1 Pa Lisandiku lya Mtuwa Mlungu kuwera muisi ya Wafilisti kwa shaka sha miyezi saba, 2 Wafilisti wawashemiti watambika na watunga wawu na kuwakosiya, "Tutendi hashi na Lisandiku ali lya Mtuwa Mlungu? Mtugambiri tuliwuziyi na shintu gaa pahala pakuyi." 3 Womberi wawagambira, "Pamuliwuziya Lisandiku lya Mlungu gwa Israeli, namuliwuziya mawoku hera. Kumbiti kwa ntambu yoseri ilii pamuliwuziya mjegi na tambiku ya kuwusiya ukondola wenu. Pamtenda hangu hamponeki, na mwenga hamuvimani kwa ntambu gaa kaweriti kankuwakomanga magenda." 4 Wantu wakosiya, "Hatumjegeri tambiku gaa ya kuwusiya vidoda?" Womberi wawankula "Vinyagu vyamhanu vya zahabu vyaviwera mfanu gwa malipu, na vinyagu vyamhanu vya zahabu paviwera mfanu gwa mbewa, kila shimu pashilanguziya ukulu wumu wa Wafilisti, toziya tawuni yaitumitwi kwa mwenga ndo irailii yaitumitwi kwa wakulu wenu. 5 Mpaka mtendi vinyagu vyavilifana vya malipu na vinyagu vya wambewa wenu, vintu vyeni vyagamiziya isi yenu. Ndo mpaka mumupi ligoya Mlungu gwa Israeli. Pamonga hakaleki kuwakomanga maweni mwenga na wamlungu wenu na isi yenu. 6 Ntambu gaa muwera mwana mtiti handa Wamisri na Farao? Hashi, Mlungu pakamaliliti kuwakomanga nentu Wamisri, wawaleka ndiri Waisraeli wawuki, na womberi wawuka? 7 Su, mtandi mbutuka ya kukwegwa yasyayi na ng'ombi wawili yawakamwa weni hawenitawalirwi shimpingampinga; muwatawi mumbutuka ya kukwega na ng'ombi kumbiti wana wa ng'ombi wawu nawagenda pamuhera na womberi, ila wasigali mulizizi. 8 Mlitoli Lisandiku lya Mtuwa Mlungu na kulitula mumbutuka ayi. Kumbeku ya Lisandiku mtuli vilaa vinyagu vya zahabu yeni mmujegeri handa tambiku ya kuwusiya vidoda vyenu. Shakapanu mlileki ligendi kwalifira kugenda. 9 Su myiloli, handa mbutuka ayi igenda longulongu kugenda isi yakuyi kumji gwa Beti Shemeshi, su, hatuvimani kuwera yakatujegeriti tawuni ayi ndo Mlungu gwa Israeli. Kumbiti handa ligenda ndiri aku, su, hatuvimani kuwera liwoku lyakuyi ndiri lyalitukomiti ila madoda aga galawira hera." 10 Watenditi ntambu yawagambiritwi wawatoli ng'ombi wawili yawakamitwi na kuwatawa mumbutuka na wana wa ng'ombi wawatawi mulizizi. 11 Lisandiku lilii lya Mtuwa Mlungu walitula mumbutuka ilii pamuhera na majamanda gana vinyagu vya wambewa na virii vya malipu. 12 Wang'ombi wagenditi magenda kugenda mji gwa Beti Shemeshi pota kugenda kumshigi ama kumliwu na waweriti wankubota pawaweriti wankugenda. Wafalumi walii mhanu wa Wafilisti wawafatiti mpaka mumbaka mwa Beti Shemeshi. 13 Wantu wa Beti Shemeshi waweriti wankubenanga nganu kululalanda. Pawaloliti pampindi na kuliwona Lisandiku lya Mtuwa Mlungu, wanemelera nentu. 14 Mbutuka ayi igenditi kulilambu lya Yoshuwa, mwenikaya gwa Beti Shemeshi. Palisokiti aku ligoloka pakwegera na libuwi likulu. Wantu wabomolanga mbutuka ilii, mbawu zakuyi watendera kuwalunguziya wamg'ombi awa wawalaviyiti handa tambiku ya kulunguziya kwa Mtuwa Mlungu. 15 Pamberi pa aga Walawi waweriti wasulusiya Lisandiku lya Mtuwa Mlungu na lijamanda lilii lyana vinyagu vya zahabu na kuvitula kulibuwi lilii likulu. Su, lishaka ali wantu wa Beti Shemeshi walaviyiti tambiku za kulunguziya, na kumlavilira tambiku zimonga Mtuwa Mlungu. 16 Wakulu wamhanu walii wa Wafilisti pawawoniti aga, wawuyiti Ekroni, lishaka liraali. 17 Wafilisti wavijegiti vinyagu mhanu vya zahabu na vya malipu kwa Mtuwa Mlungu viwera tambiku ya kuwusiya vidoda vyawu, shinyagu shimu kwa mji agu gwa Ashidodi na Gaza, na Ashikeloni, na Gati na gwa Ekroni. 18 Wajegiti viraa vinyagu vyamhanu vya zahabu vya wambewa kulinganira na walanga ya miji yoseri ya Wafilisti yaikolitwimlima na wakulu wa Wafilisti. Miji ayi iweriti yana maboma na vijiji vyavizyengetitwi ndiri shibambaza. Libuwi likulu lilii kulilambu lya Yoshuwa gwa Beti Shemeshi, pahala peni pawalijegiti Lisandiku lya Mtuwa Mlungu, ndo ukapitawu wa lilawiru ali mpaka leru. 19 Mtuwa Mlungu kawalagiti wenikaya sabini wa mji gwa Beti Shemeshi, toziya waloliti mngati mwa Lisandiku Lipatanu lyakuyi. Wantu wadayiti toziya Mtuwa Mlungu kaweriti kawalaga wavuwa muwamu mwawu.

20 Shakapanu, mwenikaya gwa mji gwa Beti Shemeshi walonga. "Gaa yakaweza kugoloka kulongolu kwa Mtuwa Mlungu, ayu Mlungu mnanagala? Hakagendi kwa gaa su kawuki kwa twenga?" 21 Watumiti walagilagi kugenda kwa wenikaya wa mji gwa Kiriati Yearimu, Walongi. "Wafilisti wawuziya Lisandiku lya Mtuwa Mlungu, mwizi mlitoli."