1 Shaka ashi paweriti ndiri na mfalumi Muisraeli, kuweriti na Mlawi tunga yakalikaliti handa mhenga kutali muenewu mkati mwa isi ya vigongu ya Efureimu. Muntu ayu katoliti mdala ayu gwa kunja kulawa Betilehemu muisi ya Yuda. 2 Kumbiti mdala ulii kamkalalira Mlawi ayu, kamleka kawuya ukaya kwa tati gwakuwi aku Beterehemu, kalikala kwa shaka sha miezi msheshi. 3 Lishaka limu, mpalu gwakuwi kagenditi kumsakula, kafiliti kuyowera nayu na kumwuziya ukaya kwakuwi. Su mpalu ayu kagenditi pamuhera na ntumintumi gwakuwi na punda wawili. Mdala uliii kamjega mngati kwa tati gwakuwi, na mganafu gwakuwi pakamwoniti kamwanka kwa kunemelera. 4 Mganafu gwakuwi kamshemera, na yomberi kalikala aku kwa shaka sha mashaka matatu, Mlawi ayu na ntumintumi gwakuwi waliya, walanda na kugonja aku.

5 Lishaka lya msheshi, wimuka mandawira putiputi, walitanda kuwuka, kumbiti mganafu gwakuyi kamgambira, "Gulii uti shididini gupati likakala, shakapanu guwuki."

6 Su wantu wawili awa walikala, waliya na kulanda pamuhera. Shakapanu mganafu gwakuwi kamgambira mganafu gwakuyi, "Shondi gugonji pashiru panu na kunemelera."

7 Muntu ulii pakagolokiti kuwuka, mganafu gwakuwi kamluwa kusigala, na yomberi kasigala. 8 Lishaka lya mhanu muntu ayu kimuka mandawira, kafira kuwuka. Kumbiti mganafu gwakuyi kamgambira, "Guheperi gupati likakala kwa kuliya, guheperi paluwala, shakapanu guwuki." Woseri wawili waliya pamuhera.

9 Shakapanu Mlawi ayu na mdala gwakuyi gwa kunja pamuhera na ntumintumi gwakuwi pawagolokiti kugenda zawu, mganafu gwakuwi kamgambira Mlawi ayu, "Vinu paliwala papera na pamihi papakwegera. Gugonji panu, na kunemelera. Shirawu mandawira hagwimuki na kwanja mwanja gwa kuwuya ukaya."

10 Kumbiti muntu ayu kalemiti kugonja aku pashiru palii, Su, kagoloka, kawuka kasoka pakwegera na lushi lwa Yebusi aku Yerusalemu. Kaweriti na punda wawili wawayalikitwi kala, pamuhera na mdala gwakuwi gwa kunja na ntumintumi gwakuyi.

11 Pawaweriti wapakwegera kumjini Yebusi, Pashiru paweriti pakwingira na ntumintumi gwakuwi kamgambira mtuwa gwakuwi, "Vinu mbaka twingiri mulushi alu lwa Wayebusi tugonji amu pashiru panu."

12 Mtuwa gwakuwi kamwankula, "Hapeni tugalambuki na kwingira mulushi lwa wahenga weni Waisraeli ndiri. Twendereyi na mwanja mpaka Gibea. 13 Tugendi tusegeleri seemu azi na kugonja aku Gibea ama Rama."

14 Su, wendereya na mwanja gwawu mpaka mshenji gwinala wawera pakwegera na lushi lya Gibea lweni ndo lushi lwa likabila lya Benjamini. 15 Wingira kumjini wapati kugonja amu pashiru. Pawingiliti kumjini wagenda kulikala kuluwaga lwa lupalahera lwa lushi, toziya kwahera muntu yakawashemiriti kugonja ukaya kwakuwi. 16 Pawaweriti aku mzewi yumu kasoka kulawa kulilambu kwakuwi. Mzewi ayu kaweriti mweni kaya gwa isi ya migongu ya Efureimu na kaweriti kalikala aku Gibea handa mhenga. Wenikaya wa lushi lwa Gibea waweriti wa likabila lya Benjamini. 17 Mzewi ayu pakaloliti na kumwona muntu ulii yakaweriti kamumwanja pakawera kuluwaga lwa mji, kamkosiyiti, "Gulawa koshi na gwankugenda koshi?"

