1 Lishaka limu Yeru Baali yani Gidiyoni na wantu woseri wayaweriti pamuhera na yomberi wimukiti putiputi, wanyawiti malingu gawu kululalanda pakwegera na mbwiru ya mashi ya Harodi, malingu ga Wamidiyani gaweriti kushana mwa lulalanda pakwegera na lugongu Mori.

2 Mtuwa Mlungu kamgambiriti Gidiyoni, "wantu waguwera nawa wavuwa nentu kwa neni kutenda guwakanki Wamidiyani. Waisraeli nawiza kulizyuma handa womberi wawakanka Wamidiyani kumbiti neni ndiri. 3 Vinu guwabweleri wantu woseri handa muntu yoseri yakawera na lyoga ama yakalendemera kasuluki kulugongu Gileadi kawuyi ukaya kwakuyi." Su, Gidiyoni kawajeriti na wantu ishilini na mbili elufu wawuya ukaya kasigala na wantu ishilini elufu.

4 Mtuwa Mlungu kamgambira Gideoni, "Wantu awa wankali wavuwa nentu. Vinu guwajegi kumbwiru za mashi, na neni hanuwasyaguli aku. Muntu yoseri yanfira kukugambira, ayu hakagendi na gwenga, kagendi na gwenga. Kumbiti Muntu yoseri yanfira kukugambira hapeni kagendi na gwenga, ayu nakagenda na gwenga."

5 Su, Gidiyoni kawajega wantu kumbwiru za mashi na Mtuwa Mlungu kamgambira, "Wantu yawalambita mashi kwa lulimi handa ng'ang'a, haguwatuli gweka na walii yanawasuntamali kulanda mashi kwa mawoku."

6 Wantu miya tatu walanditi mashi kwa mawoku gawu. Kumbiti wamonga woseri yawasigaliti wasuntamaliti kulanda mashi.

7 Mtuwa Mlungu kamgambira Gidiyoni, "kwa wantu awa miya tatu yawalanditi kwa kulambita handa wang'ang'a, haniwatendi wawakanki Wamidiyani. Kumbiti wamonga woseri walii wawuyi ukaya kwawu."

8 Su, Gidioni katola viboga na lipenga vya walii yawaweriti wankuwuka, kawagambira wagendi ukaya kwawu. Yomberi kasigala na Wantu walii miya tatu. Na liringu lya Wamidiyani liweriti kululalanda uwega wawu wa pasi.

9 Pashiru palii, Mtuwa Mlungu kamgambira Gidiyoni, "Gugendi gukawakomangi mumalingu mwawu, toziya nikutenda guwakanki. 10 Kumbiti handa gutira, gugendi pamuhera na ntumintumi gwaku Pura. 11 Aku hagupikiniri vyawatakula na gwenga hagupati likakala lya kuweza kugenda kuwakomanga." Su, Gidiyoni kagenda mumpeku mwa malingu ga wankondu pamuhera na ntumintumi gwakuyi Pura mpaka kushituu vya walolera zamu wa kambi ya Wamidiyani.

12 Wamidiyani na Waameleki na wantu woseri wa kwagulawa mshenji wagonjiti kululalanda, wavuwa handa wanjombi na ngamiya wawu yawawalangika ndiri, wavuwa handa mhanga gwa kumpwani.

13 Gidiyoni pakasokiti, kampikanira muntu yumu pakamtambira myaguwi kulota kwakuwi hangu, "Ndotiti niliwoniti libumunda lya shayiri palibiringika mpaka kuliringu lya Wamidiyani, lilikoma Liringu na kugalambula pasi kumpindi. Liringu liguwa pasi."

14 Myaguyi kamwankula, "Ayi imaanisha handa ayu yumonga ndiri ila ndo Gidiyoni mwana gwa Yoashi mweni Mlungu kampanana uwezu wa kutukanka Wamidiyani pamuhera na shonta letu loseri."

15 Katepu hera Gidiyoni pakapikiniriti ntambiru ayi ya kulota aku na ntakulira yakuyi, kasuntama makukama. Kawawuyira waisraeli mumalingu mwawu kawagambira "Mwimuki tugendeni, toziya Mtuwa Mlungu katupanana uwezu wa kulikanka shonta lya Wamidiyani."

16 Su, kawabagula Wantu walii miya tatu muvipinga vitatu, kawapanana lipenga na viwiga vyana mambamba. 17 Kawagambira, "Mndoli shanantendi pansegelera muukingu wa malingu na mwenga mtendi shiraa ashi. 18 Pang'omba lipenga, neni pamuhera na shipinga shangu, mwawoseri mgombi lipenga kulawa kila uwega lilingu na kubota kwa liziwu likulu, pamtakula toziya ya Mtuwa Mlungu na toziya ya Gidiyoni!"

19 Payiweriti pakwegera na ligonugonu, Gidiyoni na shipinga shakuyi sha Wantu miya yimu katepu hera pawasokiti muukingu wa liringu, mwanjiru gwa zamu ya pakati, pashiru walolera pawaweriti wagalambulaniti zamu. Wagomba lipenka na kumeganga viwiga vyawaweriti navi. 20 Vipinga vyoseri vitatu kwa pamuhera gagomba lipenka na kumeganga maguduliya gawu. Mumawoku gawu ga kumshigi wakoliti mambamba na kwa mawoku gawu ga kimliwu mapenka na kuzigomba, na pawatakula kwa liziwu likulu, "Ligumba toziya ya Mtuwa Mlungu na toziya ya Gidiyoni!"

21 Wagoloka kila yumu pahala pakuyi kulizyengeta liringu. Shonta loseri lya wankondu lipalangika agawu palishowangana na kutuga.

22 Wantu wa Gidiyoni wagombiti mapenka gawu miya tatu, Mtuwa Mlungu kawatenditi Wamidiyani wanji kulikoma weni kwa weni mumalingu. Yawasigaliti watoloka mpaka Beti Shita, kugendera Serera kumbaka ya Abeli Mehola pakwegera na Tabati.

23 Waisraeli wa likabila lya Nafutali na Asheri na Manasi, woseri wawashemiti, wawafatiti Wamidiyani. 24 Gidiyoni katuma walagilagi koseri kuisi ya migongu ya Efureimu wabweri, "Muwaseleleri Wamidiyani na kuwadiwira kwa kulopola nshemba na lushemba Yoridani mpaka Beti Bara." Su, wapalu woseri wa Efuremu wiza na kululopola lushemba Yoridani mpaka Beti Bara. 25 Watola lopola wakulu wawili wa Midiani, yani Orebu na Zeebu. Wamlaga Orebu mulitalawu lya Orebu, na yomberi Zeebu wamlagira mulikamiru lya Zeebu pawawera wankuwafata Wamidiyani. Wamjegera Godioni mituyi ya Orebu na Zeebu, kumwambu kulushemba Yoridani.