1 Samueli kawagambira Waisraeli woseri, goseri gamng'ambiriti, nigapikinira, "Nimlumika mfalumi kwajili ya mwenga. 2 Vinu, mwanayu mfalumi gwa kuwalonguziya. Neni ndo mzewi nentu na wana wa neni wapalu wa pamuhera na mwenga. Nwera mkolamlima gwenu kwanjira panweriti mntemba mpaka vinu. 3 Na panu na handa ntenda mlandu goseri gulii gudoda, su mlaviyi ukapitawu kulongolu kwa Mtuwa Mlungu na kulongolu kwa mfalumi gwakuyi msyagulwa. Hashi, mboka ng'ombi shipalu ama punda gwa muntu yoseri? Hashi, nimpunja muntu yoseri? Hashi, nimyonera muntu yoseri? Hashi, nanga swinda kwa muntu yoseri su kugonyia masu gangu? Na neni hanimuwuziliri shoseri shilii." 4 Wantu wamwankula, "Nakaka kazyanga ndiri, gunyonera ndiri, pota kutola swinda kulawa kwa muntu yoseri." 5 Samueli kankula, "Mtuwa Mlungu ndo kapitawu kwa mwenga, na mfalumi gwakuyi msyagulwa leru ndo kapitawu kuwera mumona nahera likosa." Womberi wamwankula. "Yomberi ndo ukapitawu." 6 Samueli kawagambira, "Mtuwa Mlungu ndo yakamsyaguliti Musa na Aruni kuwalaviya wambuyi wenu muisi ya Misri. 7 Mgoloki palapanu na neni haniwalanguziyi kwa ukapitawu niwaholuziyi mirandu mikulu yakatenda Mtuwa Mlungu na neni Haniwabweleri kuusu matendu gakuyi ga kulikangasha geni kagatenditi su kuwalopola mwenga na wambuyi wenu.

8 Yakobu na walongu wakuyi pawagenditi Misri, na Wamisri pawawayoniriti, wambuyi wenu wamliliriti Mtuwa Mlungu na kawalagalira Musa na Aruni weni wawawusiyiti wambuyi wenu muisi ya Misri na kuwatenda mlikali muisi ayi. 9 Kumbiti womberi wamwaluwiti Mtuwa Mlungu, Mlungu gwawu na yomberi kawatenda wasindi na Sisera, mkulu gwa lishonta lya Hazori na mumawoku mwa Wafilisti na mumawoku mwa mfalumi gwa Mowabu. Maisi aga galikomanga na wambuyi wenu na kuwakanga. 10 Wambuyi wenu wamlilira Mtuwa Mlungu, pawalonga, tutenda vidoda toziya tukuleka gwenga Mtuwa Mlungu, kwa kuwatendera Mabaali na Maashitaroti. Kumbiti vinu gutulopuziyi kulawa mumawoku mwa wankondu wetu na twenga hatukutenderi’. 11 Mtuwa Mlungu ndo pakamtumiti Yerubaali na shakapanu kamtuma Bedani, shakapanu Yefuta na upeleru kantuma neni Samueli. Kila yumu gwetu kawalopuziya kulawa kwa wankondu wenu yawawazyengetiti, mwenga mlikala kwa ponga. 12 Kumbiti pamumwoniti mfalumi Nahashi gwa Waamoni kiza kuwakomanga, mumulema Mtuwa Mlungu mweni ndo mfalumi gwenu, mng'ambira, ndala! Mfalumi ndo yakafira kutukolamlima. 13 Vinu, mfalumi yamlisyaguliriti ndo ayu panu. Mmuluwiti Mtuwa Mlungu kawapanani mfalumi na yomberi kawapanana. 14 Handa pamumguwira Mtuwa Mlungu, na kumtendera, na kupikinira liziwu lyakuyi pota kulema lagiru zakuwi, handa mwenga maweni pamuhera na mfalumi yakawakolamlima pamumfata Mtuwa Mlungu, Mlungu gwenu, su hamuweri na mpatiru. 15 Kumbiti handa hapeni mlipikiniri liziwu lya Mtuwa Mlungu, mlema lagiru zakuyi, su yomberi hakalikomangi na mwenga pamuhera na mfalumi gwenu. 16 Hangu su, mlikali na kugulola mlandu agu mkulu gweni Mtuwa Mlungu hakatendi kulongolu kwa mwenga. 17 Hashi vinu shaka ndiri sha kubenanga nganu shaka ashi shiweriti shaka sha shiyangazi? Kumbiti neni hanimluwi Mtuwa Mlungu kajegi lupanda na mvula, na mwenga hamuvimani na kuuwona ukondola wenu wamtenditi kulongolu kwa Mtuwa Mlungu kwa kulifilira mfalumi, ndo mkulu."

18 Su, Samueli kamluwa Mtuwa Mlungu, na yomberi katuma lupanda na mvula mulishaka ali. Wantu woseri wamtira nentu Mtuwa Mlungu na Samueli. 19 Hangu wamgambira Samueli, "Shondi gutuluwiri twenga wantumintumi waku kwa Mtuwa Mlungu, Mlungu gwaku, su natulaguwa, toziya tongera vidoda vyetu kwa ukondola awu wa kulifilira twaweni mfalumi." 20 Samueli kawankula, "Namtira, tembera mtenda ukondola awu, namleka kumfata Mtuwa Mlungu, ila mmutenderi kwa moyu gwenu goseri. 21 Namfata wamlungu yawafaa ndiri yayiweza ndiri kuwatanga pota kuwalopola. 22 Kwa ligoya lya litawu lyaku likulu, Mtuwa Mlungu hapeni kawasi wantu wakuyi toziya kafira kuwatenda mwenga kuwera wantu wakuyi. 23 Nakaka hapeni ndeki kuwaluwira kwa Mtuwa Mlungu, kutenda hangu hayiweri kumtendera vidoda Mtuwa Mlungu. Hanendereyi kuwafunda njira heri na ya kumfiriziya Mtuwa Mlungu. 24 Su, mmuguwili Mtuwa Mlungu na kumtendera kwa waminika kwa moyu gwenu goseri. Mliholi mirandu ilii mikulu yakawatenderiti. 25 Kumbiti handa pamwendereya kutenda makontola, hamwagamiri mwenga maweni pamuhera na mfalumi gwenu."