1 Waisraeli watenditi kayi madoda kulongolu kwa Mtuwa Mlungu na yomberi kawaleka wakoluwimlima na Wafilisti kwa vinja alubaini.

2 Kuweriti na muntu yumu aku Sora, gwa likabila lya Dani, litawu lyakuyi Manoa. Mdala gwakuyi kaweriti ndiri na wana toziya kaweriti mbendi. 3 Lishaka limu, Lihoka gwa Mtuwa Mlungu kamlawira mdala ayu, kamgambira shondi, "Gwenga gwahera wana toziya gwa mbendi. Kumbiti hagupati yinda na kulera mwana mpalu. 4 Hangu nikuluwa guliloleri weri, nagulanda divayi ama shiloweru pota naguliya shintu shoseri shashikutenda gujimiruwi ndiri kulongolu kwa Mlungu, 5 pa kiwuka kala mwana gwaku naguzimoga vili zakuyi nakamu. Toziya hakaweri katulwa gweka kwajili ya Mlungu, na hakanji kuwalopola Waisraeli kulawa mumakakala ga Wafilisti."

6 Mdala ayu kagenda kumgambira mpalu gwakuyi, "Muntu gwa Mlungu ulii sheni shakuyi shiweriti shitiriziya nentu handa sha ntumintumi gwa kumpindi gwa Mlungu kaniziriti. Numkosiya ndiri kwakalawiti pota kang'ambira ndiri litawu lyakuyi. 7 Kumbiti kang'ambiriti handa haweri na yinda na kulera mwana mpalu. Kang'ambiziya nananda divayi ama shiloweru pota kuliya shoseri shashijimiruwa ndiri kulongolu kwa Mlungu, mana mwana ayu hakaweri katulwa gweka kwajili ya Mlungu kwanjira kwiwuka kwakuwi mpaka kuhowa kwakuwi.?"

8 Shakapanu Manoa kamluwa Mtuwa Mlungu pakalonga, "Nikuluwa gwee Mtuwa Mlungu gumtumi kayi muntu gwaku ulii yagumtumiti su katufundi mirandu yatufiruwa kumtendera mwana ayu yakiza kwiwuka."

9 Mtuwa Mlungu kakupikinira kuluwa kwa Manoa, na ntumintumi gwa kumpindi ulii gwa Mlungu kamgendera kayi mdala ulii pakaweriti kalikala kulilambu. Kumbiti mpalu gwakuyi, Manoa, kaweriti ndiri pamuhera na yomberi. 10 Mdala katuga kalongola, kamgambira mpalu gwakuyi, "Guloli! Muntu ulii yakaniziliti lishaka lilii kandawira kayi."

11 Manoa kawuka kamfata mdala gwakuyi wiza kwa muntu uli, kamkosiya, "Hashi, gwenga ndo muntu ulii yaguyowiriti na mdala ayu?" Muntu ulii kamwankula, "Ndo neni."

12 Shakapanu Manoa kalonga, "Vinu visoweru vyaku pavitimiya mwana ayu hakalikali makaliru ga ntambu gaa na lihengu lyakuyi ndo shishi?"

13 Ntumintumi gwa Mtuwa Mlungu kamwankula Manoa, "Mdala gwaku kafiruwa kwiza kugakola goseri ganumgambiriti. 14 Nakalawalira viboga vyoseri vyavilawirana na Mzabibu, nakalanda divayi ama shiloweru nakuliya shoseri shashijimiruwa ndiri na Mlungu. Vyoseri vyanimgambiriti kavitendi."

15 Manoa kamgambira Ntumintumi gwa Mtuwa Mlungu ayu, "Shondi, gulikali shididini tukutandiri mbuzi mdidika." 16 Ntumintumi gwa Mtuwa Mlungu ulii kamgambira Manoa, "Ata handa pamnkakanika kulikala hapeni ndiyi shiboga shenu. Kumbiti handa pamtanda tambiku ya kulunguziwa, mumlaviliri Mtuwa Mlungu. Manoa kavimana ndiri handa ayu kaweriti Ntumintumi gwa Mtuwa Mlungu."

17 Su, Manoa kamgambira Ntumintumi gwa Mtuwa Mlungu, "Gutugambiri litawu lyaku su tukupanani ligoya shaka visoweru vyaku pavitimiya."

18 Ntumintumi gwa Mtuwa Mlungu kamwankula, "Hashi gufira kulimana litawu lyangu, toziya litawu lyangu lya kulikangasha."

19 Panu Manoa katanda mbuzi mdididki na tambiku ya ubumu, kavitula pambindi pa litalawu kamlaviliri Mtuwa Mlungu yakatenda mauzauza. 20 Su shaka Manoa na mdala gwakuyi wankulola motu gwa gutenda lipulipu kugenda kumpindi kulawa pakutambikila, wamwona Ntumintumi mulipulipu mlii pakakwena kugenda kumpindi. Su Manoa na mdala gwakuyi wasuntamala makukama.

21 Manoa kavimana handa ayu kaweriti Ntumintumi gwa Mtuwa Mlungu. Ntumintumi kamlawira kayi ndiri Manoa na mdala gwakuyi.

22 Su, Manoa kamgambira mdala gwakuyi, "Nakaka hatuhowi, toziya tumwona Mlungu."

23 Kumbiti mdala gwakuyi kamwankula, "Handa Mtuwa Mlungu mekafili kutulaga mekajimiri ndiri tambiku yetu ya kulunguziwa na yaubumu, mekatulanguziyi ndiri vitwatira avi vyoseri ama kutugambira mirandu ayi shaka ashi."

24 Shakapanu mdala gwakuyi Manoa kalera mwana mpalu, na Manoa kampanana litawu Samsoni. Mwana ayu kakula na Mtuwa Mlungu kamtekelera. 25 Rohu ya Mtuwa Mlungu yanja kumtendiziya pakawera aku Mahane Dani, Pakati pa Sola na Eshitaoli.