1 Mashaka aga kuweriti ndiri na mfalumi Muisraeli. Su likabila lya Dani liweliti lyankusakula enewu lyakuyi lya kulikala, toziya liweziti ndiri kwingira muisi yawapananwiti. 2 "Hangu wantu wa likabila lya Dani wasyaguliti muwamu mwa wantu wamhanu vikambaku wawatuma kulawa Sola na Eshitaoli wawagambira wagendi kuyilolalola isi. Su wantu awa wasokiti muisi ya migongu ya Efureimu ukaya kwa Mika wagenda wagonjiti amu pashiru." 3 Pawaweriti mnumba mwa Mika, walimaniti liziwu lya muntemba Mlawi ulii. Wamgalambukila na kumkosiya, "Gaa kakujega agawu? Gwana lihengu gaa panu?"

4 Yomberi kawankula, "Mika kandipa mpiya su ntendi lihengu lya kuwera mtambika gwakuyi."

5 Na womberi wamgambira, "Shondi gutukosilili kwa Mlungu tuvimani handa mwanja gwetu guherepa aku kwatugenda."

6 Mtambika ulii kawagambira, "Mgendi kwa ponga. Mtuwa kankugulolera mwanja gwenu."

7 Su, wantu wamhanu awa wawuka, wasoka Laishi. Wawawoniti wantu yawalikaliti aku, na ntambu yawalikaliti weri handa wantu wa Sidoni. Waweriti wantu wanyamaliru na wahera lyoga na waweriti na kila shintu shawashifiriti muisi. Waweriti kutali na wantu wa Sidoni na waweriti ndiri na lihengu lyoseri na wantu wamonga.

8 Su, walolalola awa wawuyiti kwa walongu wawu aku Sola na Eshitaoli, na womberi wawakosiya, "Mtujegera visoweru gaa?"

9 Womberi walonga, "Mwimuki tugendi na kuyikomanga isi ayi. Tuyiwona isi ayi na nakaka ndo isi yana mbotu. Hashi, hamlikali panu pota kutenda shintu? Namkawalila kugenda kuyitola kwa makakala. 10 Pamsoka aku hamuwawoni wantu yawalikala kwa unyamaliru. Isi ayi ndo nkulu, ipunguwa ndiri shoseri na Mlungu kawapanana uwezu wa kuyitola."

11 Su, wantu miya sita wa likabila lya Dani pawawera na silaa zawu za nkondu wawuka Sola na Eshitaoli. 12 Wagenda wanyawa malingu gawu aku kwagwinalira mshenji Kiriati Yearimu muisi ya Yuda. Ndo mana pahala palii, Kiriati Yearimu pashemuwa Mahani Dani mpaka leru. 13 Kulawa aku wagenda isi ya migongu ya Efuremu, wasoka ukaya kwa Mika.

14 Wantu wamhanu walii yawagenditi kuyilolalola isi ya Laishi wawagambira walongu wawu, "Hashi, mvimana handa munumba yimu muwamu mwa azi kwana vinyagu vidikadika vya wamlungu na shinyagu shawashigibikira madini ga feza? Su, mliholi hamtendi hashi."

15 Su walolalola walii wagenda kunumba ya Mika, wingira mnumba na kumkosiya visoweru vya mntemba Mlawi ulii na kumlamsiya. 16 Shaka ashi, wantu miya sita walii wa likabila lya Dani pawawera na magumba gawu ga nkondu waweriti wagoloka paligomi likulu. 17 Wantu walii wamhanu wawagenditi kuilolalola isi wayingiliti mngati mnumba, washitola shinyagu ashi na shizibawu shilii na vinyagu vidikadika vya wamlungu, na mtambaka kaweriti kagoloka muligomi na wamashonta yawapapiti magumba.

18 Shakapanu mtambika kawawoniti pawingira mnumba mwa Mika watola shinyagu sha kusongola, shifuku sha ntakuliru, na vinyagu vidikadika vya wamlungu, kawakosiya, "Mwangutenda shishi?"

19 Na womberi wamgambira, "Gunyamali, gudiwi mlomu gwaku, gwizi pamuhera na twenga, guweri mtambika gwetu na tati gwetu. Awu guwona hashi? Ifaa kwa gwenga nentu kuwera mtambika gwa muntu yumu ama mtambika gwa likabila lya Dani?"

20 Mtambika ulii kanemelera mumoyu kutola shinyagu shirii na shizibawu na vinyagu vimonga, kagenda na wantu walii. 21 Su, wanja mwanja gwawu, agawu walongolerwa na wana wawu na mifugu na lunda zawu.

22 Pawaweriti wasoka kutali na ukaya kwa Mika, wantu yawaweriti pakwegera na Mika washemitwi, wawafatira wantu wa likabila lya Dani wawafikira. 23 Shakapanu wawatendera umatu, na womberi wantu wa likabila lya Dani wagalambuka, wamkosiya Mika, "Gwana shida gaa ata gutufatira pamuhera na shipindi shoseri ashi?"

24 Mika kalonga, "Mwengapa mtola wamlungu wangu yanilinyawiliti, viraa mmutola na mtambika gwangu, mndekara ndiri shintu. Muweza hashi kunkosiya nana shida gaa?"

25 Wantu wa likabila lya Dani wamgambira, "Shondi guleki umatu waku, toziya wamonga wetu wana maya waweza kukukangala, na kukulaga na kuwalaga walongu waku." 26 Mika pakawoniti handa wamzidi makakala, kagalambuka, kawuya ukaya na likabila lya Dani wagenda zawu.

27 Wantu awa wa likabila lya Dani wavitoliti vintu avi vyeni Mika kaweriti kavinyawa, wamtola na ulii mtambika gwakuyi. Su wagenda kugukomanga Laishi wawalaga wenikaya wakuwi walii yawalikaliti amu kwa nyamaliru na pota lyoga, waluhalibisiya lushi alu. 28 Weni kaya wa lushi alu waweriti ndiri na wantu wa kuwalopola toziya waweriti kutali na mji gwa Sidoni, lushi alu luweriti kululalanda lwa Beti Rehobu. Wantu wa likabila lya Dani walunyawa kayi, walikala amu. 29 Wagalambuliti litawu lya mji agu, wagushema Dani, kufata litawu lya mbuyi gwawu yakaweriti mwana gwa Yakobu. Kumbiti lushi alu mashaka gapititi walushemiti Laishi. 30 Wantu wa likabila lya Dani washigolosiya shinyagu shilii sha kusongola, na litawu lya mtambika ayu ndo Yonatani, mwana gwa Gerishomu, mzukulu gwa Musa na wana wakuyi, waweriti watambika wa likabila lya Dani mpaka pawagenditi muisi ya kuhamisirwa. 31 Shaka shoseri liringu linanagala lya Mlungu paliweriti aku Shilo, wantu wa likabila lya Dani wanderiyiti kushiguwira shinyagu sha kusongola shilii Mika shakashinyawiti.