1 Aga ndo maisi Mtuwa Mlungu kagalekiti su kawajeri Waisraeli weni waweriti haweni likomi nkondu muisi ya Kanaani. 2 Katenditi hangu su kuwapanana wantu wa viyiwuka avi malifa ga kulikomanga toziya waweriti haweni woni nkondu. 3 Awa yawasigaliti muisi ndo wakulu wamhanu wa Wafilisti na Wakanaani woseri na Wasidoni na Wahivi yawalikaliti mumigongu ya Lebanoni kulawa lugongu Baali Herimoni mpaka Hamati.

4 Mtuwa Mlungu kafiliti kuwatendera awa su kawajeri Waisraeli, kawoni handa hawajimili lagiru zakuwi zakawalagaliriti wazewi wawu kupitira Musa. 5 Su, Waisraeli walikaliti pamuhera na Wakanaani na Wahiti na Waamori na Waperizi na Wahivi na Wayebusi. 6 Wayugiti wahinga wawu na kuwayugiziya wahinga kwa wantemba wa maisi aga na kuwaguwira wamlungu wawu.

7 Waisraeli watenda ukontola kulongolu kwa Mtuwa Mlungu wamulwaluwiti Mtuwa Mlungu gwawu, Waguwira Mabaali na Maashera. 8 Su, maya ga Mtuwa Mlungu gakalipa kwa Israeli, na yomberi kawatula mumawoku mwa Kushani Rishataimu mfalumi gwa Haramu Naharaimu na womberi wamtendera kwa shaka sha vinja vinani. 9 Waisraeli wamlilira Mtuwa Mlungu na yomberi kawajegera muntu gwa kuwalopola, Otinieli mwana gwa Kenazi, mpusu gwa Karebu. 10 Su, rohu ya Mtuwa Mlungu imwizira Otinieli, na yomberi kawera mloguziya gwa Waisraeli. Otinieli kagenditi kunkondu na Mtuwa Mlungu kampanana Otiniheri uwezu wa kumkanka Kushani Rishataimu mfalumi gwa Aramu. 11 Hangu isi iwera na ponga kwa shaka sha vinja malongu msheshi. Shakapanu Otinieli mwana gwa Kenazi, kahowa.

12 Waisraeli watenditi kayi ukontola kulongola kwa Mtuwa Mlungu. Mtuwa Mlungu kampanana likakala mfalumi gwa Egiloni gwa Moabu kawakomangi Waisraeli, toziya watenditi ukontola kulongolu kwa Mtuwa Mlungu. 13 Egiloni kawajojoniriti Waamoni na Waamaleki, kagenda kulikomanga na Waisraeli, kawakanka. Kagutola kwa makakala mji gwa Mitendi gweni ndo Yeriku. 14 Waisraeli wamtendera mfalumi Egiloni gwa Moabu, kwa shaka sha vinja lilongu na minani.

15 Kumbiti Waisraeli pawamliriti Mtuwa Mlungu, na yomberi kawajegeriti muntu gwa kuwalopola, Ehudi mwana gwa Gera yakatendera lihengu liwoku lya kumshigi, gwa likabila lya Benjamini. Waisraeli wamtumiti kajegi mafupu gawu kwa Egiloni mfalumi gwa Moabu. 16 Ehudi kalinyawira ligumba lyana ukola kuwili, utali wakuwi sentimita malongu mhanu. Kalitawa mushunu shakuyi uwega wa kumliwu mngati muguwu yakuwi. 17 Shakapanu kamjegera mfalumi Egiloni gwa Mowabu mafupu galii. Egiloni kaweriti muntu kanenepa nentu. 18 Ehudi pakamaliliti kulaviya mafupu, kawagambira wantu yawajegiti lifupu, wawuyi ukaya. 19 Kumbiti yomberi pakasokiti kushinyagu sha mabuwi yagasongolitwi pakwegera na Giligali, kamwuyira Egiloni kalonga, "Nana ulagilagi wa gwenga wa bada, mtuwa mfalumi." Mfalumi kawagambira wantumintumi walikali jii na womberi walawa kunja. 20 Na Ehudi kapasegeleriti pakalikaliti palii mshumba shakuyi shana mpepu, kamgambira "Nana ulagilagi kwa gwenga kulawa kwa Mlungu." Mfalumi kagoloka pashiti pakuyi. 21 Ehudi kalisomola ligumba lyakuyi kwa liwoku lyakuyi lya kumshigi kulawa muliwondu lyakuyi lya kumliwu, kamsoma kumtima gwakuyi. 22 Limagi lingira mngati pamuhera na mhanya gwakuyi, lipaki liligipikira limagi ali toziya Ehudi kalisomola ndiri limagi lilii kayi, liwera lilawira kwa kumbeli. 23 Shakapanu, Ehudi kalawa kunja kumdamu pakayitatiti kala migomi ya shumba ashi kwa Ufunguu.

24 "Ehudi pakawukiti, wantumintumi wa mfalumi wawuya. Pawawoniti migomi goseri ga shumba wagatata, waliholiti kagenda kushowu sha mngati mwa numba." 25 Wahepera mpaka wanja kuwera na shashatika. Pawawoniti kavugula ndiri, watola ufunguu na kuvugula migomi. Wamwona mfalumi gwawu kagonja pasi, kahowa kala.

26 Pawaweriti wanguhepa, Ehudi katoloka kapitira kuvinyagu vya mabuwi, kagenda Seira. 27 Pakasokiti aku muisi ya migongu ya Efraimu kagomba lipenga, na Waisraeli wasuluka pamuhera na yomberi kulawa kumigongu aku na yomberi kawalongolera. 28 Kawagambira, "Mnfati, toziya Mtuwa Mlungu kawalekera wankondu wenu Wamoabu mumawoku mwenu." Wamfata mpaka shiloku sha Yoridani na kushitola kwa makakala shiloku shashigendera Mowabu, wadiwa muntu yoseri nakapita. 29 Lishaka ali, wawalaga Wamowabu elufu lilongu, wantu woseri wana afya na makakala, kwahera ata yumu yakatolokiti. 30 Lishaka ali Waisraeli wawakanka Wamoabu. Isi iwera na ponga kwa shaka sha vinja semanini.

31 Pa Ehudi Shamgari mwana wa Anati, kaweriti katola lupenu lwakuyi. Kawalagiti Wafilisti miya sita kwa luhonga lwa kulolelera wang'ombi. Na yomberi viraa kawalopoziyiti Waisraeli.