1 Mtuwa Mlungu kamgambira Samueli, "Hagumliliri Sauli mpaka ndii? Gwenga guvimana kuwera neni nimulema kuwera mfalumi kwa Israeli. Vinu gutoli lipaki gumemiziyi ligoli, guwuki. Hanikulagaliri kwa Yese gwa mji gwa Betilehemu. Toziya nilipanana mfalumi muwamu mwa wana wakuyi." 2 Samueli kalonga, "hambezi hashi kugenda? Handa Sauli pakapikinira visoweru avi, hakantagi!" Mtuwa Mlungu kamgambira, "Gutoli ng'ombi shidala hakeni leri pamuhera na gwenga na pagusoka gulongi, niza kumlavilira Mtuwa Mlungu tambiku. 3 Gumshemeri Yese kutambiku ayi na neni hanikulanguziyi sha kutenda. Hagumswagi lipaki kwajili ya neni muntu ulii yanikukantiliti." 4 Samueli katenda ntambu yakagambiziwitwi na Mtuwa Mlungu, kagenda Betilehemu. Wazewi wa mji walawa kumwanka pawawera wankulendemera, wamkosiya, "Hashi, gwiza kwa ponga?" 5 Samueli kawagambira, "Niza kwa ponga. Niza kumlavilira tambiku Mtuwa Mlungu. Mlipungi maweni shakapanu tugendi kulaviya tambiku." Ntambu iraa Samueli kamgambira Yese pamuhera na wana wakuyi na kawashemera kutambiku. 6 Pawasokiti, na Samueli pakamwoniti Eliabu, kalitakuziyiti mumoyu mwakuyi, "Nakaka, mswagwa lipaki gwa Mtuwa Mlungu ndo ayu kakulongolu kwa Mtuwa Mlungu!" 7 Kumbiti Mtuwa Mlungu kamgambiriti Samueli, "Nagulola sheni shakuyi na utali wakuyi. Neni nimulema toziya ndola ndiri ntambu ya kalola muntu. Muntu kalola kwa kunja, kumbiti neni ndola kumoyu." 8 Shakapanu, Yese kamshema mwana gwakuyi Abinadabu na kumjega kulongolu kwa Samueli. Kumbiti Samueli kalonga, "Ndala ayu kasyagulwa ndiri na Mtuwa Mlungu." 9 Yese kamjega Shama. Samueli kalonga, "Ndala ayu kasyaguluwa ndiri na Mtuwa Mlungu." 10 Yese pakawapitiziyiti wana wakuyi woseri saba kulongolu kwa Samueli kumbiti Samueli kawagambira, "Mtuwa Mlungu kamsyagula ndiri yoseri pakati pa awa." 11 Shakapanu kamgambira, "Hashi, wanawaku woseri wapanu?" Yese kankula, "Kankali yumu mpusu, kumbiti kagenda kulolera kondolu." Samueli kamgambira, "Gumlagaliri muntu kamjegi, twenga hapeni tulikali pasi kuliya, mpaka pakiza panu." 12 Hangu, Yese kamlagalira muntu, kagendi kumshema na kamjega mntemba ulii yakaweriti kana nshimba, kana masu galangala na gakufiriziya. Mtuwa Mlungu kamgambira Samueli, "Yinaa, ayu ndo mweni, gugoloki gumswagi lipaki." 13 Samueli katola ligoli lyakuyi lilii. Kamswaga lipaki kulongolu kwa walongu wakuyi katepu rohu ya Mtuwa Mlungu imwizira Dawudi kwa likakala, ilikala kwanjira lishaka lilii na kwendeleya. Shakapanu Samueli kawuyu kumjini Rama.

14 Shakapanu rohu ya Mtuwa Mlungu imleka Sauli na rohu kontola kuyilagaliritwi na Mtuwa Mlungu yanja kumgaziya. 15 Wantumintumi wakuyi Sauli wamgambira, "Tuvimana handa rohu kontola yayilagaliritwi na Mlungu ikugaziya. 16 Vinu, gwee mtuwa gwetu, guwagambiziyi wantumintumi waku yawakutendera wamsakuli muntu yakavimana kugomba shinubi na rohu ayi ya ukontola payikwizira muntu ayu hakagombi lugombugombu na gwenga haguweri mbaka." 17 Sauli kawagambira wantumintumi wakuyi, "Munsakuliri muntu yakaweza kugomba lugombugombu weri, munjegeri." 18 Mntemba yumu gwa wantumintumi wakuyi kalonga, "Nimwona mntemba yumu gwa Yese, gwa mji gwa Betilehemu. Mntemba ayu kamana kugomba lugombugombu. Mntemba ayu ndo shikambaku, kagangamala kwa kulikomanga kunkondu, kana luhala mukulonga na kaherepa nentu, Mtuwa Mlungu kapamuhera na yomberi." 19 Hangu, Sauli kamtumiti muntu kwa Yese na kulonga, "Gunjegeri mwana gwaku Dawudi, mweni kankulolera kondolu." 20 Yese kamtuma Dawudi kwa Sauli pamuhera na punda yakajegiti mabumunda, mhaku gwa likuli yaguweriti na divayi na kondolu na mbuzi. 21 Dawudi pakasokiti kanja kumtendera Sauli. Sauli kamfiriti nentu, ata kamtenda yakamjegera vintu vya kulikomangira kunkondu. 22 Sahakapanu Sauli kamtuma muntu kwa Yese na kulonga, "Nimfira Dawudi, gumleki kalikali panu kantenderi." 23 Kila mala, rohu ulii mkontola yayilagalirwa na Mlungu pakamwiziliti Sauli, Dawudi katoliti shinubi shakuyi na kwanja kugomba na rohu ayu kamleka Sauli na yomberi kalekiziwa na kuwera mbaka.