1 Shaka ashi Wafilisti wajojoniliti mashonta gawu aku Soku, mji yaguwera Muyuda, wawera kala kwa nkondu. Wanyawiti ng'onjeru zawu seemu yimu wayishema Efesi Damimu pakati pa Soku na Azeka. 2 Sauli pamuhera na Waisraeli walijojoniriti na kunyawa ng'onjeru kushidunda shashilola mululalanda lwa Ela. Walitula kala kwa kulikomanga na Wafilisti. 3 Wafilisti wagolokiti mlugongu uwega wumu na Waisraeli wagolokiti kulugongu uwega umonga, pakati pawu kuweriti na libokera. 4 Kulawa kulugonjeru lwa Wafilisti, kalilaviyiti shikambaku yumu yawamshema Goliyati, mwenikaya gwa mji gwa Gati. Utali wakuyi uweriti handa mita ntatu. 5 Pamtuyi kavaliti kofia ya shaba na likoti lyalinyawitwi kwa shaba pashifuwa shana utopa wa kilu amusini na saba. 6 Magulu gakuyi viraa gaweriti na shinga ya shaba na mumawega gakuyi kapapiti mgowa gwa shaba. 7 Mhanya gwa mgoha gwakuyi guweriti handa mtera gwa mtugambewa na mtuwi gwa mgoha agu, guweriti na kilu saba ngawu yakuyi ijegitwi na muntu gwingi yakamlongoleriti. 8 Goliyati kagolokiti na kuwabotangira wamashonta wa israeli, pakalonga, "Mwankutenda shishi panu? Hashi mwiza kulikomanga nkondu? Neni ndo Mfilisti, mwenga ndo wamanda wa Sauli. Msyaguli muntu yumu gwenu kizi kulikomanga na neni. 9 Handa pakalikomanga na neni pakankanga na kuntaga, twenga hatuweri wamanda wenu. Kumbiti panimkanka na kumlaga su, mwenga hamuweri wamanda wa twenga na kututendera." 10 Shakapanu Mfilisti ulii kendereyiti kulonga kwa kulitumba, "Niwafira wamashonta wa Israeli leru kumlaviya muntu yumu kizi kulimkomanga na neni." 11 Sauli pamuhera na wamashonta woseri wa Israeli pawavipikiniriti visoweru avi vya Mfilisti ayu, winginikiti na kutira nentu.

12 Dawudi kaweriti mwana gwa Yese, lukolu lwa Efrati kulawa Betilehemu Muyuda. Yese kaweriti na wana wanani wapalu. Shaka ashi Sauli pakaweriti mfalumi, Yese kaweriti kala mzewi, muntu kana vinja vivuwa. 13 Wana wakulu watatu wa Yese, Eliabu mwiwuka gwa kwanja, Abinadabu yakafatiti na Shama gwa tatu, yawaweriti wagenda pamuhera na Sauli mnkondu. 14 Dawudi kaweriti ndo mdidika gwa woseri. Wana walii watatu wakulu waweriti wagenda na Sauli. 15 Tembera Dawudi mala kwa mala kagenditi kwa Sauli, kumbiti kawuyiti ukaya Betilehemu kulolera kondolu wa tati gwakuyi.

16 Kwa mashaka alubayini, mandawira na pamiyi, Mfilisti ulii Goliyati kalilaviyiti paweru, kagoloka na kuwajongera wamashonta wa Israeli.

17 Lishaka limu, Yese kamgambiriti mwana gwakuyi Dawudi, "Guwajegeri wakulu waku ntutu kilu lilongu na mabumunda lilongu. Guwajegeri kalongola aku kung'onjeru. 18 Na mkulu gwawu ulii gwa shipinga sha wamashonta elufu gumjegeri vipandi vya samuli yayiyumizitwi. Kawaloli wakaka waku handa wendeleya weri na shakapanu gunjegeri visoweru vyawu." 19 Shaka ashi mfalumi Sauli, wakulu wakuyi Dawudi na wamashonta woseri wa Israeli waweriti kululalanda lwa Ela, wankulikomanga na Wafilisti.

