1 Wantu woseri wa Israeli, kulawa ku mji gwa Dani mpaka Beeri Sheba, pamuhera na wantu wa isi ya Gileadi wawera shipinga shimu, walijojonira aku Mizipa, kulongolu kwa Mtuwa Mlungu. 2 Walongoziya woseri wa makabila ga Israeli walivaga mumpenyu zawu kulongolu kwa lijojoniru lwa wantu wa Mlungu. Wamashonta wa magulu yawana magumba laki elufu msheshi. 3 Na womberi wantu wa likabila lya Benjamini, wapata visoweru handa wantu wayawu wa Israeli wakwena kugenda Mizipa. Su Waisraeli wamkosiya mdala Mlawi, "Gutugambiri, ukondola awu utendeka hashi?" 4 Mlawi ulii, mpalu gwa mdala ulii yawamlagiti, kawankula, "Neni na mdala gwangu tusokiti kumjini Gibea, mji gwa likabila lya Benjamini su tugonji aku pashiru. 5 Kumbiti wenikaya wa mji gwa Gibea wiza pashiru wayizyengetiti numba mwaweriti ng'onja. Wafiriti wandagi, ira wamgonjiti kwa makakala mdala gwangu mpaka kahowa. 6 Neni ntola mauti gakuyi, numhanjangahanjanga na kuvijega kila shipindi kwa kila likabila lya Israeli, toziya watenda shitwatira sha udoda na sha soni Muisraeli. 7 Vinu mwenga Waisraeli woseri, mlitakuziyi na mlaviyi shampangiti."

8 Wantu woseri kwa pamuhera, wagoloka handa muntu yumu walonga, "kwahera yoseri pakati petu yanakawuyi mliringu lyakuyi ama ukaya kwakuwi. 9 Hangu ndo ntambu yanatuwatenderi Gibea. Hatugalambuli simbi na kulola likabila gaa haligendi kulikomanga. 10 Hatusyaguli wantu lilongu mukila wantu miya yimu wa Israeli, wantu miya yimu mukila wantu elufu yimu, wantu elufu yimu mukila wantu elufu lilongu. Awa hawaweri na lihengu lya kuwajegera shiboga wayawu, yawawera na lihengu lya kugukomanga mji gwa Gibea muisi ya Benjamini kwa ukontola wawu wa soni yawautenditi muisraeli." 11 Hangu wapalu woseri wa Israeli wajojonika kwa moyu gumu kwajili ya kugukomanga mji gwa Gibea.

12 Wantu wa makabila ga Israeli watuma walagilagi kwa wantu wa likabila loseri lya Benjamini, pawalonga, "Hashi, ndo ukontola gaa awu yamuwutenditi pakati petu? 13 Vinu mtupanani wantu awa wadoda wa Gibea su tuwalagi na kuwusiya ukondola awu mkulu kulawa Israeli." Kumbiti wantu wa likabila lya Benjamini waweriti ndiri kala kuwapikinira walongu wawu Waisraeli wamonga. 14 Kumbiti wantu wa likabila lya Benjamini walijojonira aku Gibea kulawa mukila miji yawu, kugenda kulikoma na wantu wa Israeli. 15 Wantu wa likabila lya Benjamini walijojoniliti kulawa lushi zawu mashonta malongu mawili na sita elufu wawatumiya vimagi vikulu, na womberi wana lushi lwa Gibea wajojonira wantu miya saba yawawasyaguliti. 16 Pakati pa wantu awa yawasyagulitwi elufu ishilini na sita kuweriti na wantu miya saba yawatumiyiti liwoku lwa kumshigi, kila yumu kaweziti kaguma libuwi kwa kombewu na kuluguma luvili pota kulukosa. 17 Waisraeli, paguleka likabila lya Benjamini, wawajojoniriti wantu miya msheshi elufu yawaweza kutendera magumba. Woseri waweriti wagangamala wa nkondu.

18 "Waisraeli wagenda pahala pa kuguwira aku Beteli kumkosiya Mlungu, wapati kuvimana likabila gaa haligendi kwanja kulikomanga na wantu wa likabila lya Benjamini. Mtuwa Mlungu kalonga handa likabila lya Yuda ndo haligendi uti."

19 Su, Waisraeli wimuka mandawira wagenda, kutula malingu gawu pakwegera na lushi lwa Gibea. 20 Waisraeli wagenda na kuwatula wamashonta wawu kulikomanga na wantu wa likabila lya Benjamini aku Gibea. 21 Wantu wa likabila lya Benjamini walawa kunja kulushi lwa Gibea walikomanga na Waisraeli, wawalaga wantu wa Israeli malongu mawili na mbili elufu. 22 Kumbiti Waisraeli walipanana moyu, walitanda kayi kwa nkondu pahala palii pawagolokiti kwa mala ya kwanja. 23 Pamberi pa panu Waisraeli wagenda kumguwira Mlungu, wamlilira Mtuwa Mlungu mpaka pashimihi. Shakapanu wamkosiya Mtuwa Mlungu "Hashi, tugendi kayi kulikoma na walongu wetu wa likabila lya Benjamini?" Mtuwa kawankula, "Mkweni mkalikomi nawa." 24 Hangu lishaka lya pili Waisraeli wasegelera kulikoma na wantu wa likabila lya Benjamini. 25 Lishaka lya pili wantu wa likabila lya Benjamini walawa Gibea na kuwakomanga Waisraeli, wawalaga Waisraeli elufu lilongu na nani yawaweriti wavimana kulikoma. 26 Wamashonta woseri wa Israeli wawasigaliti wakwena kugenda Beteli. Walikala aku kulongolu kwa Mtuwa Mlungu pawadaya na koya kuliya mpaka pashimihi. Wamlavilira Mtuwa Mlungu tambiku za kulunguziya na tambiku za ponga. 27 Waisraeli wamluwa Mtuwa Mlungu aku shakutenda aku Beteri. Shaka ashi lisanduku lwa lipatanu lya Mtuwa paliweriti aku, 28 Finehasi mwana gwa Eleazari, mwana gwa Aroni kaweriti mtambika. Waisraeli wamkosiya Mtuwa, "Hashi, tugendi kayi kulikomanga na walongu wetu wantu wa likabila lya Benyamini?" Mtuwa Mlungu kawagambira, "Mkweni. Shirawu haniwapanani uwezu hamuwakanki."

