1 Kuweriti na muntu yumu gwa likabila lya benjamini litawu lyakuyi Kishi, mwana gwa Abieli mzukulu gwa Zero, mwana gwa Bekorati na mwana gwa Afya, muntu mgangamala na kana makakala. 2 Shakapanu kaweriti na mwana mpalu yawamshemiti Sauli kaweriti mndemba kaherepa, na kwahera muntu muisraeli yakalinganiti na Sauli kwa kuherepa. Sauli kaweriti mtali nentu kuliku muntu muisi ya Israeli, wantu woseri wamshinkuliti mumawega. 3 Lishaka limu, punda gwa Kishi, tati gwakuyi Sauli, wagamiliti. Hangu Kishi kamgambira Sauli, "Gumtoli yumu gwa wantumintumi, gugendi kusakula punda." 4 Wawasakula kumigongu ya Efraimu na enewu lya Shalisha, kumbiti wawawona ndiri aku. Kayi wasoka Shalimu, na aku wawawona ndiri. Wawasakula muisi ya Benjamini, ata hangu wawapata ndiri. 5 Wasokiti muisi ya Sufu, Sauli kamgambiriti ntumintumi gwakuyi, "Tuwuyi ukaya, hera hangu tati gwangu hapenikaleki kuholera punda, na badala yakuyi hakaweri na lyoga na twenga." 6 Ntumintumi Ulii kamgambira, "Guheperi shididini, mji agu kwana muntu gwa Mlungu mweni wampanana nentu ligoya, kila shintu shakatakula shiwera nakaka. Vinu tumgenderi, pamonga kaweza kutugambira mwanja gwetu ntambu yagufira kuwera." 7 Sauli kamkosiya, "Kumbiti patumgendera, hatumpanani shishi? Guloli, shiboga mumihaku yetu ipera na kwahera shoseri sha kumpanana ayu muntu gwa Mlungu. Twana Shishi?" 8 Ntumintumi ulii kamwankula Sauli, "Guloli, neni nana shipandi shididini sha madini ga feza. Hanimpanani muntu ayu gwa Mlungu su katugambili kuusu mwanja gwetu." 9 Pa kwanja Muisraeli handa muntu pakafira kumluwa Mlungu shisoweru, kalongiti, "Yina, gwizi, tugendi kwa mlola. Toziya muntu yakashemwa mbuyi mashaka aga gapititi wamshemiti mlola." 10 Sauli kamwankula, "Ashi ndo shitwatira shiheri, yina, tugendi." Hangu, wagenda kumji yakaweriti kalikala muntu ulii gwa Mlungu. 11 Pawaweriti wankukwena lugongu kugenda kumji, waliwona na wahinga yawaweriti wankugenda kudidibula mashi. Wawakosiyiti wahinga awa, "Hashi, mlola kakumjini?" 12 Wahinga walii wawankula, "Yina, kakulaaku. Kayi kakulongolu kwenu, pamtenda kalongola hamumuwoni. Kingira hera kumjini leru, toziya leru wantu hawalaviyi litambiku pahala poseri. 13 Katepu pamwingira kumjini, hamumuwoni hakenigendi pahala pa kutambikira su kaliyi. Toziya wantu hapeni walii mpaka uti yomberi katekeleri tambiku. Shakapanu walii yawashemiritwi waliii. Hangu mgendi kalongola, hamliwoni na yomberi." 14 Hangu Sauli na ntumintumi gwakuyi wagenditi kumjini. Pawaweriti wakwingira kumjini, wamwoniti Samueli pakalawa kumjini, na kankugenda pahala patambikira.

15 Lishaka pamberi pa lishaka ali, pamberi Sauli hakenisoki kumjini, Mtuwa Mlungu kaweriti kamgambira hangu Samueli. 16 "Shirawu, shaka handa ashi, hanikujegeri muntu kulawa isi ya likabila lya Benjamini, na gwenga hagumtyeremeki lipaki kuwera mkolamlima gwa wantu waneni Israeli. Yomberi hakawalopoli wantu wa neni kulawa kwa Wafilisti, toziya nikuwona kutabika kwa wantu wa neni na mpikinira kulira kwawu kwa kuluwa utanga." 17 Samueli pakamwoniti Sauli, Mtuwa Mlungu kamgambira, "Ayu ndo ulii muntu yanikugambiriti. Yomberi ndo hakawakolimlima wantu wa neni." 18 Panu Sauli kamgendera Samueli yakaweriti pakwegera na ligomi likulu lya mji na kumkosiya, "Nikuluwa gunanguziyi numba ya mlola." 19 Samueli kankula, "Neni ndo namlola. Mlongoleri kugenda pahala pakuguwira toziya leru hamliyi pamuhera na neni. Shirawu mandawira makosiwu goseri gamuweriti naga hanagankuli. 20 Na punda waku walii yawagamiliti mashaka matatu yagapititi, na muwera na lyoga kwajili yawu, wawoneka kala. Kumbiti ndo ga ulii mweni Waisraeli wamfira nentu? Hashi, ndo gwenga nawalongu woseri wa tati gwaku?" 21 Sauli kankula, "Neni ndo gwa likabila lya Benjamini, likabila lididika kuliku makabila goseri ga Israeli. Na makabila goseri ga Benjamini kaya yangu ndo ndidika nakamu. Tambu gaa gung'ambira hangu?" 22 Shakapanu Samueli kamjega Sauli na ntumintumi gwakuyi pamdamu mkulu, kawapanana pahala pa ligoya, kweni wahenga yawashemiluwitwi waweriti walikala. Kuweriti na wahenga selasini. 23 Samueli kamgambira mtereka, "Gujegi seemu ilii yanakupananiti, nikugambiriti guyituli kumbwega." 24 Mtereka ulii kagenda kajega liwondu na seemu ya kumbeli yayiweriti uwega wa kumpindi wa liwondu ali na kuvitula kulongolu kwa Sauli. Samueli ndo kamgambira Sauli, "Guloli shilii shagutuliwitwi, vinu shituluwa kulongolu kwaku. Vinu gulii toziya shituluwa kwajili ya gwenga su gupati kuliya pamuhera na wahenga." 25 Pawawuyiti kumjini kulawa pahala pampindi pakuguwira, Sauli katandikilitwi pahala pa kugonja kumpindi, kagonja aku.

26 Mandawira putiputi, Samueli kamshema Sauli kulawa kulitala. "Gwimuki, su nikupeleki guwuyi ukaya." Sauli kimukiti na woseri wawili, yomberi na Samueli, kawuka na kugenda kunjira. 27 Pawasokiti upeleru wa mji, Samueli kamgambira Sauli, "Gumgambiri ntumintumi gwa kalongoleri." Ntumintumi pakawukiti kala, Samueli kendereya kulonga, "Guheperi shididini na neni hanikugambiri galii gakalongiti Mlungu."