1 "Sauli pakawuyiti kulawa kalikomanga nkondu na Wafilisti, kagambiluwa kuwera Dawudi kakushiwala sha Engedi." 2 Shakapanu Sauli kawatoliti mashonta elufu tatu wasyagulwa yawaweriti wagangamala nentu muisi yau yoseri ya Israeli, kagenda kumsakula Dawudi na wantu wakuyi mumatalawu ga mbawala. 3 Sauli pakaweriti mumwanja, kasokiti kulipanga limu lyaliweriti pakwegera na lizizi lya kondolu, kingira amu kumpanga su kagendi kumihamba. Dawudi na wantu wakuyi waweriti walikala mngati nentu mwa lipanga ali. 4 Wantu wa Dawudi wamgambira, "lishaka lilii lyakakugambiriti Mtuwa Mlungu kuwera hakizi kumtula mnkondu gwaku hanikupanani ukanka na gwenga gumtenderi ntambu yaguwona ifaa, leru isoka." Dawudi ndo pakamgenderiti Sauli mpolimpoli kulawa kumbeli, kalikitula luwiniku lwa nguwu yakuyi. 5 Dawudi moyu gumtama toziya kalikitula luseperu lwa nguwu ya Sauli kwa bada. 6 Kawagambira wantu wakuyi, "Mtuwa Mlungu kandeweleri nanimtendera shitendu handa ashi mtuwa gwangu yakasagulitwi kwa kuswagwa lipaki na Mtuwa Mlungu. Nanilitalipisiya liwoku lyangu kwa muntu mweni Mtuwa Mlungu kamswaga lipaki." 7 Kwa visoweru avi, Dawudi kawazyangazyanga wantu wakuyi nawamtenda Sauli, kawaberiti nawamkomanga. Shakapanu Sauli kagoloka, kalawa kulipanga keganda zakuyi. 8 Shakapanu, Dawudi na yomberi kagoloka, kalawa kulipanga na kumshema Sauli, "Mtuwa gwangu mfalumi!" Mfalumi Sauli pakaloliti kumbeli, Dawudi kang'ong'onala mpaka pasi, kampanana ligoya Sauli. 9 Shakapanu kamgambira, "Toziya guwapikinira wantu yawakupikinira, guloli! Dawudi kafira kukulaga? 10 Vinu guloli leru, leru guliwonera kwa masu gaku gamweni, paguweriti kulipanga Mtuwa Mlungu kakutuliti mmakakala gangu. Wamu wa wantu wa neni wang'ambiriti nikulagi, kumbiti nikuwoniliti lusungu. Ntakula hapeni ntalipisiyi liwoku lyangu kwa mtuwa gwangu toziya yomberi kasyagulitwi na Mtuwa Mlungu kwa kuswagwa lipaki. 11 Tati gwangu, guloli luwiniku lwa nguwu lwaku pota kukulaga, guweza vinu kuvimana kwa nakaka handa neni namkondola ndiri pota ukondola. Neni hanenitendi vidoda kwa gwenga tembera gwenga gunsakula gundagi. 12 Mtuwa Mlungu na kaamuwi pakati pa twenga, na gwenga. Yomberi kakuwuziliri kumbiti neni nakamu hapeni ntalipisiyi liwoku lyangu kwa gwenga. 13 Kumbiti wantu wa makashu walongiti, kwa makontola kulawa ukondola, kumbiti hapeni ntalipisiyi liwoku kwa gwenga nukutendi. 14 Vinu gwenga mfalumi gwa Israeli guloli muntu yagufira kumlaga! Hashi, gumfata gaa? Gumfata ng'ang'a yakafuwiti ama gumfata mbapani! 15 Su, Mtuwa Mlungu na kaweri mwamlira pakati pangu na gwenga. Yomberi na kaguloli mlandu agu, kanteteyi na kanopuziya kulawa kwaku." 16 Dawudi pakamaliliti kulonga, Sauli kalonga, "Hashi, ali ndo liziwu lyaku mwana gwangu Dawudi?" Shauli kalira kwa kubotanga. 17 Shakapanu kamgambira Dawudi, "Gwenga gwana lusungu kuliku neni, gundipa maheri, tembera neni nikulipa makontola. 18 Leru, gunanguziya ntambu yaguweriti mheri kwa neni. Tembera Mtuwa Mlungu kakupanana lupeni lwa kundaga. 19 Hashi, muntu pakambata mnkondu gwakuyi hakamleki hera hangu? Kwa shilii shagumtenderiti, Mtuwa Mlungu kakutekeleri! 20 Vinu nivimana handa nakaka haguweri mfalumi gwa Israeli na ufalumi wa Israeli haugangamiziwi mumawoku gaku. 21 Kumbiti gunapili kwa litawu lya Mtuwa Mlungu handa hapeni gulyaluwi nakamu wiwuka wa neni, su litawu lya neni muwalongu wangu naguliwusiya." 22 Dawudi kamlapira Sauli. Shakapanu Sauli kawuya ukaya kwakuyi, kumbiti Dawudi na wantu wakuyi wagenda kumafifu.