1 Shakapanu Hana kaluwiti pakalonga.

"Nimnemelera Mtuwa Mlungu mumoyu mwangu.

Nimkwisa Mtuwa Mlungu toziya yomberi ndo likakala lyangu.

Niwaseka wankondu wangu!

Toziya niwunemelera ukanka wangu wagumpananiti."

2 "Kwahera yakawera mnanagala handa Mtuwa Mlungu,

kwahera yoseri yakawera handa yomberi,

Kwahera Yakawera mlolera handa Mlungu gwetu.

3 Mleki kulizyuma,

mleki kulonga visoweru vidoda.

Toziya yakavimana Mtuwa Mlungu.

Yomberi kagatoza matendu gawu goseri.

4 Mbindi za wana likakala zimegeka.

Kumbiti yawahera likakala wendereya kongereka likakala.

5 Walii makashu waweriti na shiboga shivuwa,

vinu watenda shibaluwa su wapati shiboga.

Kumbiti yawaweriti na njala.

Vinu wahera njala kayi,

Mdala mbendi kalera wana wavuwa,

kumbiti mawu yakana wana wavuwa,

vinu wamleka pota mwana.

6 Mtuwa Mlungu kalaga na kuzyukisiya,

yomberi kawasulusiya kuisi ya wahowiti

na yomberi kawawuziya kayi.

7 Mtuwa Mlungu kawatenda wamu waweri wahushu,

na wamu wawu walunda. Wamonga kawasulusiya,

na wamonga kawakweniziya.

8 Kawanyasula wahushu kulawa mumadikudiku,

kuwakweniziya wananfiru kulawa mmalivu, Kawakalaziya pamuhera na wakulu.

Na kuwatula pahala pa ligoya,

toziya migeleri ya pasipanu ndo Mtuwa Mlungu,

na pampindi pampanda azi kapatula pasipanu."

9 "Yomberi kagalolera makaliru ga wantu wakuyi wananagala.

Kumbiti makaliru ga wankondu kagalemera kutali kuluwindu. Toziya,

muntu kapata ndiri ukanka kwa makakala gakuyi.

10 Wankondu wa Mtuwa Mlungu hawamegangwi vipandi vipandi,

Hakawawungulumiri womberi handa lupanda kulawa kumpindi.

Mtuwa Mlungu hakapatozi pasi panu poseri,

na yomberi hakampanani likakala mfalumi gwakuyi hakamtenderi

na hakaukulaziyi uwezu wa msyagula gwakuyi."

11 Shakapanu, Elikana kawuya ukaya Rama. Kumbiti mwana Samueli kasigala Shilu kumtendera Mtuwa Mlungu pasi pa ulonguziya wa mtambika Eli.

12 Wana wapalu wa Eli waweriti wakontola. Wamjimira ndiri Mtuwa Mlungu, 13 ama kwa vintu vyeni wantu vyawafiruwitwi kuwapanana watambika. Kila mala muntu pakaweriti kankumlavilira tambiku yakuyi, ntumintumi gwa mtambika kiziti na kolewu ya menu matatu, na shaka shinofu pashiwera shankutokota, 14 ntumintumi ayu kayisoma kolewu ayi mngati mushiwiga, shinofu shoseri shanashilawi amu kwa shikolewu ashi, shiweriti sha mtambika. Waisraeli woseri yawagenditi Shilu kulaviya tambiku zawu watenditwi ntambu ayi. 15 Kumbiti, ata pamberi lipaki halyeni lunguziwi, ntumintumi gwa mtambika kiza na kumgambira muntu ulii yakalaviya tambiku, "Gumulaviliri mtambika shinofu sha kubanika toziya yomberi hapeni kanki shinofu shaku shakupwasiya, ila yayiwera mbisi."

16 Na handa muntu ayu pakanankula, "Guheperi uti noshii lipaki shakapanu hagutoli shiyasi shoseri shagufira," su ntumintumi gwa mtambika hakankuli, "Nema gunupi ulavinu! Pagulema hantoli kwa makakala!"

17 Vidoda avi vya wantemba awa wa Eli viweriti vikulu nentu kulongolu kwa Mtuwa Mlungu. Toziya wantemba awa wagatenderiti ndiri ligoya malaviwu ga Mtuwa Mlungu.

18 Shaka ashi, mntemba Samueli kendereyiti kumtendera Mtuwa Mlungu, pakawera kavala nguwu nfunfu ya gweka yakumtendera Mtuwa Mlungu. 19 Kila shinja mawu gwakuyi kamfumiliti lihabiti lididika na kumjegera pakaweriti kankugenda na mpalu gwakuyi kulaviya tambiku ya kila shinja. 20 Eli kawatekeleriti Elikana na mdala gwakuyi, pakalonga, "Mtuwa Mlungu na kakupanani gwenga Elikana wana wamonga kwa mdala ayu su watoli pahala pa ulii yakampananiti Mtuwa Mlungu"

Shakapanu womberi wawuya ukaya.

