1 "Waisraeli waweriti walilapa aku Mizipa handa, kwahera ata yumu gwawu ulii mekamleki mhinga gwakuwi kahetwi na wantu wa likabila lya Benjamini." 2 Su, wagenda mpaka Beteli, walikala aku kulongolu kwa Mlungu mpaka pashimihi. Wabotanga na kulila kwa kuhinginika kuvuwa. 3 Pawalonga, "Gwee Mtuwa Mlungu gwa Israeli, hashi shitwatira ashi shilawira ata tupunguluwa na likabila limu muisi ya Israeli?"

4 Shirawu yakuwi wantu wimkiti mandawira, wanyawa shitalawanda, walaviya tambiku za kulunguziya na tambiku za ponga. 5 Shakapanu wana wa Israeli walonga, "Hashi, muwamu mwa makabila goseri ga Israeli kwana likabila lyoseri lilii lisoka ndiri mukuliwona kwatutenditi kulongolu kwa Mtuwa Mlungu?" Waweriti walilapa kuwera muntu yoseri ulii yakasokiti ndiri kulongolu kwa Mtuwa Mlungu aku Mizipa hakalagwi.

6 Kumbiti Waisraeli wawawonera lusungu walongu wawu wa likabila lya Benjamini, Walonga, "Leru likabila limu la Israeli lyagamira muwamu mwa makabila ga Israeli. 7 Vinu tutendi hashi su kuwapanana wadala awa wapalu wa likabila lya Benjamini yawasigaliti toziya tulilapa kulongolu kwa Mlungu handa hapeni tuwapanana wahinga wetu!"

8 "Walonga hashi kwana likabila lyoseri lya Waisraeli lyeni ligenditi ndiri kulii Mizipa? Wayambula handa kwahera muntu yoseri kulawa Yabeshi Gileadi yakiziti mukuliwona aku." 9 Waisraeli pawawalangiti aku Mizipa kwahera mwenikaya yoseri gwa Yabeshi Gileadi yakiziti. 10 Hangu shipinga sha Israeli shijega wantu wakuwi elufu kumi na mbili yawaweriti wagangamala wa kulikomanga nkondu na kuwagambira. "Mgendi mkawalagi wanikaya wa Yabeshi Gileadi, wadala pamuhera na wana. 11 Hamuwalagi wapalu woseri na wadala woseri wawawamana wapalu." 12 Su wawona muwamu mwa wenikaya wa Yabeshi Gileadi wadala miya msheshi walii waweriti ndiri wagonja na mpalu yoseri, wawajega kumalingu aku Shilu muisi ya Kanani.

13 Shakapanu shipinga shoseri shituma walagilagi wa ponga wawagambiri wantu wa likabila lya Benjamini weni waweriti kulitalawu lya Rimoni. 14 Wapalu awa wa likabila lya Benjamini wawawuyira wayawu awa shaka shirashilii. Su wawapanana wadala walii yawaweriti wakomu aku Yabeshi Gileadi. Kumbiti wadala awa wawatosheya ndiri.

15 Waisraeli wawawonera lusungu wantu wa likabila lya Benjamini, toziya Mtuwa Mlungu katenda likabila lilii sambira lyagamiri. 16 Shakapanu wazewi wa shipinga shoseri walonga, "vinu tutendi hashi su kuwapanana wadala walii wapalu awa yawasigaliti toziya wadala woseri wa likabila lya Benjamini walaguwitwi? 17 Mpaka wapalu yawasigaliti wa likabila lya Benjamini wapananwa wadala su wenderezi likabila na hangu natwagamiziya likabila Muisraeli. 18 Kumbiti tuweza ndiri kuwalaviya wahinga wetu waweri wadala wawu, toziya tulilapiti kala handa muntu yoseri yakamyugiziya mhinga gwakuwi kwa wapalu wa likabila lya Benjamini kapangiluwi."

19 "Su walihola handa msambu gwa Mtuwa Mlungu yagutendeka kila shinja aku Shilu, mji yaguwera kushana kwa Beteli na kwagulawa mshenji mpaka kunjira yayilawa Beteli kugenda Shekemu na kweni ndo kusika kwa Lebanoni."

20 Hangu wawagambira wapalu walii wa likabila lya Benjamini, "Mgendi mkagwandiri mumalambu ga mizabibu. 21 Muweri masu. Wahinga wa Shilu pawalawa kunja kushiniga shaka sha msambu, mlawi mumizabibu na kila muntu kalitoleri mhinga yumu kaweri mdala gwakuwi. Shakapanu muwuyi muisi ya Benjamini. 22 Tati wawu ama wahasha wawu pawiza kushongera hatuwagambiri, twenga tuwaluwa muwawoneri lusungu wantu wa Benjamini na kuwaleka wawatoli wahinga awa, toziya tuwapanana ndiri wahinga yatuwalopoli munkondu na mwenga hapeni muweri na shidoda toziya muwapanana ndiri."

23 Wapalu walii wa likabila vya Benjamini watenda hangu, kila yumu kalisyagulira mhinga muwamu mwa wahinga wawalawiti kunja kushiniga aku Shilu na kumtola kuwera mdala gwakuwi. Shakapanu wawuya mulienewu lyawu, wazinyawa mji yawu syayi na kulikala amu. 24 Shaka shiraashi Waisraeli wawuka, kila muntu kawuya muisi lya likabila lyakuyi na lukolu lwakuyi. 25 Mashaka aga kuweriti ndiri na mfalumi Muisraeli. Kila muntu katenda ntambu yakawoniti kuwera iherepa.