1 Abimeleki, mwana gwa Gidiyoni, kawagendera walongu na wana woseri wa makabila ga mawu gwakuyi kumji gwa Shekemu, kawagambira, 2 "Mtakuli palapanu kulongolu kwa wanalushi woseri wa Shekemu. Loshi liherepa kwa mwenga, handa wana woseri malongu saba wapalu wa Yeru Baali wawakoli mlima ama mwana yumu? Mliholi handa neni na mwazi gwenu." 3 "Walongu wa mawu gwakuyi wabwera visoweru avi Shekemu koseri toziya yakuwi, na wantu woseri wa Shekemu wamuwa kumfata Abimeleki toziya kaweriti mlongu gwawu." 4 Wampanana vipandi malongu saba vya mpiya vyaviweriti kunumba ya Baali Beriti vyeni kavitenderiti kuwalipa wantu wadoda na wantu yawafaa ndiri su wamfati. 5 Wagenda pamuhera Ofura kwa tati gwakuyi na aku kawalaga walongu wakuyi woseri malongu saba pampindi pa libuhi limu. Kumbiti Yotamu, mwana mpusu gwa Yeru Baali kaponikiti, toziya kalififiti. 6 Wana lushi woseri wa Shekemu na Beti Milo wajojonikiti kumwaloni yaguweriti pakwegera na mnala aku Shekemu, wamtenda Abimeleki kawera mfalumi gwawu. 7 Yotamu pawamgambiriti visoweru avi, kagenditi kugoloka pampindi pa lugongu Gerizimu, katakuliti kwa liziwu likulu, "Mumpikanili, mwenga wenikaya wa Shekemu pamfira Mlungu kawapikiniri na mwenga. 8 Lishaka limu, mitera igenditi kulisakulira mfalumi gwa kuyikolamlima. Su, igugambira mzeyituni, gutukolimlima twenga! 9 Kumbiti mzeyituni gwankula, mwe mwona mbeza kuleka lihengu lyangu lya kunyawa lipaki lyeni lifiruwa nentu na wamlungu na wantu, ng'endi kuligaziya kuyikolamlima mitera? 10 Shakapanu mitera igugambira mtini, gwizi gwenga gutukolimlima twenga. 11 Kumbiti mtini guyiyankula, hashi, mwe mwona mbeza kuleka lihengu lyangu lya kunyawa mabwajubwaju gaherepa na ganoga, ng'endi kuyiyegeziya mitera? 12 Shakapanu mitera igugambira mzabibu, gwizi gwenga guweri mkolimlima gwetu. 13 Kumbiti Mzabibu iyankula, mwe mwona mbeza kuleka lihengu lyangu lya kunyawa divayi yeni inemiziya wamlungu na wantu, ng'endi kuyiyegeziya mitera? 14 Upeleru wakuyi mitera yoseri igugendera mtera gwa misontu na kugugambira, gwizi gwenga gutukolimlima. 15 Mtera gwa misontu iyankula, handa nakaka mfira kusyagula kuwara mfalumi, mwizi mlivagi pasi pa shiviniru sha neni. Kumbiti handa pamlema kutenda hangu, su motu na gulawi mumisontu yangu na kuyilunguziya ata mierezi ya Lebanoni."

16 Yotamu kendereya kulonga, "Vinu su, mumtenda Abimeleki mfalumi kwa nfiru heri na uwaminika? Hashi, mwona mumtendera maheri Yeru Baali na kaya yakuyi ntambu yakafiruwitwi kwa matendu gakuyi? 17 Muliholi handa tati gwangu kaweriti muhatali kuhowa kwa kuwakomanira na kuwalopola kulawa kwa Wamidiyani! 18 Kumbiti leru muwakomanga walongu wa tati gwangu na kuwalaga wana malongu saba pampindi pa libuwi limu, shakapanu mmutenda mwana gwa Abimaleki ntumintumi gwa tati, kaweri mfalumi gwa weni kaya wa Shekemu toziya ndo muntu gwa lukolu lwenu. 19 Vinu Su, handa mumtendera aga kwa nfiru heri na kwa kumpanana ligoya Yeru Bali na kaya yakuyi, su, mnemeleri pamuhera na Abimeleki, na yomberi kanemeleri pamuhera na mwenga. 20 Kumbiti, handa ndiri, motu gulawi kwa Abimeleki na kuwalunguziya wanalushi wa Shekemu na Beti Milo, kayi motu gulawi kwa wanalushi wa Shekemu na Beti Milo na kumlunguziya Abimeleki."

