1 Pa Wafilisti kulitola kwa makakala Lisandiku lya Mlungu, walipapiti kulawa mji Ebenezeri mpaka mji gwawu gwa Ashidodi. 2 Shakapanu wajega Lisandiku lya Mlungu kunumba ya mlungu gwawu Dagoni na kulitula pakwegera na yomberi. 3 Shirawu yakuyi mandawira, wantu wa mji gwa Ashidodi pawimukiti wawoniti shinyagu sha Dagoni shiguwa makukama kulongolu kwa Lisandiku lya Mlungu. Washigolosiya kayi shinyagu sha Dagoni na kushitula kayi pahala pakuyi. 4 Kumbiti, shirawu yakuyi pawimukiti, wawoniti kuwera shinyagu sha Dagoni shiguwa makukama kulongolu kulisandiku lya Mtuwa Mlungu, mtuyi, magulu na mawoku ga shinyagu ashi, vyoseri viweriti vidumuka, viwera vigonja pasi pa pashizingiti sha ligomi. Nshimba yakuyi ndo yayiweriti isigala. 5 Toziya watambika wa Dagoni na woseri yawagenda Ashidodi, pawingira kumguwira Dagoni watimba ndiri shizingiti sha numba ya Dagoni mpaka leru. 6 Mtuwa Mlungu kawajegera makomangu nentu na kuwatiriziya wantu wa Ashidodi. Kawakomanga, ata na wantu yawaweriti wapakwegera nawa, kwa kuwajegera ulweri wa malipu. 7 Wenikaya wa Ashidodi pawawoniti mirandu yayiwapatiti, walonga, "Mlungu gwa Israeli Katukomanga nentu twenga pamuhera na mlungu gwetu Dagoni. Lisandiku lya Lipatanu lya Mtuwa Mlungu hapeni liwezi kulikala kwa twenga" 8 Watumiti walagilagi na kuwajojonira walonguziya woseri wamuhanu wa Wafilisti na kuwakosiya, "Hatutendi hashi na Lisandiku ali lya Mlungu gwa Israeli?" Wakulu wawu wankula, "Lisandiku ali lya Mlungu gwa Israeli mlijegeri Gati." Su walijegera aku. 9 Kumbiti pa kulijega aku Gati, Mtuwa Mlungu kagukomanga mji agu, pakajega lyoga likulu kumjini na kawakomanga wapalu wa mji agu wantemba kwa wazewi, kwa kuwajegera malipu. 10 Su, walijega Lisandiku ali lya Mlungu kumji gwa Ekroni. Kumbiti Lisandiku ali lya Mlungu palisokiti aku, wantu wa mji agu washowanganiti, "Watujegera Lisandiku lya Mlungu gwa Israeli su kutulaga twenga twawoseri." 11 Shakapanu walagalira ulagilagi na kujojonira wakulu wa Wafiristi na kuwagambira, "Mliwuziyi Lisandiku lya Mlungu gwa Israeli pahala pakuyi, su nalitulaga twenga pamuhera na wantu wetu."Watenditi hangu toziya kuweriti na lyoga likulu koseri, toziya Mlungu kawakomangiti nentu. 12 Na walii yawahowiti ndiri wapatiti malipu, ata walira kwa mlungu gwawu watangwi.