1 Abisalomu, kaweriti na dada gwakuyi kaherepa yawamshemiti Tamali. Ilawiriti Amunoni mwana yumonga mpalu gwa Dawudi, kamfiriti nentu Tamali. 2 Amunoni katabikiti nentu ata kulitenda kalwala toziya ya dada gwakuyi Tamali, Toziya Tamali kaweriti keneyalami. 3 Kumbiti Amunoni kaweriti na ganja yawamshemiti Yonadabu, mwana gwa Shama, mlongu gwa Dawudi. Yonadabu kaweriti muntu kana mahala nentu. 4 Yonadabu kamgambira Amunoni, "Gwenga ndo mwana gwa mfalumi, ntambu gaa guyonda na guwoneka gwahera nemeru kila lishaka. Mbona gufira ndiri kung'ambira?" Amunoni kamgambira,

"Numfira Tamali, dada gwa mlongu gwangu Abisalomu."

5 Yonadabu kamgambira, "Gugendi gwakagonji pashitanda pagulitenda kuwera gwamlweri. Tati gwaku pakiza kukulola, gwenga gumluwi pagulonga, gumleki dada gwangu Tamali kanjegili libumunda ndiyi na kantandiri shiboga kulongolu kwa neni su nishiwoni na yomberi kandiyiziyi." 6 Hangu, Amunoni kendeleya kugonja pashitanda. Pakalitenda Kalwala.

Mfalumi pakagenditi kumlola, Amunoni kamgambiti, "Nikuluwa, Tamali kizi panu kandandiri mabumunda madidi agawu panimlola. Shakapanu mweni kandiyiziyi."

7 Hangu, Dawudi kalagalira wantu kwa Tamari kuwera. "Kagendi ukaya kwa kaka gwakuyi Amunoni, kakamtandiri shiboga." 8 Tamari kaweriti aku, kamwona Amunoni kagonja. Katola ubumu na kukabanga na kubanika mabumunda kulongolu kwa Amunoni. 9 Mabumunda aga pagaweriti kala, Tamali kagajobola kulawa kushijonju. Kamjegera Amunoni, kumbiti Amunoni kalemiti kuliya, "kalonga kila yumu na kalawi kunja na woseri wawuka." 10 Shakapanu, Amunoni kamgambira Tamari, "vinu gunjegeri mabumunda aga kushumba kwa neni, shakapanu gundiyiziyi." Tamari katoliti mabumunda gakatanditi na kugajega kushumba kwa kaka gwakuyi Amunoni. 11 Pakaweriti kankumpanana mabumunda aga, Amunoni kambatiti na kumgambira, "Gwizi gugonji na neni!"

12 Tamari kamgambira, "Ndala kaka gwangu. Nagunkakanika Shitendu ashi shitendeka ndiri Muisraeli! Nagutenda shitendu ashi sha ungalimahala! 13 Hantuli koshi sheni shangu kwa soni ayi. Na gwenga, haguweri yumu gwa wangalimahala Muisraeli. Su neni nikuluwa guyoweri na mfalumi toziya hapeni kalemi kunyuga." 14 Kumbiti Amunoni kafiliti ndiri kumpikinira na toziya kaweriti nalikakala kuliku yomberi kamkakanika kagonja nayu.

15 Shakapanu, Amunoni kamkalalira nentu Tamali. Kamkalalira Tamali kuliku ntambu yakamfiliti shaka shipititi. Kamgambira Tamari, "Guwuki kalongola!"

16 Tamari kamwankula, "Ndala kaka gwangu, likontola ali likulu lya kuwinga ndo lidoda nentu kuliku lilii lyaguntenderiti!"

Kumbiti Amunoni kafira ndiri kumpikinira. 17 Kamshema mntemba gwakuyi yakamtenderiti, kamgambira, "Gumlaviyi mdala ayu. Na gulitati ligomi." 18 Amunoni na mntemba ulii wamlaviya kunja na kalitata ligomi.

Tamali kaweriti kavala nguwu ntali zyana mawoku matali hangu ndo ntambu yawavaliti wahinga wa mfalumi yawaweriti wenigonji na mpalu mashaka aga. 19 Su, Tamari kaswaga malivu kumtuyi, kaipapu nguwu yakuyi, kagatula mawoku gakuyi kumtuyi, shakapanu kawuka agawu pakalira kwa kubota. 20 Kaka gwakuyi, Abisalomu, pakamwoniti kamkosiya, "Hashi, Amunoni kaka gwaku kagonja na gwenga? Gunyamali dada gwangu. Yomberi ndo kaka gwaku. Nagushilekera shitwatira ashi mumoyu mwaku." Hangu, Tamari kalikaliti mnumba ya Abisalomu pakawera na hinginika na mgweka.