20 Shirawu yakuyi, Dawudi kimukiti mandawira putiputi, na kondolu kamlekera muntu gwingi kawaloleri. Katoliti shiboga na kugenda ntambu yakalagaliritwi na tati gwakuyi Yese. Pakasokiti kung'onjeru ya Waisraeli, wawoniti wankulipanga kuseemu yawu ya nkondu na wankushowangana umatu wa nkondu. 21 Mashonta ga Waisraeli na ga Wafilisti walipangiti kala kulikomanga nkondu, pawalilolana, 22 Dawudi kampananiti shiboga muntu yakatuliti weri visanka, kawatugira wamashonta, kagenda kwa walongu wakuyi na kawalamusiya. 23 Pakaweriti kankuyowera na womberi, Goliyati ulii mgangamala gwa Wafilisti kulawa Gati kalilaviya kumbeli kwa wamashonta wa Israeli ntambu yakazoweleriti. Na Dawudi kampikinira weri. 24 Waisraeli pawamwoniti Goliyati, wamtiriti na kutuga. 25 Waligambirana, "Hashi, mmumwona muntu ulii yakalilaviyiti? Ama nakaka, kalilaviya kuwajongera Waisraeli. Mfalumi Sauli kalonga muntu yoseri yakamlagi muntu ayu hanimpanani ulunda uvuwa. Nentu ya goseri, hakamyugiziyi mhinga gwakuyi. Kayi, wantu wa walongu wa tati gwakuyi hawaweri lekeru, Hapeni walipi kodi."

26 Dawudi kawakosiya walii yawaweriti pakwegera na yomberi, "Hashi, muntu yakamlaga Mfilisti ayu na kuyikombola Israeli kulawirana na soni ayi hakatenderwi shishi? Mfilisti ayu yakingiziwa ndiri jandu kaliwona ndo gaa mpaka kagahigiranga mashonta ga Mlungu yakawera mkomu?" 27 "Wantu wamgambira Dawudi ntambu yawatakuliti pakwanja galii hakatenderwi muntu yakamlaga Goliyati."

28 Kumbiti Eliyabu, kaka mkulu gwa Dawudi pakampikiniriti Dawudi pakayowera na wantu, kamkalalira Dawudi, kalonga, "Ntambu gaa gwiza? Hashi, wakondolu wadidini gumlekera gaa kundundu kulii? Nugumana mtiti gwaku na ukondola waku. Gwiza hera kulola nkondu."

29 Dawudi kamwankula, "Vinu ntenda shishi? Hashi, meza ndiri ata kukosiya?" 30 Dawudi kamgalambukira muntu gwingi kamkosiya likosiyu liraali; na kila pakakosiyiti, kapata shisoweru shiraashi.

31 Wantu tunga weni wampikiniriti Dawudi ntambu yakalongiti, wagenditi kumgambira Sauli. Na Sauli kalagalira wamshemi. 32 Dawudi kamgambira Sauli, Muntu yoseri nakatiriziwa mumoyu mwakuyi na "Mfilisti ayu. Neni ntumintumi gwaku hang'endi kulikomanga na yomberi." 33 Sauli kamgambira Dawudi, "Gwenga guweza ndiri kulikomanga na Mfilisti ulii. Gwenga ndo mndemba hera, kumbiti muntu ayu kaweriti kulikomanga mnkondu kwanjira untemba wakuyi." 34 Dawudi kalonga, "Neni ntumintumi gwaku nzowelera kulolera kondolu wa tati gwangu. Kila shaka simba ama dubu pakiza na kukamla mwanakondolu 35 neni nimfata na kumkomanga, nimlopola mwanakondolu mmulomu mwakuyi. Handa simba ama dubu pakankangala, neni nimkola ndevu zakuyi, nimgusiya na kumlaga. 36 Neni ntumintumi gwaku ndaga kala simba wavuwa na dubu wavuwa. Vinu, ata Mfilisti uli yakingiziwa ndiri jandu, mweni kagigiranga mashonta wa Mlungu yakawera mkomu, hakaweri handa awa. 37 Mtuwa Mlungu mweni kanopuziya mndoli mwa simba na dubu, hakanopoli kulawa kwa Mfilisti ayu." Sauli kamgambira, "Gugendi na Mtuwa Mlungu kaweri pamuhera na gwenga." 38 Sauli katola nguwu zakuyi za nkondu kamvalasiya Dawudi, kamvalasiya kofia yakuyi ya shaba kumtuwi gwakuyi na likoti lya kulishinga pashifuwa. 39 Dawudi kalitawa ligumba lya Sauli, kajera kutyanga, kumbiti kasinda toziya kazowelera ndiri mavalu handa aga. Kamgambira Sauli, "Meza ndiri kugenda kunkondu pawera nvala mavalu aga, toziya neni haneni zoweleri." Kwa aga, kugavula. 40 Dawudi katola fimbu yakuyi mmawoku, kalisyagulira mabuwi mhanu gaherepa kulawa kulushemba, kagalekera mumuhaku gwakuyi gwa kulololera. Vombelo lyakuyi liweriti kala mumawoku mwakuyi, kanja kumgendera Goliyati Mfilisti.

