1 Wantu wa Efureimu wajojonikiti waloka lushemba Yoridani kushana kwa Yefuta wamgambira, "gwenga gutulekiti kugenda kunkondu kulikomanga na Waamoni, toziya gutugambira ndiri kuwera pamuhera na gwenga. Vinu na twenga hatuilunguziyi numba yaku pamuhera na gamweni mngati."

2 Yefuta kawagambira, "Neni pamuhera na wantu wangu tuweriti na unkondu mkulu na Waamoni. Niwaluwani muntangi kumbiti mwiza ndiri kuntanga. 3 Pamoniti mwiza ndiri kundopuziya, makaliru gangu gaweriti mukuhowa, ndokiti ng'enda kulikomanga na Waamoni na Mtuwa Mlungu kampanana uwezu wa kuwakanka. Hashi lishaka lya leru mwiza kulikoma na neni?"

4 Su, Yefuta kajojonira wantu woseri wa Gileadi kalikomanga na wantu wa Efraimu. Wantu wa Gileadi wawakanka wantu wa Efraimu, Awa Waefuraimu ndo awa yawaweriti walonga. "Mwenga wantu wa Gileadi ndo watuga isi wa likabila lya Efraimu wamlawiti mulikabila lya Efraimu mgenda kulikabila lya Manasi." 5 Shakapanu Wagiliyadi wavilopola viroku vya lushemba Yoridani su kuyidiwa njira ya wantu wa Efraimu. Kila mala pakalawiriti mtira isi kupita aku, wantu wa Gileadi wamkosiyiti, "Hashi, gwenga ndo Mwefuraimu?" Na handa kankuliti, "Ndala," 6 Wamgambiliti. "Shondi gulongi Shiboleti" kumbiti yomberi kakanta "Siboleti," toziya Waefurahimu waweziti ndiri kulikanta weri. Panu, wamkamliti, wamlaga aku kushiloku sha lushemba Yoridani. Wantu arubaini na mbili elufu wa Efraimu wahowiziyiti makaliru gawu shaka ashi. 7 Yefuta kaweriti mtoza muisi ya Israeli mivinja sita. Shakapanu kahowa, kasiluwa mulushi lwakuyi aku Gileadi.

8 Pa Yefuta kuhowa, Ibizani kulawa Betilehemu kawera mtoza gwa Israeli. 9 Yomberi kaweriti na wana wapalu selasini na wadala malongu matatu. Na wahinga wakuwi selasini kawayugiziyiti kunja kulukolu lwakuwi, na wana kawayugiriti wahinga selasinii kulawa kunja kulukolu lwakuwi. Ibizani kaweriti mtoza gwa Israeli kwa vinja saba. 10 Ibizani Kahowiti, kasiluwa mulushi Betilehemu.

11 Pa kuhowa Ibizani, Eloni gwa likabila lya Zebuluni, kawera mtoza gwa Israeli kwa vinja lilongu. 12 Na pakahowiti, kasiluwa kulushi Aiyaloni muisi ya likabila lya Zebuluni.

13 Pa kahowiti Eloni, Abidoni mwana gwa Hileli kulawa Piratoni kawera mtoza gwa Israeli. 14 Yomberi kaweriti na wana wapalualubaini na wazukulu selasini mweni yawakweniti punda sabini. Kaweriti mtoza gwa Israeli kwa vinja vinani. 15 Shakapanu Abidoni mwana gwa Hileli Mpiratoni kahowa, kasiluwa kumjini Piratoni muisi ya likabila lya Efraimu kuisi ya migongu ya Waameleki.