1 "Pa shaka tunga, shaka sha kubenanga nganu, Samsoni katoliti mwana gwa mbuzi, kagenditi kumtyangira mdala gwakuwi. Kamgambira mganafu gwakuwi handa kafira kumlola mdala gwakuwi kushumba shakuyi. Kumbiti mganafu gwakuwi kamubelera nakagenda," 2 mganafu kwakuyi kamgambira, "Neni niliholiti handa gumlema nakamu. Hangu numyugiziya yumu gwa ganja gwaku. Ata hangu, mpusu gwakuwi kaherepa nentu kuliku yomberi. Gumyugi ayu pa yomberi." 3 Samsoni kamgambiriti, "Mwanja agu paniwatenda Wafilisti hapeni weri na vidoda."

4 Samsoni su kagenda, kawakamla vibweta miya tatu na kawatawa mishira yawu pamuhera wawiliwawili. Shakapanu katula mambamba mukila shipinga sha vibweta. 5 Shakapanu kayipamba motu na kuwalekiziya wavibweta awa wingiriti kumalambu ga Wafilisti na kulunguziya ng'anda za nganu na nganu yayiweriti yankali kubenanga ata na malambu ga mizabibu na mtera ya mizeyituni. 6 Wafilisti pawafiliti kuvimana yakatenditi aga, wawagambiliti, "Ndo ayu Samsoni, mganafu kulawa Timna, katenda aga toziya mganafu gwakuwi kamyugiziyiti mdala gwakuwi kwa mntemba yumu yakaweriti ganja gwakuyi lishaka lya ndowa ya Samsoni." Su Wafilisti wagenda kumlunguziya motu mdala ulii pamuhera na tati gwakuwi.

7 Samsoni kawagambira Wafilisti, "Handa aga ndo gamtenditi, nulilapa handa hapeni mbuki mpaka mbuziliri gamntendiriti." 8 Su, kawakomanga na kuwalaga wavuwa. Shakapanu kagenda kulikala mumpanga ya litalawu lya Etamu.

9 Wafilisti wiza, watula kambi yawu muisi ya Yuda na kweneya mpaka mji gwa Lehi. 10 Wantu wa Yuda wamkosiya, "Hashi mwiza kutukomamanga?" Na womberi wawankula, "Twiza su tumtawi Samsoni na kumtendera ntambu yakatutenderiti."

11 Su, wantu elufu tatu wa Yuda wamgendera Samsoni kumpanga mwa litalawu lwa Etamu wamgambira, "Hashi guvimana ndiri handa Wafilisti watukola mlima twenga? Guloli su, madoda gagututenderiti!" Samsoni kawankula, "Handa vyawantendiriti ndo ntambu yaniwatenderiti."

12 Wamgambira, "Twiza kukutawa su tukutuli mumawoku mwawu." Samsoni kawagambira, "Mnapiri handa maweni mwenga hapeni mndagi."

13 Na womberi wamgambira, "Twenga hapeni tukulagi ila hatukutawi hera na kukutula mumakakala mwawu." Su, wamtawa kwa ngoyi mbili zyasyayi na kumlaviya amu mumpanga.

14 Pakasokiti Lehi, Wafilisti wamgendiriti mbiru agawu pawashowangana. Vumu Rohu ya Mtuwa Mlungu kamtenda kaweri na likakala na ngoyi zilii zawamtawiti mumawoku mwakuwi zikutukanga handa mikota ya majani yagakoliti motu na ntawaliru zituluka pasi. 15 Samsoni kapata lisaya liwisi lya punda, kalitendera kuwalaga wantu elufu yimu, 16 Shakapanu Samsoni kalonga,

kwa lusaya lwa punda,

"ndaga wantu elufu yimu.

Kwa lusaya lwa punda,

njojonira matita ga mauti." 17 Katepu pakamaliliti kutakula, kasa lisaya alu. Pahala palii kapashema Ramati Lehi, mana yakuyi ndo lugongu lwa lisaya.

18 Shakapanu Samsoni kayumuluwiti nentu. Su, kamluwa Mtuwa Mlungu, pakalonga, "Gwee Mlungu, gwenga ndo yagujegiti ukanka awu, kwa kuntendera neni ntumintumi gwaku. Hashi, vinu gundeki nfuwi na kuyumiluwa? Na kutolwa kwa makakala na Wafilisti awa yawingira ndiri jandu?" 19 Mlungu kagubutula pahala yapaweriti na lilindi aku Laki, kanyililiziya mashi. Samsoni kalanda mashi aga na likakala lyakuyi limuwuyira. Bwiru ayi wayishema Eni Hakore, yeni ayi ya aku Lehi mpaka leru.

20 Samsoni kaweriti mtoza gwa Waisraeli kwa mivinja malongu mawili, shaka sha Wafilisti pawaweriti wankukolamlima isi.