1 Pakahowiti kala Yoshuwa, Waisraeli wamkosiyiti Mtuwa Mlungu, "Hashi, likabila gaa haligendi kutukomangira uti na Wakanaani?" 2 Mtuwa Mlungu kawankula, "Likabila lya Yuda haligendi uti kulikomanga nawu, toziya niwatenda wawakanki Wakanaani."

3 Wantu wa likabila lya Yuda, wawagambiriti walongu wawu wantu wa likabila lya Simiyoni, "Muweri pamuhera na twenga patugenda kuitola kwa makakala isi ilii yatupananuwa. Viraa twenga hatugendi pamuhera na mwenga kuitola isi yamgenda kupananuwa." Su likabila lya Simiyoni lijimiriti kulikolera pamuhera na womberi. 4 Su wantu wa likabila lya Yuda wagenditi kulikomanga na Wakanaani, Mtuwa Mlungu kawatenda womberi wawakanki Wakanaani pamuhera na Waperizi, wantu wa likabila lya Yuda wawalagiti wantu elufu lilongu munkondu kumji gwa Beziki. 5 Mumji gulii wamwoniti mfalumi Adoni Bezeki, walikomanga nayu na kuwakanka Wakanaani na Waperizi. 6 Adoni Bezeki katugiti, kumbiti wamfatiti na kumkamula, wamlikituliti vyala vikulu vya mawoku na magulu gakuyi. 7 Adoni Bezeki kalonga, "Wafalumi malongu saba yaniwalikituliti vyala vikulu vya mawoku na magulu waweriti wankusala vyavisigaliti pasi pashitalawanda shangu. Vinu Mlungu kandipa ntambu yantenditi." Womberi wamjegiti ku Yerusalemu, ndo kahowiti aku.

8 Wantu wa likabila lya Yuda wagukomangiti mji gwa Yerusalemu na kugutola kwa makakala. Wawalagiti wenikaya kwa magumba na kugulunguziya nakamu kwa motu mji gulii.

9 Shakapanu, wantu wa likabila lya Yuda wagenditi kulikomanga na Wakanaani yawalikaliti muisi ya vigongu, Negebu na muisi lalanda. 10 Wawakomiti viraa Wakanaani yawalikaliti kumji gwa Hebroni, mji gulii kwanja gushemuwiti Kiriyati Ariba, wagankankiti makabila ga Sheshayi na Himani na Talimayi.

11 Kulawa aku wantu wa likabila lya Yuda wagenditi kugukomanga mji gwa Debiri, mji agu kwanja gushemitwi Kiriyati Seferi. 12 Karebu kalongiti, "Muntu yoseri yakaweza kugutola kwa makakala mji gwa Kiriyati Seferi, hanumuyugiziyi muhinga gwangu Akisa." 13 Su Otinieli mwana gwa Kenazi yakaweriti mpusu gwakuyi Karebu, kagutoliti kwa makakala mji gulii, Karebu kamlaviya muhinga gwakuyi Akisa kayuguwi na Otinieli. 14 Akisa pakasokiti kwa Otinieli, kamgambiriti Otinieli guluwi lilambu kwa tati gwagu. Akisa kaweriti kakwena mupunda na pakasulukiti pasi, tati gwakuyi kamkosiyiti, "Hashi megufiri nikupanani shishi?" 15 Akisa kamwankuliti, "Gumpanani ntekelera! Nduwa gunupi mbwiru za mashi toziya semu yagunupiti aku Negebu iyuma." Shakapanu Karebu kampananiti mbwiru za mashi za pasi na pampindi.

16 Wiwuka wa Keni ulii yakaweriti mganafu gwa Musa, wakweniti pamuhera na wantu wa likabila lya Yuda kulawa mji gwa Mitendi, gweni ndo Yeriku mpaka kushiwala sha Yuda Munegebu pakwegera na mji gwa Aradi, walikaliti aku pamuhera na wantu wa Yuda. 17 Wantu wa likabila lya Yuda pamuhera na walongu wawu wa likabila lya Simioni wawakankiti Wakanaani yawalikaliti Sefati. Wagwagamiziyiti nakamu mji agu na kugalambula litawu lyakuyi kuwera Horima.