21 Mfalumi Dawudi pakapikiniriti shitwatira ashi kakalaliti nentu. 22 Abisalomu kamkalaliriti Amunoni nentu ata katakula nayu ndiri, toziya kamkola kwa likakala dada gwakuyi Tamari na kugonja nayu.

23 Vinja viwili pavipititi, Abisalomu kaweriti na lihengu lya kulikitula kondolu wakuyi mibahila kumji gwa Baala Hasoli, pakwegera na Efraimu. Kawashemera wana woseri wapalu wa mfalumi. 24 Abisalomu kamgendera mfalumi Dawudi, kamgambira, "Guloli, neni ntumintumi gwaku yaniwadumula kondolu mibahira. Nikuluwa gwenga mfalumi pamuhera na wantumintumi waku, mgendi pamuhera na neni, ntumintumii gwaku."

25 Mfalumi kamwankula, "Ndala, mwana gwangu," natugenda woseri, "Natwiza kuwera shisanka kwa gwenga." Tembera Abisalomu kongera kumluwa tati gwakuyi kagendi, kumbiti mfalumi kalema, ila kampanana tekelera zakuyi.

26 Shakapanu Abisalomu kamgambira, "Handa gugenda ndiri, su, gumleki mlongu gwangu Amunoni tugendi nayu."

Mfalumi kamwankula, "Ntambu gaa kagendi pamuhera na mwenga?" 27 Kumbiti Abisalomu kongeriti kumluwa na upeleru mfalumi kamjimira Amunoni na wana wakuyi wamonga wagendi kumsambu agu. 28 Abisalomu kawagambira wantumintumi wakuyi, "Mumloreli Amunoni pakawera kalanda na kulowera, mumkomi Amunoni, mumlagi. Ali ndo lilagaliru lyangu kwa mwenga. Mliyupi moyu na muweri wagangamala." 29 Hangu, wantumintumi wa Abisalomu wamtenderiti Amunoni ntambu yawagambiritwi na Abisalomu, shakapanu wana wapalu wamonga wa mfalumi wawuka kila yumu kakwena punda farasi* gwakuyi na kutuga.

30 Pawaweriti mnjira, Dawudi kapatiti visoweru kuwera, "Wana wakuyi woseri walaguwa na Abisalomu na kwahera ata yumu yakasigaliti!" 31 Mfalumi Dawudi kagolokiti, kapapula nguwu zakuyi kwa hinginika kagonja pasi. Ata na wantumintumi wakuyi woseri waweriti wagoloka pakwegera na yomberi wapapuliti nguwu zawu. 32 Kumbiti Yonadabu, mwana gwa Shimea, mlongu gwa Dawudi kamgambira, "Mtuwa gwangu, nagulihola kuwera wana waku woseri walaguwa. Amunoni gweka yakuyi ndo yakalaguwitwi. Aga Abisalomi kagapangiti kala kugatenda kwanjira shaka Amunoni pakambatiti kwa likakala dada gwakuyi Tamali na kugonja nayu. 33 Hangu, mtuwa gwangu, nagulihola mmoyu mwaku handa wana waku woseri wahowa. Amunoni gweka yakuyi ndo yakalagitwi."

34 Kumbiti Abisalomu kaweriti katugiti kala.

Katepu mntemba yakaweriti kamuulolera, kawona shipinga shikulu sha wantu pawiza kulawa kulugongu munjira ya Horonaimu. 35 Yonadabu kamgambira Dawudi, "Guloli mfalumi, wana waku wakwiza ntambu yanikugambiriti neni ntumintumi gwaku." 36 Katepu hera ntumintumi pakamaliliti kulonga, wana wapalu wa Mfalumi na wantumintumi wakuyi woseri, wanja kulira kwa kubotanga. Mfalumi na wantumintumi wakuyi woseri walira kwa hinginika.

37 Kumbiti Abisalomu katugiliti kwa Talimai mwana gwa Amihudi, mfalumi gwa mji gwa Geshuri. Mfalumi Dawudi kadaya toziya ya mwana gwakuyi Amunoni kwa mashaka gavuwa. 38 Abisalomu katugiliti mji gwa Geshuri, kalikala aku kwa shaka sha vinja vitatu. 39 Mfalumi Dawudi pakamaliliti kudaya kuhowa kwa mwana gwakuyi Amunoni, kafiliti kumwona mwana gwakuyi Abisalomu.