1 Lishaka limu Samasoni kagenditi kumjini Gaza, kaliwona na mhumba yumu yomberi kagonja nayu. 2 Wantu wa Gaza pawagambilitwi handa Samsoni kaaku, wayizyengeta seemu ayi na kumgwandira kuligomi likulu lya lushi pashiru poseri. "Walikala jii aku kuligomi pashiru poseri pawahola handa waweza kumhepera mpaka mandawira su wamlagi."

3 Kumbiti Samsoni kasigala kumjini mpaka pashiru ligonugonu. Shaka sha pashiru ligonugonu kimuka kakola vizingiti vya ligomi lya mji, kavitupula pamuhera na makomewu gakuyi kapapa mumawega na kugenda nazi mpaka kuupeleru wa lugongu lwalulolana na Hebroni.

4 Pa aga, Samsoni kamfiriti mdala yumu yakashemitwi Delila mweni kalikaliti mlulalanda lwa Soreki. 5 Wakulu wa Wafilisti wamwizira Delila, wamgambira, "Gumzyangizyangi Samsoni su tuvimani shanjiru sha likakala lyakuyi livuwa tuwezi kumbata na kumtawa. Pagutenda aga, kila yumu gwetu hakakupanani vipandi elufu miya yimu vya madini ga mpiya."

6 Delila kamgambira Samsoni, "Shondi, Samsoni gung'ambili shanjiru sha makakala gaku likulu, na ntambu gaa muntu kaweza kukukanka na kukutawa."

7 Samsoni kamwankula, "Handa pawantawa kwa ngoyi saba za syayi mbisi za upindi, haweri nahera likakala handa muntu yoseri."

8 Wakulu wa Wafilisti wamjegera Delila ngoyi za syayi saba mbisi za upindi, na yomberi kamtawa Samsoni kwa ngoyi azi. 9 Delira kaweriti katula wantu wamgwadiri mushumba sha mngati. Shakapanu, kamshema Samsoni kwa kubota, "Samsoni, Wafilisti wankwiza kukukomanga." Samsoni kadumula ngoyi azi handa nyuzi zazishinkula motu. Hangu kwahera yakayambuliti shanjiru sha makakala gakuyi.

10 Delila kamgambira Samsoni, "Gwenga guzongera na guzyanga neni. Shondi gung'ambili ntambu yaguweza kutawalirwa."

11 Samsoni kamwankula, "Pawantawa kwa ngoyi za syayi zyeni hazenitumiwi, haweri nahera likakala handa muntu yoseri."

12 Su, Delila katola ngoyi za syayi, kamtawa nazi. Shakapanu kamshema Samsoni kwa kubota, "Samsoni! Wafilisti wiza kukukoma!" Shaka ashi kuweriti na wantu kushumba pawamgwadira, Samsoni kazikutula ngoyi azi handa uzi.

13 Delila kamgambiriti Samsoni, "Mpaka vinu gwankali gwankumpayira. Gung'ambili ntambu yaguweza kutawalirwa." Samsoni kamgambira, "Pagupota mabutu saba vya vili zyangu mushitambala sha nguwu na kuvitawalira nakamu ku mpanda ya kufumira nguwu, haweri nahera likakala handa muntu yoseri." 14 Shaka Samsoni pakaweriti kankugonja Delila kavipota pamuhera vishungi saba vya vili za Samsoni kavitawa kwa mushitambala sha nguwu na kuvitawalira nakamu ku mpanda. Shakapanu kamgambira Samsoni, "Samsoni! Wafilisti wankwizira." Samsoni kimuka kulawa kumpota katupula Mpanda ilii na kutatula shitambala shlii sha nguwu.

15 Delila kamgambira Samsoni, "Guweza hashi kulonga handa gunfira kwa moyu gwaku na agawu gweneng'ambiri bada yaku? Gumpayira vinu mala ntatu. Mpaka vinu hagweni ng'ambili bada ya makakala gaku gavuwa." 16 Delila pakendereyiti kumgaziya nentu Samsoni kwa kumgambira visoweru viravi, lishaka kwa lishaka su katoka murohu sambira ya kuhowa. 17 Kaweza kayi ndiri kuhepelera, kamgambira bada yakuwi, pakalonga, "Vili za neni hazeni moguwi. Neni ntuluwa kulongolu kwa Mlungu kwanjira mumtima gwa mawu gwangu. Handa pamoguwa makakala gangu hagawuki, na neni haweri nahera likakala gambira muntu yoseri."

