1 Shakapanu, wantu wa Kiriati Yearimu wagenda na kulitola Lisandiku lya Mtuwa Mlungu, walijega ukaya kwa Abinadabu, yakalikaliti kumigongu. Wamlumika mwana gwakuyi mpalu yawamshemiti Eleazari su kaliloleri Lisandiku ali.

2 Kwanjira Lisandiku lya Mtuwa Mlungu lijegwi kumjini Kiriati Yearimu shaka shitali shipititi, handa mivinja ishilini hangu. Shaka ashi Waisraeli woseri wamliliriti Mtuwa Mlungu. 3 Samueli kawagambira Waisraeli, "Handa mwankumuwuyira Mtuwa Mlungu kwa moyu gwenu goseri, ndo mpaka muwusiyi pakati penu wamlungu wa shihenga na vinyagu vya Ashitaroti mmugenderi Mtuwa Mlungu kwa moyu goseri, na kumtendera yomberi gweka yakuyi na yomberi hakawalopoli kulawa muukolamlima na Wafilisti, wamtenderi Mtuwa Mlungu gweka yakuyi." 4 Hangu, Waisraeli wasira kutali vinyagu vya Mabaali na Maashitaroti, wamtendera Mtuwa Mlungu gweka yakuyi. 5 Samueli kalonga, "Guwajojoniri Waisraeli woseri aku Mizipa, niwaluwiri kwa Mtuwa Mlungu." 6 Hangu, Waisraeli woseri wajojonika aku Mizipa. Wadidibula mashi na kugamiminira Kulongolu kwa Mtuwa Mlungu handa tambika, woya kuliya lishaka lilii lyoseri na kulonga, "Tutenda Vidoda kulongolu kwa Mtuwa Mlungu." Samueli kaweriti mtoza gwa Waisraeli aku Mizipa. 7 Shaka Wafilisti pawapikiniriti kuwera Waisraeli wajojonika aku Mizipa, wakulu wamhanu wa Wafilisti wagenda kuwakomanga. Waisraeli pawapikiniriti mlandu agu wawatiriti Wafilisti. 8 Su, wamgambira Samueli, "Naguleka kumlilira Mtuwa Mlungu, Mlungu gwetu, kwajili ya twenga. Su katulopuziyi kulawa kwa Wafilisti." 9 Hangu Samueli katoliti mwana kondolu yakonka kamlavilira Mtuwa Mlungu tambiku ya kuluguziwa nakamu. Shakapanu Samueli kamlilira Mtuwa Mlungu kwajili ya Israeli, na yomberi kankula kuluwa kwawu. 10 Samueli Pakaweriti kankulaviya tambiku ilii ya kulunguziya, Wafilisti wasegeleriti kuwakomanga Waisraeli. Kumbiti lishaka ali Mtuwa Mlungu kalaviya liziwu likulu lya kulindimira kwa Wafilisti na kuwavuluvusiya na kuwapalasiya Wafilisti, na womberi wawingwa kulongolu kwa Waisraeli. 11 Waisraeli walawiti Mizipa na kuwafata Wafilisti mpaka pakwegera na mji gwa Beti Kari, wawalaga. 12 Shakapanu, Samueli katoliti libuwi na kuligolisiya pakati pa mizipa na Sheni, kalishema libuwi lilii Ebenezeri ina mana, "Mtuwa Mlungu katutanga mpaka vinu." 13 Lishaka ali Wafilisti wasinditi na Mtuwa Mlungu kawalewelera Wafilisti kuyikangala isi ya Israeli shaka shoseri Samueli pakaweriti mkomu. 14 Miji yoseri ya Waisraeli yeni Wafilisti wayilopoliti pakati pa Ekroni na Gati iwuziwitwi kwa Waisraeli, na womberi wayikombola isi yawu kulawa kwa Wafilisti. Viraa kuweriti na ponga pakati pa Waisraeli na Waamori. 15 Samueli kendereyiti kuwera mkolamlima gwa Israeli mashaka gakuyi goseri ga ukomu. 16 Kila shinja Samueli katyangiliti Beteli na Giligali na Mizipa na kuwamulira mirandu yawu Waisraeli mumiji ayi yoseri. 17 Shakapanu, kaweriti pakawuya Rama, toziya aku kuweriti ukaya kwakuyi, kawamliriti Waisraeli mirandu yawu aku na kumnyawira Mtuwa Mlungu shitalawanda sha kutambikira.