1 Yoabu mwana gwa Seruya, kavimaniti handa mfalumi kaweriti kamhola nentu na kafiliti kumlola mwana gwakuyi Abisalomu. 2 Hangu kawalagalila wantu aku Tekoa su wakamjegi mdala kana luhala. Pawamjegiti, kamgambira, "Gulipayiri gwankugonjera shiwembu. Guvali nguwu za kudaya, naguliswagi lipaki na gulitendi handa mdala yakawera mukudaya toziya ya wahowiti kwa shaka shitali. 3 Shakapanu gugendi kwa Mfalumi gumgambiri galii ganikugambira." Yoabu kamgambira visoweru vya kumgambira mfalumi.

4 Mdala ayu kulawa Tekoa kagenda kwa mfalumi, kaguwa makukama, kulongolu kwa mfalumi, kamsundamalira, kamgambira, "Gwee mfalumi, guntangi."

5 Mfalumi kamkosiya, "Gufira shishi?"

Mdala ulii kamwankula, "Neni ndo namkenja, mpalu gwangu kahowa. 6 Weriti na wana wapalu wawili. Lishaka limu, pawaweriti kushiwala, wanjiti kulikomanga toziya kuweriti ndiri na muntu yoseri gwa kuwakamlira, yumu gwawu kamlaga myaguwi. 7 Vinu walongu wangu woseri wang'alambuka neni ntumintumi gwaku, wafira nimlavii kwa womberi mwana yakamlagiti myaguwi su wamlagi toziya kamlagiti mlongu gwakuyi. Hangu, hawamlagi ayu mweni vinu ndo mhala gwangu. Pawatenda hangu, hawaliwusiyi nakamu litumbiru lyangu lyalisigaliti na mpalu gwangu hapeni kalekelwi litawu pota mwiwuka kuisi."

8 Mfalumi kamgambira mdala ulii, "Guwuyi ukaya handagaliri shitwatira shaku shilolwi."

9 Mdala kulawa Tekoa kalonga, "Mtuwa gwangu mfalumi, handa payilawira ntabiku yoseri ilii hayiweri kwaneni na walongu wa tati gwangu."

10 Mfalumi kamgambira, "Muntu yoseri yakanakutabisiyi gumjegi kwa neni na hapeni kizi kukushinkula kayi."

11 Mdala ulii kamgambira, "Shondi, mfalumi, gunduwiri kwa Mtuwa Mlungu, Mlungu gwaku, su kumbeziyi mlongu gwangu ulii yakafila kumlaga mwana gwangu nakatenda shidoda shimonga shikulu sha kumlaga mwana gwangu yumonga." Mfalumi Dawudi kamgambira,

"Ntambu yakalikala Mtuwa Mlungu, mwana gwaku hapeni katenduwi."

12 Mdala ulii kamgambira, "Nikuluwa, neni ntumintumi gwaku, gunjimili ntakuli shisoweru shimu kwa gwenga mfalumi." Mfalumi kamgambira,

"Gulongi."

13 Mdala ulii kamgambira, "Ntambu gaa, gupanga ukondola awu kwa wantu wa Mlungu? Gumlekiziya ndiri mwana gwaku kawuyi ukaya kulawa kwakatugiriti, vinu gulitoza gamweni kwa aga gagulongiti. 14 Twenga handa mashi yagitikiti pasi geni gajoleka ndiri, twawoseri hatuhowi. Ata Mlungu kawawuziya ndiri yakahowiti waweri wakomu, kumbiti mfalumi kaweza kusakula njira ya kuwuziya muntu yakatugira kuisi ya shihenga. 15 Niza kuyowera na gwenga, mtuwa gwangu mfalumi, toziya wantu wantiriziya. Su, neni ntumintumi gwaku, nilihola kuwera, hanyoweri na mfalumi, pamonga hakawezi kuntendera vyanfira neni ntumintumi gwakuyi. 16 Toziya mfalumi hakapikinili na kunopola mmawoku mwa muntu yakafira kundaga neni pamuhera na mwana gwangu kulawa uhala wa Mlungu. 17 Neni ntumintumi gwaku niliholiti handa, shisoweru sha mtuwa gwangu mfalumi hashinupi ponga mumoyu, toziya gwenga mtuwa gwangu mfalumi ndo handa ntumintumi gwa kumpindi gwa Mlungu mukugatula gweka maheri na madoda. Mtuwa Mlungu, Mlungu gwaku, kaweri pamuhera na gwenga!"

