1 Pakahowiti kala Abimeleki, Tola mwana gwa Pua mwana gwa Dodo gwa likabila lya Isakari, kawera mlopuziya gwa Waisraeli. Tola kalikaliti Shamili muisi ya migongu ya Efraimu. 2 Kaweriti mtoza gwa Israeli kwa mivinja ishilini na tatu, shakapanu kahowiti na kusilwa aku Shamiri.

3 Pa Tola, Yairi gwa Gileadi kawera mtoza gwa Waisraeli kwa mivinja ishilini na mbili. 4 Yairi kaweriti na wana wapalu selasini waweriti wakweniti punda selasini na waweriti na lushi selasini muisi ya Gileadi, yeni mpaka leru ishemuwa Hawoti Yairi. Hawoti Yairi mana yakuwi vijiji vya Yairi. 5 Yairi kahowiti na kufindirwa aku Kamoni.

6 Waisraeli watenditi kayi ukondola kulongolu kwa Mtuwa Mlungu wawatenderiti Mabaali na Maashitaroti na wamlungu wa Aramu ya Sidoni ya Mowabu na wamlungu wa wantu wa Amoni na wamlungu wa wantu wa Wafilisti. Wamleka Mtuwa Mlungu na pota kumguwira kayi.

7 Maya ga Mtuwa Mlungu gakalipa kwa Israeli na yomberi kawatenda Wafilisti na Waamoni wawakanki. 8 Kwa vinja semanini awa wawatabisiyiti na kuwayonera Waisraeli yawalikaliti aku Gileadi musemu ya Waamoni kwagulawa mshenji mwa lushemba Yoridani. 9 Waamoni na womberi walokiti lushemba Yoridani kulikomanga na makabila ga Yuda na Benjamini na Efraimu. Hangu Waisraeli watabikiti nentu.

10 Su wamlilira Mtuwa Mlungu, pawalonga, "Tutenda vidoda kwa gwenga, mana tukuleka gwenga Mlungu gwetu, Tuwatendera mabaali."

11 Na yomberi Mtuwa Mlungu kawagambira, "Hashi, neni nuwalopuziya ndiri kulawa kwa Wamisri na Waamoni na Waamori na Wafilisti. 12 Wasidoni na Waameleki na Wamidiyani wawayonera mwenga mundilira na neni nuwalopuziya kulawa kwa womberi? 13 Kumbiti mwenga mundeka, muwatendera wamlungu wamonga. Hangu hapeni mbuyiri kayi kuwalopola. 14 Mgendi mwakawaliliri wamlungu awa yamuwasyaguliti. Muyileki iwalopuziyi muntabika zyenu!"

15 Kumbiti Waisraeli wamgambira Mtuwa Mlungu, "Tutenda vidoda. Gututendi ntambu yagufira, kumbiti tukuluwa gutulopuziyi leru."

16 Shakapanu wasira kutali wamlungu wahenga, wamtendera kayi Mtuwa Mlungu. Mtuwa Mlungu kaweziti ndiri kuhepelera nentu kuwona ntabiku za Waisraeli.

17 Waamoni walijojonila kunyawa malingu gawu aku Gileadi. Waisraeli nawomberi wajojonika na kunyawa malingu mungonjeru zawu aku Mizipa. 18 Walongoziya wa wantu wa Gileadi walikosiyana, "Gaa hakanji kulikomanga na Waamoni? Yakafira kutenda hangu ndo hakaweri mkulu gwa wenikaya woseri wa Gileadi."