1 Dawudi katoloka kayi kulawa Nayoti mu Rama, kagenda mpaka kwa Yonatani, kawagambira, ntenda shishi? Likosa lyangu shishi? "Nimtendera tati gwaku shidoda gaa ata kajeri kuntaga?" 2 Yonatani kankula, "Ali na liweri kutali na gwenga. Hapeni guhowi. Tati gwangu katenda ndiri mlandu goseri, guweri mkulu ama mdidiki, pota kung'ambira. Ata mlandu agu hapeni kawezi kunfifa. Ntambu yaiwera ndiri ata shididini." 3 Dawudi kalilapa viraa, "Nakaka tati gwaku kavimana weri ntambu yagunfira na kalihola kukufifa kuusu mlandu agu su nagwinginika pakalitenda. Kumbiti, kwa ntambu yoseri ilii, nililapa kwa Mtuwa Mlungu yakawera mkomu, na gwenga yaguwera mkomu, handa pakati pa neni na mtugulu vya pakwegera!" 4 Yonatani kamgambira, "Shoseri shagutakula hanikutenderi." 5 Dawudi kamgambira, "Shirawu ndo msambu gwa mwezi mwoneka na neni haweri pameza kuliya pamuhera na mfalumi. Kumbiti gundeki, nilififi aku kulilambu mpaka lishaka lya tatu pamihi. 6 Tati gwaku pakamona ndiri pameza kwa shiboga, pakakosiya visoweru vya neni, su gumgambiri, Dawudi kazyangazyanga nentu nimjimiri su kagendi kumjini kwakuyi Betilehemu, kuwera kutambiku ya kila shinja na walongu wakuyi. 7 Payiwera hakawoni ndo hayiweri hangu, su, guvimani kuwera mirandu ya neni, ntumintumi gwaku, ya ponga. Hera Hangu, nfiru yakuyi kwa neni ndo idoda. 8 Hangu guntenderi kwa uheri waku toziya gutenda lipatanu linanagala na neni, neni ntumintumi gwaku, kulongolu kwa Mtuwa Mlungu. Kumbiti, handa ntenda likosa na guntagi gamweni gwenga, ntambu gaa gunjegi kwa tati gwaku su kantagi?" 9 Yonatani kankula, "Liholu ali na liweri kutali na gwenga. Nakaka, handa menivimani kuwera tati gwangu kapanga madoda kwa gwenga menikufifi ndiri." 10 Dawudi kakosiya, "Hanivimani hashi payiwera tati gwaku hakakwankuli kwa ukalipa?" 11 Yonatani kamwankula, "Mwizi tugendi kumalambu!" Su, wagenda. 12 Yonatani kamgambira Dawudi, "Mtuwa Mlungu, Mlungu gwa Israeli na kaweri kapitawu gwetu. Shirawu ama shirawu imonga, shaka handa ashi hanimkosiyi tati gwangu. Payiwera hakalanguziyi kakufira ndiri ama shisoweru shoseri shidoda hanikugambiri. 13 Handa tati gwangu pakafira kukulaga na neni nikugambira ndiri su Mlungu kandagi, gugendi pahala patali. Mtuwa na kaweri pamuhera na gwenga ntambu yaguweriti na tati gwangu. 14 Payiwera hanendereyi kuwera mkomu su, gutuli weri shagulongiti shinanagala na guweri mwaminika handa pamhowa, 15 kayi naguleka kuyitanga kaya ya neni kwa waminika mashaka goseri. Na Mtuwa Mlungu hakawalemi wankondu waku kulawa Pasipanu, 16 Kwa kutenda hangu Yonatani kankutenda lipatanu na kaya ya Daudi, pakalonga. Mtuwa na kawagamiziyi wangondu wa Dawudi." 17 Kwa mala imonga kayi, Yonatani kamgambiriti Dawudi kalilapi kulinganira na ufiru waku kwakuyi yomberi Yonatani, toziya kamfiriti Dawudi ntambu yakalifiriti mweni. 18 Shakapanu kamgambira Dawudi, "Shirawu ndo msambu gwa lyezi kulawira, wantu hawawoni handa gwahera, toziya shiti shaku hashiweri shahera muntu. 19 Shirawu imonga, wantu hapeni wakuwoni nakamu. Lishaka ali gugendi pahala gulififiti kwanja, gulififiti kumbeli kushidunda sha mabuwi. 20 Neni hang'umi misali mitatu kubwegabwega gambira nanguziya kuguma shintu tunga. 21 Hanimtumi ntumintumi gwangu kagendi kuyisakula misali. Handa panimgambira, guloli, misali ayi ya uwega awu waku, guyitoli, ayi inamana handa guponeka na gwenga hagulilaviyi kulawa pahala pagulififiti, toziya nililapa kwa Mtuwa Mlungu yakawera mkomu, handa meguweri guponeka. 