1 Aku Gileyadi kuweriti na muntu shikambaku yawamshemiti Yefuta, mwana gwa mawu yumu mhumba, na tati gwakuyi yawamshemiti Gileyadi. 2 Gileyadi kaweriti viraa na wana wamonga kwa mdala gwakuyi mweni. Wana wa mdala ayu pawaweriti wakulu, wamwingiti Yefuta kulawa ukaya, wamgambira, "Gwenga gwahera uhala kulawa kwa tati gwetu, toziya, gwenga gwa mwana gwa mdala yumonga." 3 Su, Yefuta kawatira walongu wakuyi kagenda kulikala muisi ya Tobu. Aku wantu wadoda waweriti pamuhera na yomberi wamfata, wagenda nayu pakagenditi kulikomanga.

4 Pa shaka tunga, Waamoni wawakomangiti Waisraeli. 5 Shaka pawaweriti wankulikomanga na Waamoni, wazewi wa Gileyadi wagenda kumjega Yefuta kulawa isi ya Tobu, 6 Wamgambira, "Gwizi gutulonguziyi munkondu patulikomanga na Waamoni."

7 Kumbiti Yefuta kawagambira wazewi awa wa Gileyadi, "Hashi, ndo munkalaliliriti ndiri ata muwinga kulawa kwa walongu wa tati gwangu? Kwa shishi vinu munizira pamuhera mukutabika?"

8 Wazewi awa wa Gileyadi wamgambira, "Ndo mana tukwizira vinu su gugendi na twenga kulikoma na Waamoni, na patuwakanka kala gwenga haguweri mlonguziya gwetu na gwa wantu woseri yawalikala Gileyadi."

9 Yefuta kawagambira wazewi awa wa Gileyadi, "Handa pang'enda na mwenga kulikoma na Waamoni shakapanu Mtuwa Mlungu kantenda niwakanka, neni haweri mlonguziya gwenu."

10 Wazewi walii wa Gileadi wamgambira Yefuta, "Mtuwa Mlungu hakaweri kapitawu pakati pa twenga. Nakaka hatutendi ntambu yagulongiti." 11 Yefuta kagenda pamuhera na Wazewi wa Gileadi, na wantu wamtenda mtuwa gwawu na mlongoziya gwawu munkondu. Yefuta kulogolu kwa Mtuwa Mlungu kalonga kayi matakuluwa gakuyi goseri kawagambiriti wazewi.

12 Yefuta katuma walagilagi kwa mfalumi gwa Amoni kamgambira, "Gwana ndewu gaa na twenga ata gwiza kuyikomanga isi twenga?"

13 Mfalumi gwa Amoni kawawankula walagilagi awa, "Waisraeli pawalawiti Misri, watoliti isi ya neni kulawa lushemba Arinoni mpaka lushemba Yaboki na lushemba Yoridani. Hangu mumbuziliri isi ya twenga kwa ponga."