21 Mtuwa Mlungu kamwoneriti lusungu Hana na yomberi kampanana wana wapalu watatu na wahinga wawili. Mwana Samueli kendereya kukula kulongolu kwa Mtuwa Mlungu.

22 Shaka ashi Eli kaweriti mzewi nentu. Pakapikiniriti goseri geni wana wakuyi wapalu weriti wankuwatendera Waisraeli, na ntambu yaweriti wagonjiti na wadala yawaweriti wankutendera kuligomi lya Liringu Linanagala. 23 Kawakosiyi, "Hashi mtenda vitwatira avi? Mpikinira kulawa kwa wantu woseri vidoda vyamvitenda. 24 Namtenda hangu wana wangu, toziya vitwatira avi vyampikiniriti kulawa kwa wantu wa Mtuwa Mlungu kwa mwenga ndo madoda. 25 Muntu pakamtendera vidoda myaguyi, Mlungu kaweza kumlekiziya. Kumbiti muntu pakamtendera vidoda Mtuwa Mlungu gaa yakaweza kumluwira kwa Mlungu?"

Kumbiti wana wakuyi wampikinira ndiri tati gwawu, toziya Mtuwa Mlungu kaweriti kafiliti kuwalaga.

26 Mwana Samueli kandereya kukula, kandereya kufiruwa na Mtuwa Mlungu na wantu.

27 Lishaka limu, mbuyi gwa Mlungu kamgendera Eli, kamgambira, "Mtuwa Mlungu kalonga hangu, nilimanaziyiti kwa kaya ya Aruni, wazewi waku, pawaweriti wamanda wa Farao muisi ya Misri. 28 Pakati pa makabila goseri ga Israeli nimsyaguliti Aruni na walongu wakuyi kuwera mtambika gwangu, wantenderi pashitalawanda, watumiziyi ubani na kuvala nguwu ya kugibiki pashifuwa kulongolu kwaneni niwapanani walongu wa wazewi waku tambika zyangu zyeni Waisraeli wandaviliti kwa motu. 29 Ntambu gaa su, guziwonera weya tambiku zyanuwagambiziyiti wantu wanjegeri? Gwenga guwafira wana waku kuliku neni kwa kulinenepiziya maweni mwenga kwa kuliya seemu ziherepa za tambiku zyeni wantu wa neni wa Israeli wandavilira! 30 Hangu, Mtuwa Mlungu, Mlungu gwa Israeli, kalonga hangu, ntakuliti handa kaya yaku na kaya ya wazewi waku hamwizi kulongolu kwa neni kuntendera mashaka goseri. Kumbiti vinu Mtuwa Mlungu kakubwelera hangu, mlandu agu guweri kutali na neni. Haniwapanani ligoya yawampanana ligoya na walii yawampanana ndiri ligoya haniwapanani ndiri ligoya. 31 Guloli mashaka gakwiza hanikulagi gwenga na wantemba waku woseri wapalu muwalongu waku na mulukolu lwaku, ata hapeni kuweri na mpalu yoseri hakalikali kaweri mzewi nentu. 32 Haguweri na lyoga na haguwawoneri wayagu weya kwa ntekelera zaniwapanani wantu wa Israeli kumbiti kwahera muntu muwalongu waku hakalikali na kuwera Mzewi nentu. 33 Muntu gwaku mweni hapeni numlemi kulawa pashitalawanda shangu hakaweri kaponeka su hanimtosoli masu gakuyi, na yomberi hakatwezuki na walera waku hawalaguwi pota lusungu. 34 Na lyalifirakuwapata wana waku wawili wapalu, Hofini na Finehasi, ndo ali woseri wawili hawahowi lishaka limu. Ali haliweri ndo lilangaliru kwaku. 35 Shakapanu, hanilisyaguliri mtambika gwingi mwaminika yakafira kutenda kulinganira na galii ganimfira katendi. Hanimpanani wiwuka weni hawatenderwi mashaka goseri kulongolu kwa mfalumi yanimsyaguliti. 36 Yoseri yakasigala muwiwuka waku hakamgenderi mtambika ayu na kumluwa shipandi sha mpiya ama libumunda, na kumgambira, na kuluwa kajimiluwi kapananwa lihengu lya kuwatanga watambika, su mezi kupata shiboga sha kuliya."