18 Viraa wantu wa likabila lya Yuda wagutoliti kwa makakala miji ya Gaza pamuhera na vijiji vyakuyi, Ashikeloni pamuhera na vijiji vyakuyi, na Ekroni pamuhera na vijiji vyakuyi. 19 Mtuwa Mlungu kaweriti pamuhera na wantu wa likabila lya Yuda, na womberi wayitoliti kwa makakala semu ya vigongu. Kumbiti wasinditi kuwakanka wenikaya wa isi lalanda toziya mbutuka zawu zyazikwegwa na farasi munkondu ziweriti za shuma. 20 Mji gwa Hebroni gupananwa kwa Karebu kulawirana na malagaliru ga Musa. Karebu kaziwingiti kulawa aku nkolu ntatu za Anaki. 21 Kumbiti wantu wa likabila lya Benjamini wawawingiti ndiri Wayebusi yawalikaliti kumjini Yerusalemu, ndo mana Wayebusi walikala pamuhera na wantu wa likabila lya Benjamini kumjini Yerusalemu mpaka leru.

22 Wantu wa makabila ga Yosefu wagenditi wagukomangiti mji gwa Beteli na Mtuwa Mlungu kaweriti pamuhera nawu. 23 Kwanja waweriti wawatuma walolalola wagenda kugulolalola mji gwa Beteli. Mji agu mashaka gapititi wagushemiti Luzu. 24 Walolalola awa wamwoniti muntu yumu kalawiti kumjini, wamgambiriti, "Gwee gutulanguziyi ntambua ya gwingira, na twenga hapeni tutendi." 25 Yomberi kawalanguziya njira yaingira mjini. Su wingira na kumlaga kila muntu yakaweriti kumji, kumbiti wamleka muntu ulii pota kumlaga mweni pamuhera na kaya yakuwi. 26 Muntu ulii kahamiriti isi ya Wahiti, aku kanyawiti mji yagushemitwi Luzu, mji agu gushemuwa hangu mpaka leru.

27 Wantu wa likabila lya Manasi wawawingiti ndiri wenikaya wa mji gwa Betisheani pamuhera na vijiji vyakuyi, Taanaki pamuhera na vijiji vyakuyi, Dori pamuhera na vijiji vyaku, Ibileyamu pamuhera na vijiji vyakuyi na Megidu pamuhera na vijiji vyakuyi. Wakanaani wendereyiti kulikala muisi ayi. 28 Ata Waisraeli pawaweriti na likakala wawawingiti ndiri Wakanaani kumbiti wawakakanikiti wawatenderi lihengu.

29 Wantu wa likabila lya Efurayimu wawawingiti ndiri Wakanaani yawalikaliti aku Gezeri, kumbiti Wakanaani wendereyiti kulikala kulii pakati pawu.

30 Wantu wa likabila lya Zebuloni wawawingiti ndiri wenikaya wa mji gwa Kitironi na walii wa mji gwa Nahalali, su wendereyiti kulikala pamuhera awa Wakanaani pawawatendiziya lihengu kwa kuwakakanika handa wamanda.

31 Wantu wa likabila lya Asheri wawawingiti ndiri wenikaya wa mji gwa Ako na Sidoni na Alabu na Akizibu na Heliba na Afeka na Rehobu. 32 Wantu wa likabila lya Asheri walikaliti pamuhera na Wakanaani wenikaya wa isi ilii toziya wawawingiti ndiri.

33 Wantu wa Likabila lya Nafutali wawawingiti ndiri wenikaya wa mji gwa Betishe Meshi na Beti Anati, kumbiti walikaliti pakati pa Wakanaani awa. Wawatenda wenikaya wa miji ayi wawatenderi lihengu kwa kuwakakanika.

34 Waamori wawawingiti wantu wa likabila lya Dani kugenda kuvigongu. Wawajimiriti ndiri waseleri kwiza kulikala isi za lalanda. 35 Waamori wendereyiti kulikala mumiji yayiweriti kulugongu lwa Heresi na Aiyaloni na Shaalibimu. Kumbiti wantu wa makabila ga Manasi na Efurayimu wawakolitimlima Waamori na kuwatenda watendi lihengu kwa kuwakakanika. 36 Mbaka ya Waamori iweriti kushana mwa Sela, kupitira shinjira Akaribilimu na kwendeleya.