1 Wantu wa likabila lya Efureimu wamkosiya Gidiyoni, "Kwa ntambu gaa kututendera hangu? Kwa ntambu gaa gutushema ndiri pagugenditi kulikomanga na Wamidiyani?" Walirewa nayu.

2 Kumbiti Gidiyoni kawankula, "ntenda shididini pagulifaniziya na ntambu yagutenditi gwenga, lukolu lwangu ludidini hera wa wiwuka wa Abiazeli hera ndo yauwanjiti kulikomanga nkondu, kumbiti shipinga shaku shikulu sha wiwuka wa Efureimu shindangiti neni kumalira lihengu lya makomangu weri, ndo handa zabibu za upeleru zyaziweriti ziherepa nentu kuliku zabibu yazapitwi pakwanjira. 3 Mlungu kawatenda muwakanka wakulu wa Midiyani na Orebu na Zibu. Hashi, neni ntenda shishi kulifaniziya na mwenga?" Gidiyoni pakatakuliti kala aga, maya gawu kwa yomberi ganyamalira.

4 Gidiyoni na wayaguwi miya tatu wasoka Yoridani, waloka. Tembera waweriti watoka nentu, wendereyiti kuwafata wankondu wawu.

5 Su, kawagambira wantu wa Sukoti, "Shondi muwapanani wayangu awa mabumunda mana watoka nentu, neni nendereya kuwafata wafalumi Zeba na Salimuna gwa Midiani."

6 Kumbiti walongoziya wa Sukoti wamkosiya, "Hashi tuwapanani mabumunda na mwenga mwankali kumkanka Zeba na Salimuna?"

7 Gidiyoni kawagambira, "Yina, kumbiti Mtuwa Mlungu pakatutenda tuwakanki Zeba na Salimuna, hanizidegidegi nshimba zyenu kwa misomi na mbigili za kushiwala."

8 Kulawa aku kawagendera wantu wa Penueli, kawaluwa ntambu irailii. Na wantu wa Penueli wamwankula ntambu yawawankuliti wantu wa Sukoti. 9 Gidiyoni kawagambira, "Pambuya weri hanugubomoli mnara agu."

10 Zeba na Salimuna waweriti aku Karikori, pamuhera na shonta lyawu lya wantu kumi na tano weni ndo yawasigaliti kulawa kulishonta lya wantu kwagulawa mshenji, toziya wayawu miya na ishilini elufu walagitwi. 11 Gidiyoni kafata njira ya washuhuzi kwaguzyeta mshenji yayiwera kwagulawa mshenji mwa Nobu na Yogibeha, kalikomanga shonta ali lyaliweriti kala ndiri. 12 Wafalumi wa Midiyani, Zeba na Salimuna watoloka watuga, kumbiti Gidiyoni kawafatiti, kawabata wafalumi awa na kulipanana shonta lyoseri lyoga likulu.

13 Shakapanu, Gidiyoni, mwana gwa Yoashi, kawuya kulawa kunkondu kapitira shijirajira sha Heresi. 14 Kamkamula mntemba yumu gwa Sukoti na kumkosiya. Mntemba ayu kamlembera matawu ga wakulu na wazewi wamanika wa Sukoti, walanga yawu wantu woseri sabini na saba.

15 Gidiyoni kawuya kwa wantu wa Sukoti, kawagambira, "Ndo mlihola ntambu yamnigiriti pamtakuliti, iwera hashi tuwapanani mabumunda wantu yawatokiti nentu na mwenga mwankali mwanamkanka Zeba na Zalimuni? Aya su, Zeba na Zalumini ndo awa." 16 Su, kawatola wazewi wa Sukoti na kuwazibu wapalu woseri lushi alu kwa kuzideganga nshimba zawu kwa misontu na mbigili. 17 Viraa virii kagubomoliti mnala gwa Penueli na kuwalaga wenikaya wa lushi alu.

