1 Pa aga, Dawudi kawakomiti na kuwakanka Wafilisti na kugutola mji gwa Metegi Ama na vijiji vyakuyi vyaviweriti vikolwamlima na Wafilisti.

2 Shakapanu kawakankiti Wamoabu. Kawatula mumistali walopolwa awa na kuwagonjeka pasi. Kahimiziya walii yawawera kumistali miwili walagwi na walii wa mstali gwa tatu walekwi. Hangu, Wamoabu wawera wantumintumi wakuyi Dawudi na wawera wankumlipa kodi.

3 Dawudi viraa kamkankiti Hadadizeri mwana gwa Rehobi, mfalumi gwa Soba. Dawudi kapatiti ukanka awu shaka sha Hadadizeri pakaweriti mnjira kugenda kupawuziya pahala papaweriti lushemba Eufrata kuwera pasi pa ukolamlima wakuyi. 4 Dawudi kalopoliti wakwena farasi elufu yimu na miya saba na mashonta wagenda kwa magulu ishilini elufu. Shakapanu Dawudi kalikituliti mishipa ya kumbeli ya farasi woseri wa mbutuka za kukwega, ila kasigaziyiti farasi wa kutoshela mbutuka miya yimu.

5 Waaramu wa Dameski pawagenditi kumtanga Hadadizeri, mfalumi gwa Soba, Dawudi kawakomiti na kuwalaga wantu ishilini na mbili elufu. 6 Shakapanu Dawudi katuliti ng'onjeru za shishonta kumji gwa Waaramu wa Dameski. Hangu, Waaramu wawera wantumintumi wakuyi na wawera wankumlipila kodi. Mtuwa Mlungu kampananiti Dawudi ukanka koseri kwakagenditi. 7 Dawudi kazitoliti ngawu za zahabu zyawapapiti wakulu wamashonta wa Hadadizeri na kuzijega Yerusalemu. 8 Viraa katoliti shaba zivuwa nentu kulawa miji ya Beta na Berotai, yayiweriti ukolwamlima na Hadadizeri.

9 Mfalumi Toi gwa Hamati, pakapikiniriti handa Dawudi kalikankiti lishonta lyoseri lya Hadadezeri. 10 Kamlagaliliti mwana gwakuyi Yoramu kwa mfalumi Dawudi kumlamsiya na kuzyuma toziya kaweriti kalikomiti na Hadadizeri na kumkanka. Hadadizeri kalikomiti na toi mala zivuwa. Yoramu kamjegeriti Dawudi mafupu ga vyombu vya madini ga feza na zahabu na shaba. 11 Mafupu aga, pamuhera na feza na zahabu zyakaweriti kazilopola kwa maisi goseri gakagakangiti, kazilaviyiti kwa Mtuwa Mlungu, 12 vintu avi vilawiti isi ya Edomu na Moabu na Amoni na Filistia na Ameleki, pamuhera na lopola zyakalopoliti kwa mfalumi Hadadezeri, mwana gwa Rehobu mfalumi gwa Soba.

13 Dawudi kaweriti kungera kumanika kwakuyi. Pakaweriti kankuwuya pakamkankiti kala Hadadezeri, kawalagiti Waedomu elufu lilongi na nani, mlulalanda lwa munu. 14 Katula ng'onjeru za shishonta mu Edomu yoseri. Na Waedomu woseri wa aku wawera wantumintumi wakuyi. Mtuwa Mlungu kampananati Dawudi ukanka koseri kwakagenditi.

15 Hangu, Dawudi kakolamlima Israeli yoseri na kawera pakawatendera wantu woseri ntambu yaifiruwa pota kumbagula muntu yoseri. 16 Yoabu mwana gwa Seruya, kaweriti mkulu gwa mashonta. Yehoshafati mwana gwa Ahiludi, kaweriti kalemba goseri yagalawira su nawagalyaluwa. 17 Sadoki mwana gwa Ahitubu na Ahimeleki mwana Abiatali waweriti watambika, Seraya kaweriti mlemba. 18 Benaya mwana gwa Yehoyada kaweriti mlonguziya gwa walolera wakuyi Dawudi yawashemitwi Wakereti na Wapeleti na wana wa Dawudi waweriti Watambika.