1 Ntumintumi gwa kumpindi gwa Mtuwa Mlungu kawukiti Giligali, kagenditi Bokimu, kawagambira Waisraeli handa Mlungu kalonga, "Niwalaviyiti muisi ya Misri na kuwajega muisi yanuwalagiliti kwa kuwalipira wambuyi wenu. Ntakuliti kuwera hapeni nilimegi nakamu lipatanu lyangu na mwenga mashaka goseri. 2 Kwa mwenga nuwalagaliriti namtenda lipatanu na wenikaya wa isi ayi na hamuvibomoli vitalawanda vya kutambikira vyawu. Kumbiti mwenga mpikinira ndiri liziwu lyangu. Iwera hashi mtenda hangu? 3 Vinu niwagambirani hapeni nuwawingi awa toziya ya mwenga, kumbiti hawawagaziyi na wamlungu wawu hawaweri migomiziwu kwa mwenga kwa kuyiguwira." 4 Payiweriti Ntumintumi gwa kumpindi gwa Mtuwa Mlungu pakawagambiriti wantu woseri wa Israeli visoweru avi, wantu wabotangiti na kulira. 5 Wapashemiti pahala palii Bokimu mana yakuyi kulira. Palii wamlaviliriti tambiku Mtuwa Mlungu.

6 Pa Yoshuwa kuwagambira kwaheri Waisraeli, kila yumu kagenditi kutola kwa makakala pahala pakuwi pawambaguliriti kuhala. 7 Waisraeli wamtendiriti Mtuwa Mlungu mashaka goseri za makaliru ga Yoshuwa na pakuhowa kwakuyi, womberi shaka shoseri wendereyiti kutenda gambira wazewi walii yawasigaliti yawawoniti matendu makulu galii Mtuwa Mlungu gakawatendiriti Waisraeli. 8 Yoshuwa mwana gwa Nuni na ntumintumi gwa Mtuwa Mlungu, kahowiti pakawera na umuli wa vinja miya yimu na lilongu. 9 Womberi wamsiriti pahala pawambaguliriti paweri pakuwi aku Timina Tiheresi, muisi ya migongu ya Efurayimu kushana kulugongu Gaashi. 10 Shakapanu wantu woseri wa shiyiwuku shakuyi wahowiti, shifata shiyiwuku shimonga shilii shimumaniti ndiri Mtuwa Mlungu ama vitwatira virii vyakawatenderiti wantu wa Israeli.

11 Su Waisraeli watenditi ukondola kulongolu kwa Mtuwa Mlungu, na wanjiti kuwaguwira wamlungu wa Mabaali. 12 Wamlekiti Mtuwa Mlungu, Mlungu gwa wazewi wawu ulii yakawalaviyiti kulawa muisi ya Misri, wanjiti kuwaguwira wamlungu wamonga, wamlungu yawaguwirituwiti na wantu wawalikaliti kumbwega kwawu. Womberi wawasuntamaliti wamlungu awa na kumtenda Mtuwa Mlungu kakalali nentu. 13 Wamlekiti Mtuwa Mlungu, wawatendera wamlungu wa Mabaali na Maashitaroti. 14 Su maya ga Mtuwa Mlungu gaweriti makulu kwa Waisraeli, su kawalekiti wapoka watoli lunda zawu. Kawatenditi wankondu yawawazyengetiti wawakomangi, Waisraeli wasinditi nakamu kulikomanga na wankondu yawaweriti pakwegera nawa. 15 Kila pawagenditi kulikomanga nkondu, Mtuwa Mlungu kawatenditi wasindi munkondu, ntambu yakawaberiziyiti na kulirapa. Womberi waweriti mukwinginika kukulu.

16 Shakapanu Mtuwa Mlungu kawasagula watoza ndo yawawalopoziyiti kulawa kwa wantu yawawapokiti lunda zawu. 17 Kumbiti wawapikinira ndiri ata watoza wawu, su watenditi uhumba kwa kuwafata wamlungu wamonga na kuwaguwira. Wagalambukiti na kuyileka njira yeni watati wawu wayigenderiti, njira ya kujimira lagaliru za Mtuwa. 18 Mala zoseri Mtuwa Mlungu pakawajegiriti mtoza, mweni kaweriti pamuhera na mtoza ulii, kawalopoziyiti kulawa kwa wankondu wawu mushaka shoseri sha makaliru ga mtoza ulii. Pamonga Mtuwa Mlungu kawawoniriti lusungu pakapikiniriti kulila kwawu, kulawirana na kutabika na ntambu yawatabisitwi. 19 Kumbiti kila mala mtoza pakahowiti, wantu wawuyiriti kutenda vintu viherepa ndiri kuliku watati wawu ntambu yawatenditi. Wawafatiti wamlungu wamonga, wawatendera na kuwasundamalira, waleka ndiri kutenda vitwatira vyawabelitwi kutenda. 20 Hangu Mtuwa Mlungu kaweriti kawakalalira nentu Waisraeli, pakalonga, "Toziya wantu awa wamega lipatanu lyandenditi na wambuyi wawu, walema kujimira liziwu lyangu, 21 Hapeni nigawingi kayi maisi galii Yoshuwa kagasigaliziyiti, shaka pakahowiti. 22 Hanigajegi maisi aga kuwajera Waisraeli moni kuwera hawayiwuyiri njira yaneni handa wambuyi wawu ama ndala." 23 Su Mtuwa Mlungu kagaleka maisi aga, pota kugawinga kalongola na pota kawapanana ukanka pa Yoshuwa kuhowa!