1 Pakahowiti kala Ehudi, Waisraeli watenditi kayi ukontola kulongolu kwa Mtuwa Mlungu. 2 Mtuwa Mlungu kawatula mumawoku mwa Yabini, mfalumi gwa Kanaani, mweni kalikaliti aku Hazori na Mkulu gwa shonta lyakuyi kaweriti Sisera, mweni kalikaliti aku Harosheti Hagoimu 3 Mfalumi Yabini kaweriti na mbutuka za nkondu miya tisa za shuma za kukweguwa na Farasi. Hangu kawayoniriti nentu Waisraeli kwa mivinja malongu mawili, na womberi wamlilira Mtuwa Mlungu kawatangi.

4 Shaka ashi, kuweriti na mbuyi gwa Mlungu mdala yawamshemiti Debora, mdala gwa Lapidoti, yakaweriti mtoza gwa Waisraeli shaka ashi. 5 Debora kaweriti katendera lihengu lyakuyi pasi pa mtendi yaguweriti pakati pa lushi lwa Rama na lushi lwa Beteli muisi ya migongu ya Efureimu. Wantu wa Israeli wamwiziliti su kawatozeri masitaka gawu.

6 Lishaka limu kamshemiti Baraki mwana gwa Abinoamu gwa Kadeshi muisi ya Nafutali. Pakiziti kamgambiriti, "Mtuwa Mlungu, Mlungu gwa Israeli, kakulagalira hangu, gugendi gujojoniri wantu waku kulugongu Tabori, gusyaguli wantu elufu lilongu kulawa makabila ga Nafutali na Zebuloni. 7 Neni hanimtendi Sisera, mkulu gwa shonta lya Yabini, kizi na mashonta na mbutuka zakuyi kulikomanga na gwenga mulushemba Kishoni, na hanikupanani uwezo wa kumkanka." 8 Baraki kamgambira Debora, "Handa pagugenda pamuhera na neni, hang'endi. Kumbiti pagugenda ndiri pamuhera na neni, hapange'ndi."

9 Debora kamwankula, "Aya, hang'endi pamuhera na gwenga, kumbiti guvimani hangu hapagupati ligoya lyoseri lya ukanka wa nkondu ayi, toziya Mtuwa Mlungu, hakamtuli Sisera mumawoku mwa mdala." Su Debora wagenda pamuhera na Baraki aku Kedeshi. 10 Baraki kagashema makabila ga Nafutali na Zebuloni aku Kedeshi, wantu elufu kumi wamfata. Debora kagenda pamuhera na yomberi.

11 Shaka ashi, Heberi yakaweti Mkeni, kalitula gweka na Wakeni wayaguwi weni ndo wiwuka wa Hobabu yakaweriti shemeji gwa Musa. Mweni kanyawa liringu lyakuyi kutali aku kumwaloni gwa Zananimu, pakwegera na Kedeshi.

12 Sisera pakapatiti visoweru kwa wantu handa Baraki mwana gwa Abinoamu kagenda kulugongu Tabori, 13 kajojoniriti mashonta wakuyi woseri na mbutuka zakuyi miya tisa za shuma zazikweguwa na farasi, kawuka Harosheti Hagoimu, kagenda kulushemba Kishoni. 14 Debora kamgambira Baraki, "Gugendi! Leru pashiru mweni Mtuwa Mlungu kakupanana uwezu wa kumkanka Sisera. Mtuwa Mlungu kakulongolera." Su, Baraki kasuluka kulawa kulugongu Tabori pakawalonguziya wantu wakuyi elufu kumi. 15 Baraka katenda makomangu, na Mtuwa Mlungu kamzigiziya Sisera na wamashonta wakuyi woseri. Sisera kasuluka mumbutuka yakuyi katuga kwa magulu. 16 Baraki kawafata wamashonta awa na mbutuka mpaka Harosheti Hagoimu na kuwalaga wamashonta woseri wa Sisera kwa magumba, kasigaliti ndiri ata muntu yumu.

17 Kumbiti Sisera katuga kwa magulu mpaka mliringu mwa Yaeli, mdala gwa Heberi yakaweriti Mkeni. Katenditi hangu toziya kuweriti na lipatanu lya ponga pakati pa mfalumi Yabini gwa Hazori na kaya ya Heberi. 18 Yaeli kalawa kumwanka Sisera, kamgambira, "Mtuwa gwangu, kalibu kwa neni, pota nagutira." Kingira mliringu lyakuyi, kamgibikira kwa libulangeti. 19 Sisera kamgambira Yaeli, "Shondi, gunupi mashi shididini nandi, toziya nyumiluwa." Kampanana maweri pa mashi shombu sha likuli, shakapanu kamgibikira kayi.

20 Sisera kamgambira, "Gugoloki pamlyangu gwa liringu. Muntu yoseri pakiza kukukosiya handa kwana muntu yoseri panu, gumgambiri kwahera."

21 Sisera kaweriti katoka nentu su kagonja mpota, shakapanu Yaeli mdala gwa Heberi, katola nyundu na shigingi sha kugolusilira liringu, kamgendera mpolimpoli kashikomelera shigingi sha liringu pasheni pakuyi shipena mpaka palitapaka, toziya kaweriti kagonja nentu mpota kwa kutoka. Su, Sisera kahowa palapalii.

22 Na Baraki pakaweriti kankumfata Sisera, Yaeli kalawa kunja kumwanka kamgambira, "Gwizi na neni hanukulanguziya ulii yagumfata." Baraki kingira mnumba mwa liringu lya Yaeli na kumwona Sisera pasi, kahowa na shigingi sha liringu pashiwunji shakuyi.

23 Hangu, lishaka ali Mlungu kawapanana Waisraeli ukanka kwa mfalumi Yabani gwa Kanani. 24 Waisraeli wendereyiti kumgendera na kumkomanga komanga mfalumi Yabini gwa Kanani, mpaka pawamlagiti.