41 Mfilisti ulii, yomberi kanja kumgendera Dawudi, na ulii yakatoliti ngawu yakuyi pakawera kulongolu kwakuyi. 42 Mfilisti ulii pakaloliti na kumwona weri Dawudi, kamzalawu, toziya Dawudi kaweriti mntemba hera, kana nshimba na gwa kufiriziya. 43 Goliyati kamgosiya Dawudi, "Vinu, fimbu ayu ndo ya shishi? Guhola neni ndo ng'ang'a ata gunizili kwa fimbu?" Goliyati kampangira Dawudi kwa wamlungu wakuyi wa Shifilisti. 44 Mfilisti kamgambira Dawudi, "Gwizi kwa neni! Nshimba yaku haniwapanani wampongu wa kuliyera na wankanyama wa kuntundu!"

45 Kumbiti Dawudi kamgambira Goliyati, "Gwenga gunizira kwa ligumba, mgoha na shimagi shikulu shikola kuwili. Kumbiti neni nikwizira kwa litawu lya Mtuwa Mlungu kana likakala, Mlungu kana likakala gwa israeli, mweni gwenga gumwigira. 46 Lishaka lya leru, Mtuwa Mlungu hakakutuli mmakakala mwangu. Hanikugusiyi pasi, hanikulikituli mtuwi gwaku na nshimba za wamashonta wa Wafilisti haniwapanani wampongu wa kuliyera na wankanyama wa kuntundu. Ndo pasipanu poseri hapamani kuwera kwana Mlungu Muisraeli. 47 Wantu woseri yawajojonikiti panu leru, hawamani kuwera Mtuwa Mlungu kafira ndiri mgoha pota shimagi shikulu shikola kuwili. Ayi ndo nkondu ya Mtuwa Mlungu na yomberi hakawatendi tuwakanki."

48 Goliyati kanja kayi kumgendera Dawudi. Dawudi katuga mbiru kugenda kulikomanga na Goliyati. 49 Katula liwoku lyakuyi mmuhaku mwakuyi, kalaviya libuwi limu, kaliguma na vombelo lyakuyi, kamguma nali Goliyati na kupena mnkati mwa sheni shakuyi, libuwi lipanditi sheni sha Goliyati na kupena mkati. Goliyati kaguwa pasi makukama. 50 Hangu ndo ntambu Dawudi kamkankiti Goliyati kwa vombelo lyakuyi na libuwi. Dawudi kaweriti ndiri na ligumba lyoseri mumawoku mwakuyi. 51 Su, kagenda mbiru, kagoloka pampindi pa Goliyati na kasomola ligumba lya Goliyati mumhaku gwakuyi na kulikitula mtuwi gwakuyi. Wafilisti pawawoniti kuwera shikambaku gwawu kalaguwa, watira na kutuga mbiru. 52 Ndo wantu wa israeli na wantu wa Yuda, pawanjiti kushowangana kwa ukanka, wawafata Wafilisti mpaka Gati, kuligomi likulu lya Ekroni, ata Wafilisti yawalagitwi kukondu wamemiti mnjira kwanjira Shaarimu mpaka Gati na Ekroni. 53 Waisraeli pawawuyiti kuwafata Wafilisti, walopuliti ng'onjeru za Wafilisti. 54 Dawudi kagutoliti mtuwi gwa Goliyati ulii, Mfilisti, kagujega mjini Yerusalemu. Kumbiti vintu vya kulikomangira vya Goliyati kavitula mulilingu lyakuyi.

55 Sauli pakamwoniti Dawudi kagenda kumsegelera Mfilisti ulii Goliyati, kamkosiya Abineri, mkulu gwa shonta lyakuyi, "Abineri, ayu mndemba gwa gaa?" Abineri kankula, "Mfalumi, ntambu yagulikala, neni nivimana ndiri." 56 Mfalumi Sauli kamgambira, "Su, gumkosiyi yomberi ntemba gwa gaa."

57 Katepu hera Dawudi pakawuyiti kulugonjeru pa kumlaga Goliyati, Abineri kamtoliti na kumjega kwa Sauli. Shaka ashi Dawudi kaweriti kakali kankujega mtuwi gwa Goliyati mumawuku mwakuyi. 58 Sauli kamkosiya Dawudi, "Mndemba, gwenga ndo mwana gwa gaa?" Dawudi kankula, "Neni ndo mwana gwa ntumintumi gwaku Yese, kulawa Betilehemu."