1 Dawudi kalitakulira mweni, "Lishaka limu, Sauli hakantagi. Mlandu mheri kwa neni ndo kutugira muisi ya Wafilisti. Sauli hakatwezuki kunsakula mngati mwa mumbaka za isi ya Israeli na neni haweri mboneki." 2 Hangu, Dawudi na wantu wakuyi miya sita wagenda kwa Akishi mwana gwa Maoki, mfalumi gwa Gati. 3 Dawudi na wantu wakuyi pamuhera na walongu wakuyi walikala na Akishi aku Gati. Dawudi kaweriti na wadala wawili. Ahinoamu kulawa Yezireeli na Abigaili mdala mkenja gwa Nabali kulawa mji gwa Karimeli. 4 Sauli pakapikiniriti handa Dawudi katugira Gati, kamfata ndiri kayi.

5 Lishaka limu, Dawudi kamgambira Akishi, "Handa pagunjimilira nikuluwa gumpanani mji gumu muisi mwaku su guweri pahala pa neni pa kulikala. Kwahera toziya kwa neni kulikala na gwenga mumji agu yagulikala gwenga mfalumi." 6 Lishaka ali, Akishi kampanana mji gwa Sikilagi. Hangu, kwanjira lishaka ali mji gwa Sikilagi guweriti gwa wafalumi wa Yuda.

7 Dawudi kalikaliti muisi ya Wafilisti kwa shinja shimu na miezi msheshi. 8 Mulishaka ali, Dawudi na wantu wakuyi wawakomangiti Wageshuri na Wagirizi na Waamaleki, weni waweriti wenikaya wa isi ayi kwanjira makashu. Wawakomangiti muisi yawu mpaka Shuri, mumbaka na Misri. 9 Dawudi kapakomangiti mji agu kamleka ndiri mkomu muntu yoseri, kaweri mpalu ama mdala, kalopola kondolu na ng'ombi na punda na ngamiya na nguwu, shakapanu kawuya na kusoka kwa Akishi. 10 Akishi pakamkosiyiti Dawudi, "Leru makomangu gaku gaweriti kwa ashina gaa?" Dawudi kampayira kwa kamgambira, "Enewu lya kusika ya Yuda ama kusika ya Wayerameeli ama Kusika ya isi yawalikala Wakeni." 11 Dawudi kamleka ndiri muntu yoseri mkomu kaweri mpalu ama mdala su kajeguwi Gati, kalitakulira mweni, "Waweza kutakulira kwa twenga na kulonga, Dawudi katenda shitendu ashi na shilii." Hangu ndo Dawudi ntambu yakazoweleriti kutenda shaka shoseri pakalikaliti muisi ya Wafilisti. 12 Hangu, Akishi kamjimiriti Dawudi, pakahowa, "Wanalushi wayaguwi Waisraeli wamfira ndiri nakamu, hangu, hakantenderi makaliru gakuyi goseri."