22 Kumbiti nimgambira, guloli, misali yakulongolu kwaku, panu, guwuki, toziya Mtuwa Mlungu kafira gugendi kutali. 23 Kwa mirandu yatupataniti, Mtuwa Mlungu katulola su tuwezi kutula weri shatulilapiti su tushitendi." 24 Su, Dawudi kalififa kulilambu. Shaka sha misambu gwa lyezi kulawira, mfalumi Sauli kalikala pameza kuliya. 25 Handa yaiweriti ntambu yakuyi, mfalumi kalivagiti mshiti shakuyi shashiweriti pakwegera yakuyi kushibambaza. Yonatani kalikala pawalilolana na mfalumi na Abineri walikala pakwegera na mfalumi. Kumbiti pahala pa Dawudi paweriti lupalahera. 26 "Lishaka ali, Sauli katakula ndiri shoseri, tembera kaliholiti kuwera pamonga Dawudi kabatwa na shida ama yomberi pamonga kajimiluwa ndiri kulongolu kwa Mlungu kuwera pamuhera mmusambu agu." 27 Lishaka lya pili, lya misambu gwa lyezi kulawa, pahala pa Dawudi pasigala pahera muntu. Sauli kamkosiya mwana gwakuyi Yonatani, kwa ntambu gaa Dawudi mwana gwa Yese, kiza ndiri kushiboga, "lishu na leru?" 28 Yonatani kankula, "Kanduwiti nentu nimjimiri kagendi Betilehemu. 29 Kang'ambiriti, gunjimiri ng'endi kwa walongu wangu, toziya wankutenda shijungu sha tambiku aku mjini, na mlongu gwangu kanfira ng'endi aku Ndo mana kwahera panu mushiboga sha mfalumi." 30 Panu Sauli kaniti maya kwa Yonatani, kamgambira, "Mwana gwa mdala mjimira ndiri na mkondola gwenga! Nivimana kuwera gulisyagulira mwana gwa Yese kwa Soni zaku gamweni na kumsoniziya mawu gwaku! 31 Hashi, guvimana ndiri handa Dawudi pakawera mkomu, gwenga hapeni gupati lupenu lwa kuwera mfalumi gwa isi ayi? Vinu gugendi gukamjegi panu kwa neni, toziya mpaka kalaguwi." 32 Yonatani kamwankula, "Toziya gaa kalaguwi? Katenda shishi?" 33 Kumbiti Sauli mala kamwasira Yonatani mgoha su kamlagi. Na Yonatani kavimana kuwera tati gwakuyi kaweriti nakaka kafiliti kumlaga Dawudi. 34 Panu Yonatani, agawu pakawera kakalala nentu, kawuka pameza kalongola, pota kuliya shiboga shoseri lishaka ali lya pili lya msambu gwa lyezi kulawa. Yonatani kinginikiti nentu kuusu Dawudi toziya tati gwakuyi kaweriti kamsoniziya. 35 Shirawu yakuyi mandawira, Yonatani kagenditi kulilambu kulii, kuliwona na Dawudi ntambu yawaligambiziyaniti. Wagenda aku na mndemba yumu mpalu. 36 Pakasokiti aku kamgambiriti mndemba gwakuyi ulii, "Gutugi gwakaisakuli misali yanfira kuguma." Mndemba ulii pakaweriti patuga, Yonatani kaguma misali kulongolu kwakuyi. 37 Mndemba ulii pakasokiti pahala payitulukiriti misali, Yonatani kamshema, "Msali gwakulongolu kwaku. 38 Gutendi kalongola na gugoloki hera pahala panu." Mndemba ulii kayisoliti misali na kumgendera mtuwa gwakuyi. 39 Kumbiti mndemba ulii kavimaniti ndiri shoseri kuusu mana ya mlandu agu. Yawavimaniti ndo Yonatani na Dawudi hera. 40 Yonatani kampananiti mndemba ulii vintu vya kulikomangira vyakuyi na kumgambira "Guwuyi kumjini." 41 Katepu mndemba ulii pakawukiti kala, Dawudi kimuka na kulawa pahala pakalififiti pakwegera na shidunda sha mabuwi. Kang'ong'onala pasi kwa ligoya mala ntatu kulongolu kwa Yonatani. Woseri wawili, Dawudi na Yonatani, walikisikirana na kulira. Dawudi kaweriti na hinginika nentu kuliku Yonatani. 42 Shakapanu Yonatani kamgambira Dawudi, "Gugendi kwa ponga. Tulilapa kala woseri kwa litawu lya Mtuwa Mlungu, kuwera Mtuwa Mlungu kalola tutula weri shatulongiti mashaka goseri na pakati pa wiwuka waneni na wiwuka waku mashaka goseri." Dawudi kagoloka na kugenda zakuyi na yomberi Yonatani kawuya kumjini.