1 Limashaka lya matatu, Dawudi na wantu wakuyi wawuya Sikilagi. Waamaleki waweriti wagukomanga kala muji gwa Negebu pamuhera na muji gwa Sikilagi na kugulungiziya kwa motu. 2 Waweriti walopola wadala na wantu woseri yawaweriti mumiji ayi, wakulu kwa wapusu.Yawawalopoliti, wawukiti nawa pawawera wakomu, pota kumlaga muntu yoseri. 3 Dawudi na wantu wakuyi pawasokiti kumjini wawoniti lushi walulunguziya kayi wadala wawu na wanawawu wapalu na wadala woseri walopoluwa. 4 Dawudi na wantu wakuyi wanja kulira, walira mpaka waleweleka. 5 Na wadala wawiri wa Dawudi, weni ndo Ahinoamu kulawa Yezeeri na Abigaili mdala mkenja gwa Nabali, nawomberi waweriti walopoluwa vilaa. 6 Vinu Dawudi kaweriti muntabika nkulu, toziya wantu wakuyi waweriti na hinginika mumiyoyu kwakuhowiziya wana wawu, hangu wafiriti kumgumanga mabuhi. Kumbiti Dawudi kaligangamiziya mumoyu kwa kumlola Mtuwa Mlungu gwakuyi. 7 Dawudi kamgambira mtambika Abiatari mwana gwa Ahimeleki, "Gujegi nguwu ya kugibikira pashifuwa sha mtambika." Abiatari kamjegera. 8 Dawudi kamluwa Mtuwa Mlungu shisoweru, "Hashi, lipinga ali niligenderi? Na hashi hanishibati?" Mtuwa Mlungu kamwankula, "Gushigenderi toziya hagushipati na kuwalopoziya yawalopolitwi awa." 9 Hangu, Dawudi kawuka pamuhera na wantu miya sita yakaweriti nawa. Pawasokiti palushemba lwa Besori, wawawoniti wamu wa wantu yawaweriti walopolwa wawaleka palii. 10 Kumbiti Dawudi kendereyiti kushigendera shipinga shilii pakawera na wantu miya msheshi na wantu miya mbili wasigaliti palapalii toziya watokiti nentu wasinda kuloka lushemba alu. 11 Wantu walii yawaweriti na Dawudi wamwoniti muntu yumu Mmisri kundundu na womberi wamjega kwa Dawudi. Muntu ayu kaweriti keniliyi shoseri ama kulanda mashi kwa shaka sha mashaka matatu paliwala na pashiru. 12 Wampananiti shipandi sha libumunda na mashi kayi wampananiti libumunda lya tini na mikunguwi miwili ya zabibu ziyuma. Pakamaliliti kuliya, kapata likakala. 13 Dawudi kamkosiya, "Mtuwa gwaku ndo gaa? Na gulawa koshi?" Yomberi kamgambira, "Neni ndo mndemba Mmisri. Ndo ntumintumi gwa Mmaleki yumu. Mtuwa gwangu kandekiti kumbeli mashaka matatu gapititi toziya nweriti mlweri. 14 Twenga tukomangiti mji ya Wakeleti yayiwera uwega wa kusika mwa Yuda na ya lukolu lwa Wakereti tuguluziya motu mji gwa Sikilagi." 15 Dawudi kamkosiya, "Hashi, guweza kunjega kulipinga lya walopola?" Mntemba kamwankula, "Payiwera gunapili kwa litawu lya Mtuwa Mlungu kuwera hapeni gundagi, pota kumbeziya kwa mtuwa gwangu, hanikujegi." 16 Mntemba ulii kamlonguziyi Dawudi mpaka kulipinga lilii paliweriti. Pawasokiti aku wawawoniti walopola awa pawawera walipalasiya kila pahala tembera waweriti wankuliya na kulanda toziya lopola zyawalopoliti kulawa isi ya Wafilisti na Yuda ziweriti zivuwa nentu. 17 Dawudi kawakomangiti kwanjira mandawira mpaka lishaka lya pili paliwala. Kwahera mpalu yoseri yakalilopoliti ila hera wantemba mia msheshi wakweniti mungamiya na kutuga. 18 Dawudi kalopoliti kila shintu sha Waamaleki shawaweriti walopola, ata na wadala wakuyi wawili. 19 Kwahera shoseri shashagamiriti, shiweri shikulu ama shididiki, mwana mpalu ama mdala, Dawudi kashilopoliti. 20 Viraa Dawudi kaviwuziyiti vipinga vyoseri vya kondolu na ng'ombi na wantu wakuyi yawera wankulololera wankanyama awa pawawalonguziya kulongolu kwa wankanyama wamonga walii. Pawalonga, "Lopola azi za Dawudi."

21 Dawudi kawawuyira wantu walii miya mbili walekitwi kulushemba lwa Besori toziya waweriti watoka kumfata. Wantu walii pawamwoniti Dawudi pamuhera na walii yawaweli pamuhera na yomberi, wagenda kumwanka. Dawudi pakasokiti pakwegera na wantu awa, kawalamusiya. 22 Kumbiti wantu woseri wagaziya na wandewu muwamu mwa wantu yawagenditi na Dawudi, walonga, "Hapeni tuwapanani wantu awa lopola zoseri zatuzilopoliti toziya wagenditi ndiri pamuhera na twenga. Ila wawatoli wadala wawu na wana wawu wagendi zawu."

23 Dawudi kawagambira, "Ndala walongu wangu. Hapeni muwezi kutenda hangu kwa shilii Mtuwa Mlungu katupanana. Katulolera weri na katutenda tulikanki lipinga lyoseri lyaliziti kutukomanga. 24 Kwahera muntu yakafira kujimirana na maholu genu! Ulii yakagenditi kunkondu na yakasigaliti na visanga vyetu, kila muntu hakapananwi seemu yailinganira na wayaguyi." 25 Kwanjira lishaka lilii Dawudi kaamuwiti ntambu ayi kuwera lagiru na litendeka mpaka leru muisi yoseri ya Israeli.

26 Dawudi pakawuyiti Sikilagi, kawajegara waganja wakuyi, weni ndo wazewi wa Yuda, seemu ya lopola pawalonga, "Niwajegera mafupu kulawa lopola za wankondu wa Mtuwa Mlungu." 27 Mafupu aga gaweriti kwajili ya wenikaya wa Beteli na wenikaya wa Ramoti mu Negebu na wanikaya wa Yatiri, 28 wenikaya wa Aloeli na yawawera Sifumoti na wenikaya wa Eshitemoa, 29 wanikaya wa Rakali na wenikaya wa miji ya Wayerameeli na wenikaya wa miji ya Wakeni, 30 wenikaya wa Horima na wenikaya wa Borashani na wenikaya wa Ataki, 31 na wenikaya wa Hebroni. Dawudi kawajegiriti viraa wenikaya wa miji yoseri yeni yomberi na wantu wakuyi watyangiriti.