1 Su kuweriti na muntu yumu Kubetilehemu, yomberi kaweriti gwa lukolu lwa Elimeleki mpalu gwa Naomi, yawamshemiti Bowazi. Muntu ayu kaweriti mlunda na kamanikana nentu. 2 Lishaka limu, Luti kamgambiriti Naomi, "Gundekeziyi ng'endi mumalambu nakasoli viboga vyavilekituwi na wantu yawabenangiti." Naomi kamwankuliti yomberi, "Su aya gugendi muhinga gwangu."

3 Su Luti kagenditi kumalambu, kanjiti kusola viboga kumbeli kwa yawabenangiti. Yomberi pakaweriti kankusola, kayambuliti kuwera kaweriti kankusola mulilambu lya Bowazi, ulii yakaweriti gwa lukolu lwa Elimeleki mganafu gwakuwi.

4 Yomberi pakaweriti kankali kankusola viboga mulilambu, Bowazi kasokiti kulawa Betilehemu, su kawalamsiyiti yawabenanga viboga, "Mtuwa Mlungu kawatekeleri mwenga!"

Womberi wankuliti, "Mtuwa Mlungu kakutekeleri na gwenga viraa!"

5 Shakapanu Bowazi kamwoniti Luti, su kamkosiyiti mgolokera gwa yawabenanga viboga, "Muhinga ayu gaa?"

6 Mgolokera ulii kamwankuliti, "Muhinga ayu muntu gwa Mowabu, yomberi kiziti kulawa aku pakawera na Naomi. 7 Yomberi kanduwiti pakalonga, shondi shondi, gundekeziyi neni nsoli vyavisigaliti kumbeli kwa walii yawabenanga viboga. Neni numlekeziya, su yomberi katenditi lihengu lya kusola kwanjira mandawira mpaka vinu. Katepu hera kagenda kwoyera kuliringu."

8 Su Bowazi kamgendiriti Luti na kamgambira, "Gupikanili muhinga gwangu. Nagugenda kusola viboga mulilambu lyamonga, kumbiti gusoli hera mulilambu ali. Gulikolerani pamuhera na wadala awa. 9 Guloli pahala wapalu wankubenanga, su gwenga guwafati wadala yawabenanga. Neni nuwaberiziya kala wantemba kuwera nawakugaziya kwa kukukolakola. Na paguwera na yumuluwa, gugendi gwatoli mashi gulandi kulawa muvulu zyazimemisiwa na wantemba awa."

10 Bowazi pakalongiti hangu, Luti kamsuntamiriti mpaka pasi kwa ligoya kulonglu kwa muntu ulii, Palii Luti kamkosiya, "Hashi gwenga guwera muheri kwaneni? Mpata ashi upendelewu kulongolu kwaku uganu guvimana neni namuhenga!"

11 Bowazi kamwankula, "Wantu wang'ambira vitwatira vyoseri vyagumtendiriti mikamawu gwaku. Womberi wang'ambiriti kuwera gwenga guwaleka walera waku pamuhera na isi yaku, gwiza kulikala pamuhera na wantu yaguwamaniti ndiri kwanja. 12 Mtuwa Mlungu hakakutenderi maheri gwenga kwa shilii shagutenditi. Mtuwa Mlungu, Mlungu gwa wantu wa Israeli, gwenga yagumtugiriti pasi pa mbapatiru zakuwi, su kakuloleri weri na kakupanani mafupu mavuwa."

13 Luti kamwankula, "Mkulu gwangu, neni nendereya kupata upendelewu kulongolu kwaku, gwenga gumpanana neni moyu tembera neni wera ndiri teratera na wantumintumi waku wadala."

14 Mushaka sha kuliya shiboga, Bowazi kamshemiriti Luti, "Gwizi, gutoli libumunda na gulitoteli mudivayi guliyi." Su Luti kalivagiti pasi pamuhera na wantu walii yawabenganiti viboga, Bowazi kampananiti mbunji zyazikalangituwi, yomberi kaziliyiti na kwikuta na kavisigaliti vyamonga. 15 Luti pakagolokiti kwanja kubenanga kayi, Bowazi kawagambiriti wantumintumi wakuwi, "Mumleki kasoli mikunguwi ya shayili ata ilii yaiwera muilii yamuibenangiti, mwenga namumkalipira. 16 Viraa mtoli mikunguwi yamonga mumikunguwi yambenangiti, mumleki kayisoli, namumkalipira."

17 Su Luti kandereyiti kusola mikunguwi ya shayili mpaka pamihi. Yomberi pakasyogiti mikunguwi ilii na kupeta, kamemiziyiti lijamanda likulu lya kilu lilongu. 18 Yomberi kawuyiti kugenda mlushi pakawera na shiboga shilii shakapatiti na kamlanguziyiti mikamawu gwakuwi. Viraa Luti kampananiti kaliyi virii vyavisigaliti pakuliya. 19 Su mikamawu gwakuwi kamkosiyiti, "Hashi, viboga avi guvipata koshi? Guvisola mulilambu lya gaa? Mlungu kamtekeleri muntu ayu yakakupananiti upendelewu!" Shakapanu Luti kamgambiriti mikamawu gwakuwi kuusu muntu ulii yomberi pakatenditi lihengu. Luti kamgambiriti, "Muntu ayu yantenditi lihengu nayu kashemwa Bowazi." 20 "Mtuwa Mlungu kamtekeleriti muntu ulii! Naomi kamgambiriti mikamwana gwakuwi, Mlungu kagatenditi weri malagilu gakuyi kwa wantu yawalikala pamuhera na wantu yawahowiti." Viraa kongeriti kulonga, "Muntu ulii mlongu gwetu gwa pakwegera, womberi wafiruwa kulolera weri."

21 Shakapanu Luti muntu gwa Mowabu kalongiti, "Viraa yomberi kang'ambiriti, Gulikali pamuhera na wantumintumi wangu yawabenanga mpaka wamalili kubenanga mpunga gwagu goseri."

22 Naomi kamgambiriti Luti mikamwana gwakuwi, "Muhinga gwangu, ntambu ayi hayiherepi kwa gwenga,kuwera pamuhera na wahinga ntumintumi wakuwi, toziya pamonga megugaziwi kukukolakola mulilambu lya muntu gwingi." 23 Su Luti katenditi lihengu pamuhera na wantumintumi wahinga wa Bowazi, kasoliti mabenangu ga mpunga mpaka pagaperiti. Mushaka shilii kendereyiti kulikala na Naomi mikamawu gwakuwi.