18 Su, Delila pakawoniti handa Samsoni kamgambira bada yakuwi yoseri, kawashema wakulu wa Wafilisti, kawagambira, "Mwizi mwanja agu gumu hera mana Samsoni kang'ambira bada yakuwi yoseri." Wakulu wa Wafilisti wamgendera Delila agawu pawamjegera vipandi vya madini ga mpiya gawalagaliriti. 19 Na Delila kamtenda Samsoni kagonji pamawondu gakuyi, kamshema muntu kamogi mabutu gakuyi saba. Shakapanu Delila kanja kumgaziya Samsoni toziya vinu likakala lyakuyi limuwuka. 20 Delila kamshema Samsoni, "Samsoni! Wafilisti wankwizira!" Samsoni pakimukiti kumpota agawu pakalihola handa hakawezi kulilopuziya handa ntambu yakuyi. Kavimaniti ndiri handa Mtuwa Mlungu kaweriti kamleka. 21 Wafilisti wamubatiti na wamjodola masu, shakapanu wamjega Gaza na wamtawa kwa pingu za shaba, na kumkakanika kutenda lihengu lya kusyaga ubumu kushibetubetu aku. 22 Kumbiti vili za mtuyi gwakuyi zyanjiti kukula kayi pa kumoguwa.

23 Wakulu wa Wafilisti wajojonikiti kunemelera na kumlavilira tambiku mlungu gwawu yawamshema Dagoni. Su, waweriti wankulonga, "Mlungu gwetu katupanana uwezu wa kumkanka mnkondu gwetu Samsoni."

24 Pawaweriti na nemeleru nentu mumiyoyu mwawu, walonga, "mumujegi Samsoni katunemiziyi." Su kawavinira. Na womberi wamtula pakati pa mpanda mbili. 25 Wantu pawamwoniti Samsoni wamzyuma mlungu gwawu na kulonga, "mlungu gwetu katupanana uwezu wa kumkanka mnkondu gwetu mhalibisiya gwa isi yetu mweni kalagiti wavuwa wetu." 26 Samsoni kamgambira mntemba yakaweriti kamlonguziya kwa liwoku lyakuyi, "Gundeki nizipapasiyi mpanda zyazikolera numba ayi su na neni niziyegemeyi."

27 Numba ayi iweriti imema wantu. Wakulu woseri wa Wafilisti waweriti seemu ya pampindi ya numba, kuweriti na wantu elufu tatu wapalu na wadala, pawamlola Samsoni na pawamjongera. 28 Shakapanu Samsoni kamluwa Mtuwa Mlungu kalonga, "Mtuwa Mlungu nikuluwa gunholi. Shondi gunupi likakala, mala ayi yimu hera, gwee Mlungu, su nuwawuziliri mwanja agu hera Wafilisti yawanjondoliti masu gangu." 29 Samsoni kakola mpanda mbili za pakati zyeni zazikoliliti linumba ali, liwoku lya kumshigi mpanda yimu na liwoku lya kumliwu mpanda yimonga. 30 Shakapanu kalonga, "Guleki nfuwi pamuhera na Wafilisti. Kasukuma kwa makakala gakuyi goseri. Linumba liguwira wakulu woseri wa Wafilisti na wantu woseri yawaweriti mngati." Wantu yawahowi shaka lilii Samsoni pakahowiti, waweriti wavuwa kuliku walii wakawalagiti shaka sha ukomu wakuyi. 31 Walongu wakuyi na lukolu lwa tati gwakuyi wiza kumtola, wamsira pakati pa lushi lwa Sola na lushi lwa Eshitaoli mulipumba lya Manoa, tati gwakuwi. Samsoni kaweriti mtoza gwa Israeli kwa vinja ishilini.