1 Lishaka ali, Debora na Baraki mwana gwa Abinoamu wimba lwimbu alu.

2 Wakulu walawiriti kulonguziya Israeli,

wantu walilaviyiti weni. Mumugambiri mayagashi Mtuwa Mlungu!

3 Mpikiniri, Mwenga wafalumi!

Mtegi makutu, mwenga wakulu!

Hanumwimbiri Mtuwa Mlungu, Mlungu gwa Israeli.

4 Gwee Mtuwa Mlungu, pagulawiti aku Seiri,

pagusulukiti lugongu Edomu, isi ilendemeriti,

mpindi zitulusiyiti mashi,

yina, mawundi gatulusiya mvula.

5 Migongu itikinyikiti kulongolu kwaku Mtuwa Mlungu,

yina, lugongu Sinai kulongolu kwa Mtuwa Mlungu, Mlungu gwa Israeli.

6 Mumashaka ga Shamgari, mwana gwa Anati,

mushaka sha Yaeli, miyanja iyoyiti kupita muisi,

wanamwanja wapitiriti mvijirajira.

7 Walimi waweriti kwahera,

wayoyiti kuwera mu Israeli,

mpaka pandawiriti neni Dedora,

neni yaweriti handa mawu gwa Israeli.

8 Walisyaguliliti wamlungu wasyai,

kuweriti na ngondu muisi.

Kumbiti kuweriti ndiri yakaniti mgoha ama ngawu

pakati pa wantu elufu arubaini ga Israeli. 9 Niwapanani ligoya wakulu wa mashonta ga Israeli

yawalilaviyiti kwa kufira weni pakati pa wantu.

Mumugambiri mayagashii Mtuwa Mlungu! 10 Mbweri, mwenga yamkwena punda wafufu,

mwenga yamlikala mumayalika gakulivagira wankanyama ga beyi nkulu,

mwenga yamtyanga munjira, mbweri shitwatira ashi. 11 Mpikaniri umatu wa shipinga sha wantu sha kumanegu ga mashi pawawagambira ukanka wa Mtuwa Mlungu, ukanka wa wantu wa Israeli! Shakapanu wantu wa Mtuwa Mlungu pawaseleriti kulawa mumiji yawu. 12 Gwimuki, gwinuki, Debora!

Gwimuki, gwimuki gwimbi lwimbu!

Gwimuki, Baraki mwana gwa Abinoamu,

guwatoli lopola waku. 13 Makambaku yawasigaliti waseleriti, wantu wa Mtuwa Mlungu wagenditi kumkomanira kwa wana makakala. 14 Kulawa Efraimu waseleriti kululalanda,

wawafata walongu wawu wantu wa benjamini,

kulawa Makiri waseleriti wakulu wa mashonta,

kulawa Zebuluni walongoziya wakulu. 15 Wakulu wa Isakari wagenda pamuhera na Debora,

yina na wantu wa Isakari wiza kwa Baraki,

wamfata kalongola mpaka kululalanda.

Kumbiti muwamu mwa nkolu za Rubeni kuweriti mbagulanu

wasinditi kwamuwa. 16 Ntamba gaa msigali kumbeli na kondolu?

Su kupikinira liziwu lya mlolera pakashema?

Muwamu mwa nkolu za Rubeni kuweriti na mabagulanu

wasinditi kwamuwa. 17 Gileadi kalikaliti kumwambu Kuyoridani.

Na likabira lya Dani ntambu gaa walikaliti mumeri mashaka gavuwa? Likabira lya Asheri lilikaliti jii mmpeku mwa bahari,

pahala peni meri pazigolokera. 18 Wantu wa Zebuluni ndo wantu

yawaweriti muatari mwa kuhowiziya makaliru gawu.

Ata Nafutali waweriti mukuhowa.

Muluwaga lwa nkondu. 19 Aku Taanaki, kumbeku ya kumbwiru za Megidu,

wafalumi wiziti walikomanga, wafalumi wa Kanani walikomangiti,

kumbiti wapatiti ndiri lopola za madini ga feza. 20 Ntondu aku kumpindi zilikomiti nkondu,

zifatiti njira zawu, zilikomangiti na Sisera. 21 Lilawa lya lushemba Kishoni gawatoliti kutali,

yina lilawa livuwa lya lushemba Kishoni.

Gugendi kulongolu kwa likakala, gwee rohu yaneni! 22 Farasi wakintiti pawawerit wankupita pawakwalakwala,

kwa kwatu zawu. 23 Ntumintumi gwa Mtuwa Mlungu kalonga hangu,

Gugulapili mji gwa Merusi,

muwalapili vikalipa wenikaya wakuyi,

toziya wiza ndiri kuwatanga wantu wa Mtuwa Mlungu kulikomanga na wana likakala. 24 Yaeli, mdala gwa Heberi yakaweriti gwa lukolu lwa Mkeni. Katekelerwi kuliku wadala woseri

Yina, katekelerwi kuliku wadala woseri

yawalikala mumalingu. 25 Sisera kamluwiti mashi, na yomberi kampanana maweri,

kamjegeriti siyagi mubakuli ya ligoya. 26 Kwa liwoku limu kakoliti shigingi sha liringu,

na kwa liwoku lyakuyi lya kumliwu nyundu ya fundi,

kamkoma Sisera kwa nyundu, kambwajula mtuyi gwakuyi,

yina, kamkomiti kamposhola shiwunji shakuyi. 27 Sisera kang'ong'onaliti kaguwa,

kagonjiti jii pamagulu gaguyi.

Panu pakang'ong'onaliti ndo kaguwiti kahowa! 28 Mawu gwakuyi Sisera kaloliti kulawa kulidilisha

kalalamika pakalonga.

Kwa ntambu gaa mbutuka za kukweguwa na Farasi zakuyi zikawira?

Mbona mtukuliru gwa mbutuka zyakuwi zikawira kupikinilika? 29 Wadala wana luhala wamwankula.

Yina, kalinyamaziya kayi na kayi kwa lyankulu ali. 30 Pota kulishera wangusakula na kugawana vyawalopuliti,

mhinga yumu ama wawili kwa kila shonta,

nguwu ya sufu ya rangi kwajili ya Sisera.

Nguwu ya sufu yawataliziwiti

na mitandiru miwili ya kung'aliziya kwajili ya singu yangu! 31 Gwee Mtuwa Mlungu, walaguwi wankondu waku woseri!

Kumbiti yawakufira wang'ering'eti handa mshenji gwagulawa!

Na isi iwera na ponga kwa shaka sha mivinja alubaini.