wakenja.

4 Shakapanu, mfalumi kamgambira Amasa, "Gunjonjoniri wamashonta woseri wa Yuda mulishaka lya tatu na gamweni gwenga guweri." 5 Su, Amasa kagenda kuwashema wamashonta wa Yuda. Kumbiti kakawalira kuwuya mushaka galii yagatulitwi na mfalumi. 6 Dawudi kamgambira Abishai, "Vinu, Sheba mwana gwa Bikiri, hakatujegeri ntabiku kuliku Abisalomu. Gutoli wantumintumi wa neni, gumfati Sheba nakiza kwingira kumiji yana liboma kalipoti, natumwona kayi." 7 Abishai kalawiti pamuhera na wamashonta wa Yoabu na Wakereti na Wapeleti pamuhera na makambaku woseri. Woseri awa wawukiti Yerusalemu kugenda kumfata Sheba mwana gwa Bikiri. 8 Pawasokiti kulitalawu likulu lyaliwera aku Gibioni, Amasa kalawa kuwanka. Yoabu kaweriti kavala nguwu za shishonta na mngati mwa nguwu azi kuweriti na lufunga lwalukoleriti ligumba mshunu mwakuyi paliwera kuhala yakuyi. Yoabu pakaweriti kankusegelera, ligumba lyakuyi lisomokiti mhala lituluka pasi. 9 Yoabu kamgambira Amasa, "Hashi, gwakashina mlongu gwangu?" Yoabu kamkola Amasa kushirevu kwa liwoku lya kumliwu handa kafiri kamlamsiyi kwa kumkisikira. 10 Kumbiti Amasa kaliwona ndiri ligumba lyaliweriti mliwoku mwa Yoabu, Su, Yoabu kamsoma Amasa ligumba kumtima kwakuyi utumbu ulawa kunja, kahowa. Yoabu kamsoma ndiri ligumba mala ya pili.

Shakapanu, Yoabu na mlongu gwakuyi Abishai, wendereya kumfatiriya Sheba mwana gwa Bikiri. 11 Lishonta yumu gwa Yoabu kiza kagoloka pakwegera na nshimba ya Amasa, kalonga, "Muntu yoseri yakamfira Yoabu na yakamfira Dawudi, kamfati Yoabu!" 12 Amasa kaweriti kagonja mumwazi gwakuyi pakati pa njira nkulu. Kila muntu kawona yakapititi panu, kagoloka kulola. Kumbiti muntu ulii pakawoniti handa wantu woseri yawawiziti na kugoloka panu, kayiwusiyiti nshimba ya Amasa kunjira, kayijega kulilambu na kumugibikira kwa nguwu. 13 Nshimba ya Amasa payiwusiwitwi kunjira nkulu, wantu woseri pamuhera na Yoabu wagenditi kumfata Sheba mwana gwa Bikiri.

14 Sheba kapitiliti mumakabila goseri ga Israeli mpaka mji gwa Abeli Beti Maaka. Wantu woseri wa lukolu lwa Bikiri wajojonika na kumfata. 15 Wamashonta woseri yawaweriti pamuhera na Yoabu wagenda kumzyengeta Sheba pakaweriti kumji agu gwa Abeli gwa Beti Maaka. Wamamatira vidunda vya litapaka kuzyengeta mji na liboma shakapanu wanja kubomola shibambaza su kushigusiya pasi. 16 Shakapanu, mdala tunga kana luhala kapikinika kulawa mjini pakalonga, "Mumpikiniri! Mumpikiniri! Mumgambiri Yoabu kizi nyoweri na yomberi." 17 Yoabu kagenda pakwegera na yomberi, mdala ayu kamgambira, "Hashi, gwenga ndo Yoabu?" Yoabu kalonga,

"Yina! Ndo neni." Mdala ulii kamgambira,

"Gumpikiniri neni ntumintumi gwaku." Yoabu kamgambira,

"Nikupikinira." 18 Mdala ayu kamgambira, "Makashu wantu waweriti wankulonga, muntu pakafira utakulu kagendi mji gwa Aberi. Hangu ndo wantu ntambu yawausiyiti madoda gawu. 19 Neni ndo yumu gwawu gwa walii yawafira ponga na waminika mu Israeli. Hashi vinu gwenga gufira kuhalibisiya mji yaguwera handa mawu mu Israeli. Ntambu gaa vinu gufira kutobomolera mji yaguwera gwa Mtuwa Mlungu?"

20 Yoabu kankula, "Nakaka mumakaliru gangu! Nahera nfiru ya kugubomola mji. 21 Ntambu yagutakuliti nakaka ndiri! Kumbiti muntu yumu kulawa seemu ya migongu ya Efraimu yawamshema Sheba mwana gwa Bikiri kafira kumlema mfalumi Dawudi. Gumlaviyi ayu kwaneni na neni hambuki kumji gwenu." Mdala ulii kamgambira Yoabu.

"Mtuwi gwakuyi hagugumiruwi kwa kupitira kushibambaza." 22 Shakapanu mdala ulii kwa luhala lwakuyi kagenda kwa wantu woseri mjini. Wagulikituliti mtuyi gwa Sheba mwana gwa Bikiri, wagwasa kunja kwa Yoabu. Hangu, Yoabu kagomba lipenga na kuwapalasiya wantu wakuyi kulawa mji agu gwa Abeli, kila muntu kagenda ukaya kwakuyi. Shakapanu Yoabu kawuya kwa mfalumi Dawudi, kumji gwa Yerusalemu.

23 Yoabu kaweriti mkulu gwa shonta lyoseri lya Israeli. Benaya mwana gwa Yehoyada kaweriti mkulu gwa Wakereti na Wapereti yawaweriti walolera wakuyi mweni. 24 Adoramu kaweriti mgolokera gwa lihengu lya kukakanikwa, Yehoshafati kaweriti mlemba gwa maholu. 25 Shawusa kaweriti mlemba, Sadoki na Abitari waweriti watambika. 26 Ira muntu gwa Yairi kaweriti viraa mtambika gwa Dawudi.