18 Na yomberi kamwankula, "Tulawa Betilehemu muisi ya Yuda na twankugenda seemu za enewu lya mkati mwa migongu ya Efureimu. Aku ndo kwanilikala na vinu nankuwuya aku Betilehemu Muisi ya Yuda aku ndo ukaya, kwahera muntu panu yakatushemeliti ukaya kwakuyi, 19 tembera twana kila shintu kumbiti watwanka ndiri twana ntundu na maliwuziyu kwajili ya punda wetu. Viraa nana libumunda na divayi kwajili ya twenga wantumintumi waku, yani neni, ntumintumi gwaku mdala, pamuhera na mndemba yatufataniti ayu. Tufira ndiri shintu shoseri."

20 Mzewi ayu kamgambira, "Mwizi ukaya kwangu ponga iweri na mwenga! Handa kwana shipungukiti hanukupananeni. Ila namgonja kuluwaga aku."

21 Hangu kawajega ukaya kwakuwi na kuwapanana punda wawu ntundu. Wana mwanja awa wagulula magulu gawu, walanda na kuliya.

22 Pawaweriti wankulinemiziya, kumbiti wapalu wadoda wa lushi alu wiza wayizyengeta numba ayu na wakota mlyangu kwa makakala. Wamgambira mzewi mweni kana numba, "Gumlaviyi mpalu yakiziti kwa gwenga, tugonja nayu."

23 Kumbiti mzewi kana numba ayu kalawa kunja, kawagambira, "Hangu walongu wangu, nuwaluwa namumutendera ukondola muntu ayu. Ayu ndo mhenga gwangu, hangu namumutendera udoda uwu. 24 Nanayu mhinga gwangu mweni ndo kankali nafunda na kapanu viraa mdala gwa kunja gwa mhenga gwangu. Mnjimili nuwalaviyi kunja, muwatoli na kuwatendera ntambu yamfira, kumbiti muntu ayu namumtendera shitwatira ashi sha soni." 25 Kumbiti wapalu awa wampikinira ndiri. Hangu Mlawi ulii kamtola mdala gwakuwi na kumlaviya kwawu kunja aku. Nawomberi wamtola na kumhumba kwa makakala pashiru poseri mpaka mandawira. Pakwegera na kushiya, wamleka kagendi zakuwi. 26 Mandawira, mdala ulii kiza mpaka paligomi lya numba mwakaweriti mpalu gwakuwi, kaguwa pasi paligomi palii na kulikala palii mpaka pakulangaliti nakamu.

27 Mpalu gwa mdala ayu pakimkiti mandawira kavugula ligomi lya numba, kalawa kunja su kendereyi na mwanja, ndo kamwona mdala gwakuwi kashikola shizingiti sha pasi paligomi. 28 Kamgambira, "gugoloki tugendi." Kumbiti yomberi kankula shintu ndiri. Kamtola, kamtula kumpindi kwa punda gwakuwi na kumjega mpaka ukaya kwakuwi. 29 Pakasokiti ukaya kwakuwi katola shimagi na kumhanjahanja mdala ulii vipandi lilongu na viwili. Shakapanu kavijega kila shipandi mu kila likabila lya Israeli. 30 Woseri walii wawawoniti walongiti, "Ee shitwatira ashi shidoda nentu hasheni lawiri pota kuwoneka kwanjira lishaka lilii Waisraeli pawalawiti muisi ya Misri mpaka leru. Tuliholi twaweni na twamuwi shitwatira sha kutenda."