29 Hangu, Waisraeli watula wamashonta mumafifu kuzyengeta mji gwa Gibea. 30 Waisraeli wagenditi kulikomanga na wantu wa likabila lya Benjamini mulishaka lya tatu. Wavitula vipinga vyawu pahala pakuyi ntambu yawatenditi Gibea kwanja. 31 Shakapanu wantu wa likabiala lya Benjamini pawalawiti kumjini kwanja kulikomanga na Waisraeli, wawanikiti kulawa kunja kumji. Ilawiriti kayi ntambu yawatenditi mashaka gapititi wawalaga wantu wamu wa Israeli kunjira nkulu zyazigenda miji ya Beteli na Gibea, mpaka kushiwala. Wawalagiti Waisraeli malongu matatu. 32 Wantu wa Benjamini walonga, "Tuwakomanga handa shaka shipititi." Kumbiti Waisraeli walonga, "twengapa tutugi su tuwaniki kutali na mji mpaka kunjira nkulu." 33 Hangu lishonta likulu lya Israeli ligenditi kulipanga kayi aku Baali Tamari. Na wayawu yawaweriti wankulotera walawa kalongola pahala pawu uwega wagulawa mshenji wa mji gwa Gibea. 34 Mashonta wagangamala yawasyagulitwi kulawa makabila goseri ga Israeli wasoka panu kulongolu kulushi lwa Gibea. Nkondu za lishaka ali ziweriti nkulu. Kumbiti wantu wa Benjamini wavimaniti ndiri handa kulaguwa kwawu kuweriti pakwegera. 35 Mtuwa Mlungu kawatanga wantu wa Benjamini kulongolu kwa Waisraeli, Waisraeli wawalaga wantu wa Benjamini malongu mawili na mhanu elufu na miya yimu. Woseri awa yawalagitwi waweriti mashonta yawaweziti kulikomera vimagi vikulu. 36 Na Wabenjamini wavimana handa wasinda.

wawuya ukaya handa wawatira wantu wa likabila lya Benjamini, iri kuwapanana lupenyu walii yawaweriti wawatula kulolera mji gwa Gibea. 37 Walii yawatulitwi kulotera mji walawiti kalongola na kugukomanga mji gwa Gibea na kuwalaga kwa ligumba wantu woseri yawaweriti amu. 38 Waisraeli waweriti watenda majimiranu kutula langiru na wagwandira handa pawaliwona lyosi paliwera yankukwena kumpindi kulawa kumji su wagukomangi mji. 39 Shipindi ashi wantu wa likabila lya Benjamini waweriti wawalagiti kala Waisraeli wantu malongu matatu. Hangu waligambirana, "Tuwakomanga handa mashaka gapititi." 40 Kumbiti lilangaliru lii lya lyosi kugenda kumpindi palyanjiti kulawira mumji, wantu wa likabila lya Benjamini pawaloliti kumbeli kwawu, walikangasha kuwona handa mji gwawu goseri gwankutuma lyosi. 41 Waisraeli ndo wagalambuka, na wantu wa kabila lya Benjamini waweriti wankwinginika toziya waliwoniti wamufuwiru. 42 Hangu wagalambuka kulongolu kwa Waisraeli kugendera kushiwala, kumbiti nkondu iwapata, waliwona wapakatikati pa mashonta gawalikomangiti naga na walii yawaweriti wankugwandira mji, su walaguwa. 43 Waisraeli, wawazyengeta wantu wa likabila lya Benjamini, wawawingawinga kulawa Noha mpaka kwagulawa mshenji kwa Gibea pawawalaga wavuwa wao. 44 Lishaka ali wantu kumi na nani elufu wa likabila lya Benjamini, Wanjagira woseri wagangamala, wawalagiti. 45 Wantu yawasigaliti wa likabila lya Benjamini wagalambukiti, watugira kushiwala mpaka ku litalawu lya Rimoni. Wamonga elufu mhanu walagitwi kunjira nkulu pawaweriti wankutuga. Waisraeli wendereyiti kuwafata wantu wa likabila lya Benjamini mpaka mji gwa Gidomu wawalaga wantu elufu mbili. 46 Wantu woseri wa likabila lya benjamini wawalagitwi lishaka ali waweriti elufu ishilini na mhanu, mashonta yawaweriti wagangamala wa kutendera ligumba.

47 Kumbiti wapalu miya sita wa likabila lya Benjamini waweziti kutugira kushiwala mpaka kulitalawu lwa Rimoni, walikala aku kwa shaka sha miyezi msheshi. 48 Waisraeli wawagalambukila wantu wamonga wa likabila lya Benjamini wawalaga woseri, wapalu na wadala na wana na wankanyama. Na kila shintu na kila miji yawayiwoniti aku wavilunguziyiti.