1 Waisraeli watenditi ukontola kulongolu kwa Mtuwa Mlungu, na Mlungu kawatula mumawoku ga Wamidiyani kwa shaka sha vinja saba. 2 Wamidiyani wawayoniriti nentu Waisraeli, mpaka walibawira malindi na mpanga mumigongu kuwera ngomi zawu.

3 Kila shaka Waisraeli pawayaliti mbeyu mumalambu, Wamidiyani na Waamaleki na wantu wamonga wa aku kwagulawira mshenji wiziti wawakomanga. 4 Maisi aga ganyawiti malingu muisi, gawakomanga na kuhalibisiya viboga vyawu vyoseri muisi mpaka mumpaka za Gaza, wawalekera ndiri shoseri Muisraeli, kaweri kondolu, ng'ombi ama punda. 5 Wiziti na malingu gawu na mifugu yawu handa wanjombi, pamuhera na ngamia wawu na kutenda makawu gawu muisi Israeli, wahalibisiyiti isi ya Israeli toziya womberi na wangamia wawu waweriti wavuwa nentu pota kuwalangika. 6 Waisraeli wawusiyitwi makakala nakamu na Wamidiyani mpaka Waisraeli wamlilira Mtuwa Mlungu kawatangi.

7 Waisraeli pawamliliti Mtuwa Mlungu kawawusiliri ntabika yawapatiti kulawa kwa Wamidiyani, 8 Mtuwa Mlungu kawajegera mbuyi, na yomberi kawagambira, "Mtuwa Mlungu, Mlungu gwa Israeli kalonga hangu, niwalaviyiti muisi ya Misri kweni muweriti wamanda. 9 Niwalopuziya mumawoku mwa Wamisri woseri yawawatabisiyiti. Nuwawinga wantu kulongolu kwenu pamuweriti pamwiza na kuwapanana mwenga isi yawu. 10 Niwagambiziya handa neni ndo Mtuwa Mlungu, Mlungu gwenu na handa namuwaguwira wamlungu wa Waamori, ambawu mulikala mu isi yawu, kumbiti mulipikinira ndiri liziwu lya neni."

11 Ntumintumi gwa Mtuwa Mlungu kagenda, kalivaga pasi pa mtera gwa mwaloni gwa Yoashi muntu gwa lukolu lwa Mwaabiezeri, aku Ofura. Gidiyoni mwana gwa Yoashi, kaweriti kankupeta ngano mngati mwa likamiru lya kukamira zabibu su Wamidiyani nawamwona. 12 Ntumintumi gwa Mtuwa Mlungu kamlawira, kamgambira, "Mtuwa Mlungu kapamuhera na gwenga, gwee shikambaku."

13 Gidiyoni kamgambira, "Gwee Mtuwa gwangu, payiwera Mtuwa Mlungu kapamuhera na twenga, mbona vitwatira vyoseri avi vitupata? Vyakoshi vitwatira vyaku vya kulikangashira vyeni wazewi wetu watutambiriti, pawalonga. Mtuwa Mlungu ndo yakatulaviyiti muisi ya Misri. Kumbiti vinu Mtuwa Mlungu katwasa na kututula muukola mlima mwa Wamidiyani!"

14 Mtuwa Mlungu kamgalambukira, kamgambira, "gugendi kwa likakala lyaguwera nalu, gukayilopuziyi Israeli kulawa kwa Wamidiyani. Ndo neni yanikulagalira."

15 Gideoni kamwankula, "Shondi Mtuwa, Hawezi hashi kuyilopuziya Israeli? Lukolu lwangu ndo wahushu nakamu mulikbila lya Manasi na namweni neni ndo muntu gwa pasi muwalongu wetu!"

16 Mtuwa Mlungu kamgambira, "Hanikupanani uwezu na gwenga haguwalagi Wamidiyani handa virii gulaga muntu yumu."

17 Gidiyoni kamgambira, "Handa pagunjimira pamasu paku, gunanguziyi lilanguliru su nivimani handa ndo gwenga nakaka yaguyowira na neni. 18 Nikuluwa naguwuka panu mpaka pambuya na kukujegera lifupu lyangu na kulitula kulongolu kwaku." Na yomberi kankula, "Hanilivagi panu mpaka paguwuya."

19 Gidiyoni kagenda ukaya kwakuyi, katanda mwana gwa mbuzi na libumunda lwalilekeluwa ndiri simika katendera kilu lilongu lya ubumu, kalekera shinofu mkati mushikapu na mshwiku mushiwiga, shakapanu kamjegera pasi pa mtera gwa mwaloni, kampanana.

20 Ntumintumi gwa Mlungu kamgambira, "Gutoli shinofu na libumunda guvituli pampindi palitalawu ali. Shakapanu gulekeri mshwiku pampindi pa libumunda na shinofu." Na yomberi katenda hangu. 21 Ntumintumi gwa Mtuwa Mlungu katalipisiya luhonga lwaluweriti mliwoku lyakuyi, kashinkula shinofu na libumunda kwa upeleru wa luhonga. Vumu, motu gulawa kulitalawu, gulunguziya vinofu na mabumunda. Katepu ntumintumi gwa Mtuwa Mlungu kawuka kulongolu kwakuyi.

