1 Dawudi kawukiti aku katugira kulipanga pakwegera na mji gwa Adulamu. Wakaka wakuyi na walongu wakuyi wamonga pawapikiniriti handa kapanu, wamgenderiti aku kuwera pamuhera na yomberi. 2 Wantu woseri yawayonolitwi ama yawaweriti na uwanda, ama walii wajimiriti ndiri wamjojonikiti Dawudi. Walanga yawu waweriti wantu handa miya msheshi na yomberi kawera mlonguziya gwawu. 3 Kulawa aku, Dawudi kagenditi mpaka aku Mizipa isi ya Mowabu. Kamgambira mfalumi gwa Mowabu, "Nikuluwa, tati gwangu na mawu gwangu walikali panu kwaku mpaka nivimani Mlungu hakantendi shishi." 4 Su, Dawudi kawalekiti walera wakuyi walikali na mfalumi gwa Mowabu na womberi walikala kwakuyi shaka shoseri Dawudi paweriti kulimpanga. 5 Shakapanu mbuyi Gadi kamgambira Dawudi, "Nagulikala panu kulimpanga, guwuki malayimu gugendi muisi ya Yuda." Su, Dawudi kawuka, kagenda kulidowi lya Hereti. 6 Lishaka limu, Sauli kaweriti Gibea, kalikala pasi pa mkwashu, kulugongu, agawu pakawera na mgoha gwakuyi mliwoku na wantumintumi wakuyi waweriti wagoloka kumbwega kwakuyi. Su wamgambira handa Dawudi na wantu wakuyi wawoneka. 7 Na Sauli kawagambira wantumintumi wakuyi, "Vinu mwenga wantu wa likabila lya Benjamini mmpikiniri, hashi mlihola Dawudi ayu mwana gwa Yese hakampanani kila yumu gwenu malambu ga viboga na malambu ga mizabibu? Ama hashi, mlihola hakamtendi kila yumu gwenu mkulu gwa maelufu ama mkulu gwa mamiya ga mashonta? 8 Ntambu gaa mawoseri mwenga mng'alambuka? Kwahera ata yumu gwenu yakang'ambira handa mwanagwangu kankutenda lipatanu na Dawudi, kayi kwahera ata yumu yakahinika ama kung'ambira handa Dawudi muntu gwangu mweni vinu kankusakula lupenu lwa kundaga agawu mwanagwangu mweni Yonatani kankumsongiziya." 9 Doegi muntu gwa Edomu, mweni kaweriti kagoloka pakwegera na wantumintumi wa Sauli kalonga, "Nimwoniti mwana gwa Yese pakiza Nobu kwa mtambika Ahimeleki mwana gwa Ahitubu. 10 Ahimeleki kamluwiriti Dawudi kwa Mtuwa Mlungu, kampanana shiboga na ligumba lya Mfilisti ulii Goliyati." 11 Mfalumi Sauli kawalagalira wantu wagendi wakamshemi mtambika Ahimeleki mwana gwa Ahitubu, pamuhera na wantu woseri wa walongu wa tati gwakuyi weni waweriti watambika aku Nobu washemuwi. Woseri wamgendera mfalumi Sauli. 12 Sauli kalonga, "Vinu gupikinili gwenga mwana gwa Ahitubu." Ahimeleki kamwankula, "Yina mtuwa gwangu." 13 Sauli kamgambira, Ntambu gaa gwenga na Dawudi mwana gwa Yese, mlipanga kung'alambuka? "Ntambu gaa mmupananiti mabumunda na ligumba, shakapanu gumluwira kwa Mlungu? Toziya ayi, leru kandeka na kansakula kundaga." 14 Ahimeleki kamwangula, "Pakati pa wantumintumi waku, Dawudi ndo mkulu gwa kwaminika kuliku woseri. Yemberi ndo mganafu gwaku gwenga mfalumi mweni, mkulu gwa shipinga shaku sha wantu yawakulolera gwenga na kagoyilirwa kuliku woseri mkaya mwaku. 15 Leru, ndo mala ya kwanja ndiri kumluwa Mlungu shakutenda kwajili yakuyi? Mfalumi, nagunholera neni pota muntu yoseri muwalongu wa tati gwangu kulipanga aga. Neni ntumintumi gwaku. Nivimana ndiri shoseri, shiweri shikulu ama shididini mumlandu agu." 16 Kumbiti mfalumi Sauli kamgambira, "Ahimeleki, nakaka hagulaguwi, gwenga na walongu waku woseri wa tati gwaku." 17 "Sauli kawagambira wayamlolera yawaweriti wagoloka kubwegabwega kwakuyi, Mgalambuki na kuwalaga watambika wa Mtuwa Mlungu, toziya womberi wawera pamuhera na Dawudi; wavimaniti handa katutira pota kung'ambira. Kumbiti walolera awa wanyasula ndiri mawoku gawu su kuwalaga watambika wa Mtuwa Mlungu." 18 Hangu, mfalumi Sauli kamgambira Doegi, "Gwenga gugalambuki gwakawalagi watambika." Doegi, Mwedomu, kagenda na kuwalaga watambika woseri. Lishaka ali, Doegi kalaga watambika semanini na mhanu weni wavala nguwu yayivalwa pashifuwa shitambika sha nguwu nfunfu. 19 Shakapanu kawalagiti kwa makola ga ligumba wenikaya woseri wa Nobu, mji gwa watambika, wapalu na wadala, wana wadidini na yawakonga, wang'ombi, punda na kondolu. 20 Kumbiti Abiatari, yumu gwa wana wapalu wa Ahimeleki, mwana gwa Ahitubu, kalipotiti katugira kwa Dawudi. 21 Abiatari kamgambira Dawudi kuwera Sauli kawalaga watambika wa Mtuwa Mlungu. 22 Na Dawudi kamgambira Abiatari, "Nivimaniti lupalahera lishaka lilii panimwoniti Doegi Mwedomu, kuwera hakamgambiri Sauli. Hangu, neni ndo ndenda wantu wa kaya tati gwaku walaguwi. 23 Gwenga, gulikali pamuhera na neni, pota kutira. Toziya, yakasakula kuntaga neni kasakula ata kukulaga na gwenga viraa. Paguwera pamuhera na neni, haguponeki."