1 Kuweriti na muntu yumu kumigongu ya Efuremu, litawu lyakuyi Mika. 2 Lishaka limu kamgambiriti mawu gwakuwi, "Vipandi virii vya madini ga feza elufu yimu na miya yimu vyawakwiwiriti, na gwenga gumpangiriti yakakwiwiriti pampikinira, neni nanavi. Neni ndo yantoliti." Mawu gwakuwi kalonga, "Mwana gwangu Mlungu kakutekeleri kwa kujimira kwaku."

3 Mika kamuwuzilira mawu gwakuwi vipandi avi vya madini ga feza elufu yimu na miya yimu. Mawu gwakuwi kalonga, "mpangiru yandaviyiti nayikupata, feza ayi niyitula kwajili ya Mtuwa Mlungu su kunyawira shinyagu sha kusongola nakushigibikira na madini ga feza. Vinu hanikuwuziliri vipandi vya madini ga feza gwenga." 4 Mika pakamuwuziliriti kala mawu gwakuwi vipandi vya madini ga feza, mawu gwakuwi katola vipandi vya madini ga feza miya mbili kampanana fundi feza yomberi kasongoli shinyagu na kugibikira na madini ga feza. Shinyagu ashi shituluwa mnumba ya Mika. 5 Muntu ayu, Mika kaweriti na pahala pakuwi pa kuguwira. Kanyawiti shizibawu na vinyagu vidikadika vmtambika na shinyagu, shakapanu kamtenda yumu gwa wana wakuwi kuwera mtambika gwakuwi.

6 Mashaka galii paweriti ndiri na mfalumi Muisraeli. Kila muntu katenditi shoseri shakawoniti shiheri pamasu gakuyi mweni.

7 Shaka ashi kuweriti na mntemba yumu Mlawi kumjini Betilehemu muisi ya Yuda yakalikaliti aku pakawera mhenga. 8 Mntemba ayu kawuka Betilehemu muisi ya Yuda, kagenda kusakula pahala pamonga pa kulikala. Mumwanja gwakuwi kasoka ukaya kwa mika muisi ya migongu ya Efureimu.

9 Mika kamkosiya, "Gulawa koshi?" Na yomberi kamwankula, "Neni na Mlawi, kulawa kumjini Betilehemu muisi ya Yuda. Nankusakula pahala pakulikala."

10 Mika kamgambira, "Gulikali pamuhera na neni, guweri kwaneni handa tati na mtambika gwangu. Hanukulipi vipandi lilongu vya feza kila shinja na nguwu pamuhera na vintu vyagufira." 11 Mlawi ayu kingira kalikala aku na kuwera handa yumu gwa wana wa mika. 12 Mika kamtula utuwa muntemba Mlawi ayu kuwera mtambika gwakuwi nayomberi kalikala ukaya kwa Mika. 13 Shakapanu kalonga, "Vinu nivimana handa Mtuwa Mlungu hakantenderi maheri toziya nana mntemba Mlawi ayu handa mtambika gwangu."