1 Avi ndo visoweru vya upeleru vya Dawudi, mwana gwa Yese, muntu mweni Mlungu kamtenditi kaweri mkulu. Mlungu gwa Yakobu kamsyaguliti Dawudi kuwera mfalumi na visoweru vyakuyi wantu wa Israeli wanemeleliti kwimba.

2 Rohu ya Mtuwa Mlungu ilonga kwa kupitira neni,

kavituliti visoweru vyakuyi mumlomu mwangu.

3 Mlungu gwa Israeli kalonga,

mlolera gwa Israeli kang'ambira,

mfalumi pakawakolamlima wantu kwa ntambu yakafira Mlungu,

hakakolimlima kwa kumtira Mlungu,

4 yomberi ndo handa gulangala gwa mandawira,

mshenji pagulawira mandawira kwahera na mawundi, yina, handa mvula yayitenda ntuntu imeri mulitapaka.

5 Hangu ndo ntambu Mlungu hakayitekeleri kaya yangu.

Toziya katenda na neni lipatanu lya mashaka goseri,

lipatanu nakamu na ligangamaliti.

Na yomberi hakanupi kwa nfiru yangu yoseri.

6 Kumbiti yawamana ndiri Mlungu woseri ndo handa misomi yaiyaswa hera,

toziya hapeni itolwi kwa mawoku,

7 Muntu yakaikola, mpaka katenderi shuma ama mhanya gwa mgoha.

Wantu awa hawalunguziwi nakamu kwa motu.

8 Aga ndo matawu ga makambaku yakaweriti nawa Dawudi. Yoshebi Bashebeti na Mtakimoni, yakaweriti mlonguziya gwa walii watatu, yomberi kalikomangiti kwa mgowa gwakuyi, kawalaga wantu miya nani shaka shimu.

9 Shakapanu yakafatiti muwamu mwa walii makambaku watatu kaweriti Eleazari mwana gwa Dodo, gwa lukolu lwa Ahohi. Lishaka limu, Eleazari kaweriti pamuhera na Dawudi pawawigirangiti Wafiristi yawaweriti wajojonika kulikomanga nkondu. Waisraeli pawawatiriti Wafiristi. 10 Kumbiti Eleazari kagangamaliti na kulikomanga na Wafiristi mpaka liwoku lyakuyi likakamala, lisigala likolelera ligumba lyakuyi. Lishaka ali, Mtuwa Mlungu kalipananiti ukanka mkulu. Pa ukanka awu, Waisraeli wawuyiti pahala pakaweriti Eleazari na kulipanana lopola za hera kulawa kwa Wafiristi yawalagitwi.

11 Shikambaku gwa tatu kaweriti Shama mwana gwa Ageyi kulawa Harari. Wafiristi wajojonikiti aku Lehi, pahala papaweriti na lirambu lya dengu ivuwa, Waisraeli wawatugiti Wafiristi. 12 Kumbiti kaligangamiziyiti mulirambu ali su kulikomangira na yomberi kawalaga Wafiristi. Mtuwa Mlungu kalipanana ukanka mkulu.

13 Shakapanu, makambaku watatu pakati pa wakulu selasini waseleriti shaka sha kubenanga wasoka kwa Dawudi kumpanga aku Adulamu. Shaka ashi lishonta lya Wafiristi liweriti litula lugonjeru mululalanda lwa Refaimu. 14 Shaka ashi Dawudi kaweriti aku Adulamu pahala papalolilitwi nentu na lishonta lya Wafiristi liweriti kumji gwa Betilehemu. 15 Dawudi kalonga kwa nfiru nkulu, "Handa muntu mekawezi kumpanana mashi ga kulanda kulawa mulinegu lya Betilehemu lyaliwera pakwegera na ligomi likulu lya mji!" 16 Walii makambaku wakuyi watatu walawiti, wapena mulugonjeru lwa lishonta lya Wafiristi, wagenda na kuteka mashi mulinegu lya Betilehemu, pakwegera na ligomi lya mji, wamjegera Dawudi. Dawudi kalemiti kugalanda mashi aga na badala yakuyi, kita pasi handa tambiku kwa Mtuwa Mlungu, 17 kalonga, "Hapeni nandi mashi aga! Gwee Mtuwa Mlungu, hayiweri handa nanda mwazi gwa walii yawafiriti ata kuhowa!" Hangu, Dawudi kagalanda ndiri mashi aga.

Avi ndo vitwatira vyawatenditi makambaku watatu walii.

18 Abishai mlongu gwakuyi Yoabu, mwana gwa Seruya, kaweriti mkulu gwa makambaku selasini. Yomberi kalikomangiti kwa mgoha gwakuyi na wantu miya tatu na kawalaga, kaweriti kazyumwa muwamu mwa walii makambaku watatu. 19 Kaweriti kamanika nentu muwamu mwa walii makambaku selasini na kawera mkulu gwawu, kumbiti kaweriti ndiri handa makambaku watatu walii.

20 Benaya mwana gwa Yehoyada, kulawa Kabizeeli, kaweriti shonta mgangamala mweni katenda vitwatira vivuwa vya kulikangasha. Kawalagiti makambaku wawili kulawa Mowabu na lishaka limu shaka sha barafu, kasulukiti kulirindi na kumlaga simba. 21 Viraa kamlagiti shikambaku gwa Misri. Mmisri ayu kaweriti na mgoha, kumbiti Benaya kamgenderiti pakawera na luhonga hera, kampoka mgoha agu na kumlaga Mmisri ayu kwa mgoha gwakuyi mweni. 22 Benaya, mwana gwa Yehoyada katenditi vitwatira avi, kazyumitwi nentu muwamu mwa walii makambaku watatu. 23 Su, kaweriti kamanika nentu pakati pa walii makambaku selasini, kumbiti kawera ndiri handa makambaku watatu walii. Dawudi kampanana ukulu wa walolera wakuyi mweni.

24 Asaheli, mlongu gwakuyi Yoabu, kaweriti yumu gwa makambaku Selasini. Makambaku wamonga wa Dawudi waweriti.

Elihanani, mwana gwa Dodo kulawa Betilehemu,

25 Shamma na Elika walawa mulukolu lya Harodi,

26 Helesi muntu gwa kulawa Paliti na Ira mwana gwa Ikeshi kulawa Tekoa,

27 Abiezeri kulawa Anatoti na Mebunai kulawa Hushati,

28 Salimoni kulawa Ahohi na Maharai kulawa Netofati,

29 Helebu mwana gwa Baana kulawa Netofati, Itai mwana gwa Ribai kulawa Gibea muntu gwa Benjamini,

30 Benaya kulawa Piratoni na Hidayi gwa vishemba vya Gaashi,

31 Abialiboni kulawa Haribati na Azimaweti kulawa Bahurimu,

32 Eliaba kulawa Shaaliboni wana wa Yasheni na Yonatani,

33 Shamma kulawa likabila lya Harari na Ahimu mwana gwa Sharari kulawa likabila lya Harari,

34 Elifeleti mwana gwa Ahasibayi kulawa Maaka na Eliamu mwana gwa Ahitofeli kulawa Giloni,

35 Hesirawi kulawa Karimeli na Paarayi kulawa Waribi,

36 Igali mwana gwa Natani kulawa Soba na Bani kulawa Gadi,

37 Seleki kulawa Amoni na Naharai kulawa Beeruti yakaweriti mpapa vintu vya kulikomangira nkondu gwa Yoabu mwana gwa Seruya,

38 Ira na Garebu kulawa likabila lya Witiri,

39 Uria kulawa Hiti. Woseri pamuhera waweriti makambaku selasina na saba.