1 Pamakashu, wakolamlima walii yawashemitwi watoza pawaweriti wankukolamlima, shaka tunga kuweriti na njala nkulu muisi ya Israeli. Su muntu yumu yakashemitwi Elimeleki kulawa Betilehemu mulushi lwa Yuda yakaweriti na mdala gwakuwi yakashemitwi Naomi, litawu Naomi liwera na mana kaherepa, pamuhera na wana wau wawili wapalu yawashemitwi Mahaloni na Kilioni, wagenditi kulikala kwa katepu gambira wahenga muisi ya Mowabu. 2 Womberi waweriti wantu wa shiyuwuku sha Efurati gwa aku Betilehemu muisi ya Yuda. 3 Su Elimeleki mpalu gwakuwi Naomi, kahowiti na Naomi kasigaliti na wana wapalu wakuwi wawili. 4 Wantemba walii wayugiti wadala kulawa mlushi lwa Mowabu, Kilioni kamuyugiti mdala yawamshemiti Oripa na Mahaloni kamuyugiti mdala yawamshemiti Luti. Pamivinja lilongu, 5 Mahaloni na Kilioni viraa wahowiti, su Naomi kasigaliti gweka yakuwi pota kuwera na mpalu ama wana.

6 Shakapanu Naomi pakapatiti visoweru kuwera Mtuwa Mlungu kawatekeleriti wantu wakuwi su wapati mabenu gavuwa, su yomberi pamuhera na wamikawana wakuwi walitandiriti kuwuya Betilehemu. 7 Yomberi pamuhera na wamikawana wakuwi wawukiti pahala palii kwawalikaliti, wanjiti mwanja gwa kuwuya muisi ya Yuda. 8 Kumbiti Naomi kawagambiriti wamikawana wakuwi wawili, "Muwuyi kila yumu ukaya kwa mawu gwakuwi. Nduwa Mtuwa Mlungu kaweri muheri kwa mwenga, ntambu yamuweriti kwaneni na ntambu yamuwatendiriti wapalu wenu pamberi pa kuhowa kwawu. 9 Mtuwa Mlungu kawapanani, kila yumu gwenu kapati mpalu gwingi na numba yakuwi." Shakapanu Naomi kawakisikira na kuwanona, kawagambiriti kwahere. Womberi wanjiti kulila kwa liziwu 10 na wamgambiriti, "Ndala! Twenga hatugendi pamuhera na gwenga kuwuya kwa wantu waku."

11 Kumbiti Naomi kawagambira, "Wahinga wangu muwuyi ukaya. Iwera hashi mfira kunfata neni? Mwenga mulihola kuwera, neni haweri na wana wapalu wingi wa kuwayuga mwenga? 12 Wahinga wangu muwuyi ukaya kwa walera wenu, neni namgogolu su hapeni nyuguwi kayi na mpalu yumonga. Ata handa panulihola kuwera mempati mpalu pashiru panu na kupata wana, 13 hashi, mwenga memuwezi kuhepera mpaka wakuli? Hashi, memuwezi kulilewelera kuyuguwa na wapalu wamonga kwajili yawu? Ndala, wahinga wangu! Vitwatira vyaneni vikamala nentu kwajili ya mwenga, toziya Mtuwa Mlungu kantenda ntabiki!" 14 Shakapanu Luti pamuhera na Oripa waliliti kayi toziya ya shilii shakatakuliti Naomi. Su Oripa kamkisikira na kumnona mikamawu gwakuwi na kuwuya ukaya kwakuwi, kumbiti Luti kasigaliti na mikamawu gwakuwi. 15 Su Naomi kamgambiriti Luti, "Guloli muyagu kawuya ukaya kwakuwi na kwa milungu yakuwi. Na gwenga viraa guwuyi, gumfati muyagu Oripa."

16 Kumbiti Luti kamwankuliti, "Nagunduwa nikuleki gwenga, poseri pagugenda, neni hang'endi na gwenga, poseri pagulikala, neni hanulikali pamuhera nagwenga. Wantu waku hawaweri wantu wangu na Mlungu gwaku hakaweri Mlungu gwaku. 17 Pahala paguhowa, neni hanhowi pahala palii. Na pahala pagusiluwa na neni hansiluwi pahala palii. Mtuwa Mlungu kantendi shoseri handa pandekana na gwenga. Handekani na gwenga hera palii yumu gwetu pakahowa."

18 Naomi pakayambuliti kuwera Luti kamlemetera kugenda pamuhera nayu, su kalekiti kumsindikira kawuyi ukaya. 19 Su wawili awa wendereyiti na mwanja mpaka pawayingiriti Betilehemu. Womberi pawasokiti aku, wantu woseri mlushi walikangashiti kuwawona. Wadala wa lushi lulii walikosiyiti weni, "Hashi, nakamu ayu Naomi?"

20 Naomi kawagambira womberi, "Namunshema kayi Naomi, kumbiti munshemi Mara, litawu Mara liwera na mana ukaripa, toziya Mtuwa Mlungu yakawera na makakala, kagatenda makaliru gangu gaweri na ukaripa. 21 Pambukiti panu, neni weriti na vyoseri, kumbiti vinu Mtuwa Mlungu kambuziya mawoku hera, toziya nahera kaya. Iwera hashi munshema Naomi? Mtuwa Mlungu katenda vintu vidoda vimpati neni, viraa kalekeziya ntabiku nkulu indawili neni."

22 Su Naomi kawuyiti ukaya kwakuwi pakawera na Luti mikamwana gwakuwi kulawa Mowabu. Womberi pawaweriti wankuwuya Betilehemu, shaka sha kubenanga shayili shiweriti shyankwanja.