18 Mfalumi ndo pakamwankuliti mdala ulii, "Nagunfifa shisoweru shoseri shanfira kukukosiya." Mdala ulii kalonga,

"Gulongi mtuwa gwangu mfalumi."

19 Mfalumi kamkosiya, "Hashi, Yoabu kamushitwatira ashi?"

Mdala ulii kalonga, "Ntambu yagwendeleya kulikala, mtuwa gwangu mfalumi, kwahera muntu yakagalambukila kumshigi ama kumlihu mushitwatira ashi shagulongiti mtuwa gwangu mfalumi. Ntumintumi gwaku Yoabu ndo yakantumiti. Ganikugambiriti neni ntumintumi gwaku. 20 Yoabu kaweza kutenda mirandu ayi kuwera. Kumbiti, gwenga mtuwa gwangu gwana luhala handa lwa ntumintumi gwa kumpindi gwa Mlungu, ata guweza kuvimana vitwatira vyoseri vyaviwera kuisi."

21 Mfalumi kamgambira Yoabu, "Vinu gupikinili, nfira gutendi ashi gugendi gwakamwuziyi ukaya mntemba Abisalomu."

22 Yoabu kaguwiti pasi makukama na kasuntamala na kumfilira mfalumi tekelera, kalonga, "Leru, neni ntumintumi gwaku, mtuwa gwangu mfalumi, nivimana kuwera gukujimira kuluwa kwa neni na hangu gunemiziwa na neni." 23 Shakapanu, Yoabu kawuka kagenda Geshuri kumjega Abisalomu kumji gwa Yerusalemu. 24 Kumbiti mfalumi kalonga, "Abisalomu kalikali kutali na neni, kalikali ukaya kwakuyi. Nakiza panu kundola." Hangu, Abisalomu kagenda kankulikala kutali na neni, kalikali ukaya kwakuyi.

25 Muisraeli yoseri, kwahera yoseri yakaherepa handa Abisalomu. Kwanjira lwayu lwakuyi mpaka kulutosi lwakuyi, Abisalomi kaweriti ndiri na shilema. 26 Kaweriti na viri zivuwa na kazimogiti mala yimu kila shinja toziya mweni kaziwona kuwera ntali na zizotopa, pakazimoga uzotopa wakuyi uweriti handa kilu mbili kwakulinganira na vipimu ntambu yavitulitwi na ufalumi. 27 Abisalomu kaleriti wana watatu wapalu pamuhera na mhinga yumu litawu lyakuyi Tamali, Tamali kaweriti mdala kaherepa.

28 Su, Abisalomu kalikaliti kumji gwa Yerusalemu kwa shaka sha vinja viwili vyoseri pota kumlola mfalumi Dawudi. 29 Shakapanu, Abisalomu kamshema Yoabu, su kamlagaliri kwa mfalumi, kumbiti Yoabu kalema, Abisalomu kamshema kayi kumbiti Yoabu kalema. 30 Su Abisalomu kawagambira wantumintumi wakuyi, "Mloli Yoabu kana lilambu lya shayili pakwegera na lyangu. Mgendi mkalipambi motu." Hangu wantumintumi wa Abisalomu walipamba motu lilambu lya Yoabu.

31 Yoabu kagenda ukaya kwa Abisalomu kamkosiya, "Ntambu gaa wantumintumi waku wapamba motu lilambu lyangu?"

32 Abisalomu kamwankula, "Guloli, Nikujegiriti ulagilagi, gwizi agawu su nikulagalili kwa mfalumi, gwakamukosiyi, ntambu gaa mbukiti Geshuri? Meyiweri mbaka kusigala aku." Vinu guntangi mpati kumlola mfalumi, "Handa nana likondola su kandagi!"

33 Hangu Yoabu kagenda na kumgambira mfalumi visoweru avi vyoseri na mfalumi kamshema Abisalomu na kingira kwa mfalumi kaguwa makukama kulongolu kwa mfalumi na mfalumi kamkisikila Abisalomu.