1 Wafilisti wajojoniliriti mashonta gawu goseri aku Afeka, na Waisraeli wagolosiyiti ng'onjeru kubwiru ya lilalanda lwa Yezireeli. 2 Wakulu wamhanu wa Wafilisti pawaweriti wankupita na vipinga vyawu vya mamiya na maelufu, Dawudi na yomberi pakawera na wantu wakuyi pamuhera na Akishi waweriti wankufata uwega wa kumbeli wa shonta ali. 3 "Wakulu wa Wafilisti wakosiyiti, Waebraniya awa wankutenda shishi panu? Akishi kawawankula, ayu ndo Dawudi, ntumintumi gwa Sauli mfalumi gwa Israeli na yomberi kawera na neni kwa mivinja miviwa. Kwanjira pakatugiliti kwa neni, hanemwoni na shidoda shoseri." 4 Kumbiti wakulu wa Wafilisti wamkalaliriti nentu Akishi, wamgambira, "Mmuwuziyi kagendi pahala kwagumpanananiti kalikali. Nakaka nakagenda pamuhera na twenga kunkondu, hera hangu shaka sha nkondu hakagalambuki na kuwera mnkondu gwetu. Guwona ndiri handa muntu ayu hakapati njira iherepa ya kupatana na mtuwa gwakuyi shakapanu kuwera mnkondu gwetu kunkondu? 5 Hashi Ayu ndo Dawudi ulaulii mweni wadala wimbiti visoweru vyakuyi pawaweriti wankuvina, Sauli kalaga maelufu, kumbiti Dawudi kalaga maelufu lilongu."

6 Akishi kamshema Dawudi na kumgambira, "Nililapa kwa Mtuwa Mlungu yakawera mkomu, hangu guwera mwaminika kwaneni. Meguweri mlandu mheri kwa neni tugendi twawoseri munkondu, toziya haneniwoni shoseri shidoda kwa gwenga kwanjira lishaka lilii pagwiziti kwa neni mpaka leru ayi. Ata hangu, wakulu wayangu haweni jimirani na gwenga. 7 Hangu vinu, guwuyi ukaya. Gugendi kwa ponga su naguwakalaziya wakulu wa Wafilisti."

8 Dawudi kamgambira Akishi, "Kumbiti ntenda shishi? Gambira ntambu yagulonga kuwera, gumona ndiri na shidoda shoseri kwanjira lishaka lilii pananjiti kukutendera mpaka leru, Ntambu gaa ng'endi ndiri kulikomanga na wankondu wa mtuwa gwangu mfalumi?"

9 "Akishi kamgambira, nivimana kuwera gwamheri kulongolu kwa neni handa ntumintumi gwa kumpindi kwa Mlungu. Ata hangu, wakulu wa Wafilisti walonga, nakaka nakagenda pamuhera na twenga kunkondu. 10 Vinu, gwenga pamuhera na wantumintumi wa mtuwa gwaku Sauli wawiziti pamuhera na gwenga, shirawu mandawira putiputi, mwimuki na kuwuka katepu pakulangala."

11 Hangu, shirawu yakuyi mandawira putiputi, Dawudi pamuhera na wantu wakuyi wawukiti kuwuya muisi ya Wafilisti. Kumbiti Wafilisti awa wagenda Yezireeli.