1 Lishaka limu, Samsoni kasulukiti na kugenda Timna kweni kamwoniti mhinga yumu Mfilisiti. 2 Pakawuyiti ukaya kawagambira walera waku, "Nimwona mhinga yumu Mfilisti aku Timna. Muheteri mhinga ayu." 3 Kumbiti walera wakuwi wamgambira, "Hashi, kwahera mhinga yoseri muwamu mwa walongu waku ama pakati pa wantu wetu ata gugendi kuheta kwa Wafilisti yawingira ndiri jandu?" Kumbiti Samsoni kamgambira tati gwakuyi, "Mheteri mhinga ayu, toziya kaherepa nentu."

4 Walera wakuwi wavimaniti ndiri handa agu guweriti mpangu gwa Mtuwa Mlungu kaweriti kankumtanda Samsoni su kawakangi Wafilisti. Shaka ashi, Wafilisti wawakolitimlima Waisraeli.

5 Samsoni na walera wakuwi wawukiti kugenda Timna. Pawasokiti aku kulilambu lya mizabibu, vumu simba mdidini yumu kalawira na yomberi kaweriti pakawunguluma kumgendera Samsoni. 6 Vumu, Rohu gwa Mtuwa Mlungu kamtenda Samsoni kaweri na likakala, kampapula simba ayu kwa mawoku gakuyi handa muntu yakampapuliti mwana gwa mbuzi. Na Samsoni kawagambira ndiri walera wakuwi shakashitenditi. 7 Pawasokiti Timna Samsoni kagenda kuyowera na mhinga ulii, mhinga ayu yakamfiliziya nentu Samsoni. 8 Pa mashaka gavuwa ndiri kawuyiti aku Timna kumtola mhinga ayu. Pakaweriti munjira kasepuka kumbwega kulola shifuwiru shilii sha simba, na kumbiti kuweriti na wanjushi na lwashi mushifuwiru sha simba ulii. 9 Su, kayamba lwashi kwa mawoku gakuyi kaweriti kankuliya agawu pakendereya na mwanja gwakuyi. Pakawuyiti kwa walera wakuwi, kawapanana lwashi shididini na womberi waliya. Kumbiti kawagambiriti ndiri handa kalaviyiti lwashi alu mngati mshifuwiru sha simba.

10 Tati gwakuwi kagenda ukaya kwa mhinga ulii na Samsoni katenda msambu aku, ntambu yawatenda wantemba shaka ashi. 11 Wafilisti pawamwoniti Samsoni wamjegera wantemba selasini walikali na yomberi kumsambu. 12 Samsoni kawagambira, "Hantambi shitendawili. Handa pamuweza kushiyambula shitendawili ashi kwa shipindi sha mashaka saba ga msambu gwa ndowa, su, haniwapanani nguwu nfufu selasini na nguwu selasini za msambu. 13 Kumbiti pamuweza ndiri kushiyambula, mwenga hamnupi nguwu nfufu selasini na nguwu selasini za msambu." Na womberi wamgambira, "Aya gutambi shitendawiri ashi."

14 Kawagambira.

"Kwa mliya kulawira kuliya shiboga,

kwa yakana likakala kunoga."

Pamashaka matatu wantemba waweriti waweza ndiri kuyambula shitendawili ashi.

15 Lishaka lya saba wamgambira mdala gwakuwi Samsoni, "Gumzyangizyangi mpalu gwaku su katugambili mana ya shitendawili ashi, hera hangu hatukulunguziyi kwa motu gwenga pamuhera na numba ya tati gwaku. Hashi, mtushemiliti panu kwiza kutupoka lunda zetu?" 16 Mdala gwa Samsoni kamgendera Samsoni, agawu masozi pagalawa, "Gwenga gunkalalira hera gunfira ndiri. Guwatambiriti wantemba wa twenga shitendawili kumbiti neni gung'ambira ndiri." Kumbiti Samson kamwankula, "Neni niwagambira ndiri ata walera wangu, vinu hawezi hashi kukugambira gwenga?" 17 Kumbiti kendereyiti kulila shaka shoseri shashisigaliti sha mashaka saba ga msambu gwa ndowa. Lishaka lya saba Samsoni kamgambira mdala gwakuwi mana ya shitendawili shilii toziya kamubabanikiti nentu. Mdala gwakuwi kagenda kamukamu kawagambira wantu wakuwi. 18 Lishaka ali lya saba, pamberi pa mshenji kwinala, wamgambira Samsoni, "ndo shintu gaa shinoga kuliku lwashi? Ndo gaa kana likakala kuliku simba?" Samsoni kawankula, "Handa memulimi ndiri na ng'ombi gwa shididini memuwezi ndiri kushiyambula shitendawili shangu."

19 Panu rohu ya Mtuwa Mlungu imwizira Samsoni kwa likakala, na yomberi kagenda kumjini Ashikeloni, kawalaga wantu selasini, shakapanu katola nguwu zawu za msambu, kawapanana walii wawayambuliti shitendawili shakuyi. Shakapanu kawuka, kagenda ukaya kwa walera wakuwi pakawera na maya. 20 Na mdala gwakuwi Samsoni wamhetiziya kwa ganja gwakuyi yakaweriti mgolokera lishaka lya ndowa yakuyi.