22 Gidiyoni ndo kavimana handa ayu kaweriti ntumintumi gwa Mtuwa Mlungu, kalonga, "shondi neni, gwee Mtuwa Mlungu, toziya niliwona na ntumintumi gwa kumpindi sheni kwa sheni."

23 Kumbiti Mtuwa Mlungu kamgambira, "Ponga iweri na gwenga! Nagutira, hapeni guhowi."

24 Gidiyoni kamnyawira Mtuwa Mlungu shitalawanda sha kutambikira aku na kupashema, "Mtuwa Mlungu ndo yakajega ponga." Pakutambikira palii pa aku Ofura, lushi lwa Wabiezeri.

25 Pashiru palii, Mtuwa Mlungu kamgambira Gidiyoni, "Gutoli ng'ombi shipalu mdidini yumu gwa tati gwaku, ng'ombi shipalu mdididni gwa pili gwa vinja saba. Gubomoli pakutambikira pa Baali pakawera napa tati gwaku na kumeganga shinyagu sha Ashera shashiwera pakwegera nashi. 26 Shakapanu, gunyawili neni Mtuwa Mlungu, Mlungu gwaku, shitalawanda sha kutambikira ntambu yaifiruwa pampindi pashidunda ashi. Shakapanu gundaviliri tambiku ya kulunguziya ya ng'ombi ulii pagutendera mpanda za shinyagu shilii sha Ashera shagushimegangiti."

27 Su, Gidiyoni kawatola wantumintumi wakuyi lilongu, katenditi ntambu yakalagaliritwi na Mtuwa Mlungu. Kumbiti toziya katiriti walongu wakuyi na wantu wa kumjini, katenditi ndiri paliwala, katenditi shaka sha pashiru.

28 Weni kaya wa mji pawimkiti mandawira putiputi wawoniti shitalawanda sha kutambikira sha Baali na shinyagu sha Asheri shashiweriti pakwegera nashi wavihalibisiya. Ng'ombi shipalu mdidini uli kaweriti kalunguziwa pampindi pa kutambikira papaweriti wapanyawiwa pahala panu. 29 Walikosiya, "Gaa katenda shitwatira ashi?" Pawalolitiloliti wayambula handa Gidiyoni mwana gwa Yoashi ndo yakaweriti katenditi hangu. 30 Wenikaya wa mji wamwizira Yoashi, wamgambira, "Gumlaviyi mwana gwaku tumlagi, toziya kahalibisiya shitalanda sha kutambikira sha Baali na kayimeganga shinyagu ya Ashera yayiweriti pakwegera nashi."

31 Yoashi kawagambira woseri walii yawamgenderiti, "hashi, mwankumtakulira Baali? Hashi, hammulopuziyi? Yoseri yakamtakulira hakalagwi pamberi pa kushiya. Handa Baali ndo Mlungu nakaka, su, kalitakuliri mweni toziya shitalawanda sha kutambikira shakuyi shihalibisiwa." 32 Lishaka ali wamshema Gidiyoni "Yeru Baali" mana yakuyi, "Baali na kalitakuliri palongolu pakuyi." Toziya kabomola shitawanda sha kutambikira sha Baali.

33 Wamidiyani na Waamaleki na wantu woseri wa kwagulawa mshenji wajojonika wagenda na kunyawa malingu gawu mululalanda lwa Yezireeli.

34 Shakapanu Rohu ya Mtuwa Mlungu imlonguziya Gidiyoni. Gidiyoni kagomba lipenga kuwashema Wabiezeli wizi wamfati. 35 Kawatuma walagilagi muisi yoseri ya Manasi wizi wamfati. Walagilagi wamonga kawatuma kuwashema wantu wa makabila ga Asheri, Zebuluni na Nafutali, na womberi wiza wawera pamuhera na yomberi.

36 Gidiyoni kamgambira Mlungu, "Payiwera haguyilopuziyi Israeli kwa kupitira neni ntambu yagutakuliti, 37 vinu nankuntula likuli lya kondolu na mibahira pahala panu pakupepetera nganu. Payiwera hakuweri na mangami pampindi pa likuli hera na pasi yayizyengeta payiwera iyuma, su, hanivimani handa hagulopuziyi Waisraeli kwa kupitira neni ntambu yagulongiti." 38 Su iwera hangu, toziya pakimkiti mandawira shirawu yakuyi, kakamiti mangami yagaweriti mulikuli, kamemeziya bakuli. 39 Gidiyoni kamgambira Mlungu, "Shondi nagunkalalira. Nduwa ntakuli mala yimu hera. Nikuluwa gunjimili ntenderi likuli lilii kutenda lijeru limonga. Nikuluwa pampindi pa likuli lyana mibahira paweri payuma, kumbiti pasi kuweri na mangami."

40 Mlungu katenda hangu pashiru palii, toziya, likuli liweriti liyuma na kumbiti kuweriti na mangami pasi poseri kuzyengeta likuli lilii.