21 Shakapanu, Yotamu katugila Beeri, toziya kamtiriti Abimeleki mlongu gwakuyi.

22 Abimeleki kakolitimlima Israeli kwa Shipindi sha vinja vitatu. 23 Shakapanu Mlungu kawatenda walilewi pakati pa Abimeleki na wantu wa Shekemu, na womberi wamtendera kwa upayira. 24 Shitwatira ashi shilawiriti toziya ya Abimeleki na wantu wa Shekemu, weni katenditi nawu mpangu gwa kuwalaga wana sabini wa Gidiyoni, ntambu ayi itendekiti su kuwuzilira kwa mwazi gwagwitikiti. 25 Wantu wa Shekemu wawatuliti wantu kumpindi kuupeleru wa vigongu wawagwandiri wantu yawapita na kuwapoka vintu vyawu. Abimeleki kagambiluwa shitwatira ashi.

26 Lishaka limu Gaali, mwana gwa Ebedi, pamuhera na walongu wakuyi wagenditi kulikala Shekemu. Wantu wa Shekemu waweriti wamjimira.

27 Walawa na kugenda kumalambu gawu ga mizabibu, wayapa zabibu shakapanu wazikama, wanyawa divayi watenda msambu.Wingira kunumba ya mlungu gwawu waliya na walanda, shakapanu wampangira Abimeleki.

28 Gaali, mwana gwa Ebedi, kalonga, "Abimeleki ndo gaa? Twenga panu Shekemu ndo wantu wa ntambu gaa ata tumtenderi Abimeleki? Gidiyoni na Zebuli mkulu gwakuyi vinu muwatenderi wantu wa Hamori, tati gwa Shekemu kumbiti kwa shishi, twengapa tumtenderi Abimeleki? 29 Handa wantu awa mewaweri pasi pangu, menumuwusiyi Abimeleki. Menumgambiri Abemeleki, gongeri mashonta waku, shapanu gwizi paweru tulikomangi."

30 Zebuli, mkolamlima gwa mji, pakapikiniriti visoweru vya Gaali mwana gwa Ededi, kakalaliti nentu. 31 Su kamjegeriti walagilagi Abimeleki kwa bada aku Torima pakalonga, "Gaali, mwana gwa Ebedi, pamuhera na walongu wakuyi wingira kumjini Shekemu na kusongiziya wantu wa Shekemu wakulemi. 32 Su, guwuyi gwenga na wantu waguwera nawa, shaka sha pashiru, gunyatiri kumalambu pakwegera na mji. 33 Katepu mshenji pagulawira shaka sha mandawira, gugukomangi mji. Gaali pakalawa pamuhera na wantu wakuyi kwiza kukukomanga, guwatenderi ntambu yaguwo ifaa."

34 Abimeleki kawukiti na wantu wakuyi woseri yawaweriti pamuhera na yomberi, wawagwandira wantu wa Shekemu pashiru pawawera muvipinga vyamsheshi. 35 Shakapanu Gaali mwana gwa Ebedi, kalawiti na kagolokiti muligomi likulu lya mji ndo Abimeleki na wantu wakuyi woseri walawiti pahala pawaweriti walififiti. 36 Gaali pakawawoniti kamgambira Zebuli, "Guloli, wantu wankuselera kulawa kumpeleru za lugongu." Zebuli kamgambira, "Gwenga guwona viviniru vya migongu gambira wantu."

37 Gaali kalonga kayi, "Guloli! Wantu wankusuluka pakati pa isi na shipinga shimonga shirawa uwega wamtera gwa Mwaloni gwa Watunga."