14 Yefuta katuma kayi walagilagi kwa mfalumi gwa Amoni. 15 Mumugambiri Yefuta kalonga, "Waisraeli watoliti ndiri isi ya Wamowabu pota isi ya Waamoni. 16 Shaka Waisraeli pawalawiti Misri, wagenditi kushiwala mpaka bahari ya Shamu mpaka Kadeshi. 17 Shakapanu Waisraeli watuma walagilagi kwa mfalumi gwa Edomu wamluwa kawajimiri kupita muisi yakuyi. Kumbiti mfalumi gwa Edomu kalema. Su wamluwa njimiru mfalumi gwa Moabu na yomberi viraa kalema. Hangu Waisraeli wasigala Kadeshi. 18 Shakapanu wagenda kupitira kushiwala kuzyengeta isi ya Edomu na Mowabu mpaka pawasokiti uwega wagulawa mshenji wa Moabu. Wanyawa ng'onjeru kumwambu kulushemba Arinoni, kumbiti wingira ndiri muenewu lya Moabu. Lushemba Arinoni ndo lwaluweriti mumbaka ya Moabu. 19 Panu Waisraeli wawatumiti walagilagi kwa Mfalumi Sihoni gwa Waamori aku Heshiboni, wamluwa kawajimiri kupita muisi yakuyi wagendi muisi yawu. 20 Kumbiti Sihoni kawajimira ndiri Waisrali wapiti muisi yakuyi. Su, Sihoni kajojonira wantu wakuyi woseri, watula ng'onjeru aku Yahasa, kalikomanga na Waisraeli. 21 Na yomberi Mtuwa Mlungu, Mlungu gwa Israeli, kamtenda Sihoni pamuhera na wantu wakuyi woseri wasindi na Waisraeli. Hangu Waisraeli watola isi yoseri ya Waamoni yawaweriti walikala. 22 Walitola enewu lyoseri lya Waamori kwanjira lushemba Arinoni mpaka lushemba Yaboki, na kwanjira kushiwala uwega wagulawa mshenji mpaka uwega wa kwaguzyeta mshenji mwa lushemba Yoridani. 23 Hangu, Mtuwa Mlungu wa Israeli, kayitola isi kwa Waamori. Hashi, gwenga gufira kutupoka isi ya twenga? 24 Gutosheki na shilii mlungu gwaku Kemoshi kakupanana. Kumbiti isi yoseri Mtuwa Mlungu gwetu yakawawingiti wenikaya wakuyi na kutupanana twenga ayi ndo yetu. 25 Hashi gwenga ndo gwa makakala nentu kuliku Balaki mwana gwa Zipori yakaweriti mfalumi gwa Moabu? Yomberi kashindaniti ndiri na Waisraeli ama kulikoma nawa. 26 Shipindi shoseri Waisraeli pawalikaliti kumjini Heshiboni na vijiji vyakuyi, na lushi lwa Aroeli na vijiji vyakuyi pamuhera na lushi zoseri zaziweriti kumpekumpeku mwa lushemba Arinoni kwa shaka sha vinja miya tatu, kwa shishi guliwuziya ndiri enewu ali shaka ashi? 27 Neni nukukoseya ndiri shintu na ndo mana gutenda likosa pagunkomanga. Mtuwa Mlungu ulii ndo mtoza hakatozi leru pakati pa Waisraeli na wantu wa Amoni." 28 Kumbiti mfalumi gwa Waamoni kaupikinira ndiri ulagilagi ulii weni Yefuta kamjegeriti. 29 Shakapanu Rohu ya Mtuwa Mlungu imwizira Yefuta, na yomberi kawuka na kupita Gileyadi na Manase, kawuya Mizipa muisi ya Gileyadi na kwendeleya mpaka Amoni. 30 Yefuta kamlapira Mtuwa Mlungu pakalonga, "Handa nakaka paguntenda niwakanki Waamoni, 31 su, shoseri shanaliwona nashi shashilawa shaka pambuya kuwakomanga Waamori, ashi hashiweri sha gwenga Mtuwa Mlungu, hanikulaviliri tambiku ya kulunguziwa."

32 Su, Yefuta kaloka lushemba, kalikomanga na Waamoni. Na Mtuwa Mlungu kamtenda kawakanki Waamoni. 33 Kalitolera ukanka mkulu, kalopola miji ishilini yayiweriti pakati pa Aroeri, seemu zazizyengetiti Miniti na Abeli Keramimu. Su Waamoni wasinda nakamu na Waisraeli.

34 Yefuta pakaweriti kankuwuya ukaya kwakuyi aku Mizipa, mhinga gwakuyi kalawa kunja kumwanka pakavina na kugomba shingoma. Na yomberi kaweriti Mwana gwakuyi gwa gweka. Yefuta kaweriti ndiri na mwana gwingi mpalu pota mdala. 35 Yefuta pakamwoniti, kapapula nguwu zakuyi kwa kwinginika na kulonga, "Gwee mhinga gwangu! Guntweziya moyu. Gwenga guwera shanziru shikulu sha matatizu kwa neni. Numlapira kala Mtuwa Mlungu na neni mbeza ndiri kumega kulirapa kwangu."

36 Na yomberi kamgambira, "Tati, handa gumlapira Mtuwa Mlungu shintu, su guntenderi ntambu yagutakuliti, toziya Mtuwa Mlungu kakuwuzililira kwa wankondu waku Waamoni." 37 Shakapanu, kamgambira tati gwakuyi, "Nduwa shitwatira shimu ashi, gunupi shaka sha miyezi miwili, ng'endi na waganja wangu kulugongu, ndiri toziya hahowi pota kuyugwa." 38 "Tati gwakuyi kamjimira kagendi aku kwa miyezi miwili. Na yomberi kagenda pamuhera na waganja wakuyi, wadaya kuhowa kwakuyi pamberi pa kuyugwa." 39 Pa miyezi miwili kawuya ukaya, shakapanu tati gwakuyi kamtendera kulinganira na usali wakuyi. Mhinga ayu kaweriti nafunda. Su, kwanjira shaka ashi kuwera na shitiba ashi Muisraeli. 40 Kila shinja wahinga wa Israeli wagenda kudaya kwa mashaka gamsheshi kwa kumhola mwana Yefuta gwa Gileyadi.