18 Shakapanu, kawakosiya Zeba na Zalimuna, "Wantu walii yamuwalagiti aku Tabori waweriti hashi?" Wamwankula, "Walifana na gwenga, toziya wawonikaniti handa wana wa mfalumi."

19 Na yomberi kawagambira, "Awa waweriti walongu wa neni, wana wa mawu yumu. Nilirapa kwa Mtuwa Mlungu yakawera mkomu, handa memuwalagi ndiri, ata neni menuwalagi ndiri mwenga."

20 Shakapanu kamgambira Yeteri, mwiwuka gwakuyi gwa kwanja, "Gugoloki, guwalagi." Kumbiti Yeteri kaniti lyoga kutola shimagi shikulu shakuyi toziya kaweriti kankali mntemba.

21 Panu Zeba na Zalumuna walonga, "Gutulagi gamweni gwenga, toziya ali ndo lihengu lya muntu mkulu." Gidiyoni kagoloka kawalaga mweni Zeba na Zalumuna na kutola mapambu gawu yagaweriti msingu mwa ngamiya wawu.

22 Shakapanu, Waisraeli wamgambira Gidiyoni, "Gwenga na guweri mkolamlima gwetu, na pa gwenga hawakolimlima walera waku, toziya gwenga gutulopuziya kulawa kwa Wamidiyani." 23 Gidiyoni kawankula, "Neni hapeni weri mkolamlima gwenu ata mwana gwangu hapeni kaweri mkolamlima gwenu. Mtuwa Mlungu ndo hakaweri mkolamlima gwenu." 24 Shakapanu kawagambira, "Menfiri kuwaluwa kila yumu, kanupi vintu vya zahabu vya kuvala mumakutu vyamlopuliti kwa wankondu." Walii Wamidiyani waweriti Waishimaeli, yawavaliti vipuli vya zahabu.

25 Wantu wamwankula, "Hatukupanani kwa kufira twaweni." Wayalika nguwu na kila yumu kasira amu vipuli vyaviweriti walopola, 26 Utopa wa vipuli vyoseri vya zahabu vyakafiriti wampanani viweriti kilu ishilini. Nentu ga aga, kankiti viraa hereni, nguwu za langi ya ulijuwani yazivaliwituwi na wafalumi wa Midiani na mikufu yayiweriti kusingu za ngamiya wawu.

27 Gidiyoni kazitumiya kunyawira shinyagu shakashituliti kumji gwakuyi gwa Ofura. Waisraeli woseri wamleka Mlungu na kugenda aku kushiguwira. Shinyagu ashi shiweriti mgomiziwu kwa Gidiyoni na kaya wakuyi. 28 Su, Wamidiyani wasinditi nakamu na wawera ndiri tiliziya kwa Israeli, na isi ya Israeli iwera na ponga kwa shaka sha vinja alubaini.

29 Gidiyoni, yani Yeru Baali, mwana gwa Yoashi kawuya ukaya kwakuwi na kulikala aku.

30 Gidiyoni kaweriti na wana wapalu malongu saba, toziya kayugiti wadala wavuwa. 31 Kaweriti na mdala kunja aku Shekemu mweni kamleleriti mwana mpalu, litawu lyakuyi Abimeleki. 32 Gidiyoni, mwana gwa Yoashi, kahowa pakawera na vinja vivuwa, wamsira mulipumba lya Yoashi, tati gwakuyi, kumji gwa Ofura gwa Wabiezeri.

33 Pakahowiti kala Gidiyoni, Waisraeli wawuyira wamlungu wa Baali na kuwaguwira, wamtenda Baali Beriti kuwera mlungu gwawu. 34 Waisraeli walwaluwa Mtuwa Mlungu gwawu, yakawalopuziyiti kulawa muwankondu wawu wavuwa yawawazyengetiti muuwega zoseri. 35 Kayi, wawatendera ndiri maheri kaya ya Yeru Bahari mweni ndo Gidiyoni, kwa maheri goseri gakawatenderiti Israeli.