38 Shakapanu Zebuli kamgambira, "Maringu gaku ga koshi vinu? Gwenga ndiri yagutakuliti, Abimeleki ndo gaa? Ntambu gaa tumtenderi? Vinu, awa ndo wantu waguwabeziti, gugendi gukalikomangi nawa." 39 Gaali kalawa pakawalonguziya wantu wa Shekemu na kulikomanga na Abimeleki. 40 Gaali kasinda na kutuga, Abimeleki kamwingawinga. Na Wantu wavuwa watenduwiti na kuguwa munjira mpaka kuligomi likulu lya mji. 41 Abimeleki kalikala Aruma na Zebuli kamuwinga Gaali na walongu wakuwi kulawa mji gwa Shekemu.

42 Lishaka lyalifatiti, Abimeleki kapatiti visoweru handa wantu wa Shekemu walawa kumjini na kugenda kumalambu. 43 Katola wantu wakuyi kawabagula muvipinga vitatu, su wagenda kugwandira kumalambu. Pawawawoniti wantu wankulawa kumjini, kalawa kwakalififiti kawalaga. 44 Abimeleki na shipinga shakuyi wagenda mbiru kugenda kulolera ligomi likulu lya mji. Vipinga vyakuyi viwili vimonga viwakomangiti walii yawaweriti mumalambu na kuwalaga. 45 Abimeleki kalikomangiti na wenikaya wa mji agu lishaka lyoseri. Kagulopola mji na kuwalaga wantu woseri yawaweriti amu. Kagulunguziya mji agu kwa motu na kugulekera munu.

46 Wantu woseri yawaweriti mu liboma lya Shekemu pawapikiniriti visoweru avi watugiliti wagenditi ku shumba shashiweriti pasi pa litapaka kunumba ya mlungu yawamshemiti Eli Beriti. 47 Abimeleki pakapikiniriti handa wantu woseri walijojonira kuliboma. 48 "Abimeleki na wantu wakuyi woseri yawaweriti nayu wagenda kulugongu Salimoni, katola liwagu kakata lutambi lwa mtera na kulutula mliwega lyakuyi. Shakapanu kawagambira wantu walii yakaweriti nawa mtendi kalongola ntambu yakantenditi neni." 49 Su kila yumu kadumula litambi handa lulii lya Abimeleki. Watola ntambi zawu nakutula pampindi yapaweriti mu liboma, wagapimbika motu na wantu woseri wayaweriti mshumba sha pasi wahowiti na womberi waweriti wantu elufu yimu wapalu kwa wadala.

50 Shakapanu Abimeleki kagenda Tebesi, kaluzyegeta na kugutola kwa makakala. 51 Kumbiti kuweriti na shindwalingu gugangamala pakati pa mji. Su, weni kaya woseri wa mji agu wapalu na wadala watugira amu na kulitatira mngati. Wakwena kushitwiku sha shindwalingu agu. 52 Abimeleki kasokiti kushindwalingu na kugukomanga, shakapanu, kalisegeleriti ligomi lya shindwalingu su kalilunguziyi motu. 53 Na mdala yumu kamwasira lwala pamtuyi, limposhola Abimeleki kumtuwi. 54 Shakapanu Abimeleki kamshema kalong'ola mntemba gwakuyi yakajegiti vintu vyakuyi vya nkondu kamgambira, "Gutoli shimagi shikulu shaku gundagi, Wantu nawalonga handa ndaguwitwi na mdala." Mntemba ulii katola ligumba lyakuyi, kamsoma na kumlaga. 55 Waisraeli pawawoniti handa Abimeleki kahowa, wawuka na kuwuya kila muntu ukaya kwakuyi. 56 Hangu Mlungu ndo ntambu yakamwazibiti Abimeleki kwa likosa lyakuyi kwa tati gwakuyi kwa kuwalaga walongu wakuyi sabini. 57 Ntambu iraa Mlungu kawazibiti wantu wa Shekemu kwa ukondola wawu yawautendi. Hangu, pangira ya Yotamu mwana gwa Yeru Baali iwapata.