1 Ali ndo lyakanangaziyi Mtuwa Mlungu. Kaweriti kankutanda vipinga vya wanjombi pawabenitikala lifungu lya mfalumi na shaka shili vimeru paviweriti vyakwanja kutomola. 2 Niwawoniti wanjombi wankuliya na kumalira ntundu yoseri muisi. Shakapanu ndiliti na kulonga, "Gwee Mtuwa Mlungu nikuluwa gutuwoneri lusungu! Wiwuka wa Yakobo hawawezi hashi kulikala? Guloli womberi ndo wadidini nentu na wanyongi!"

3 Hangu Mtuwa Mlungu kagalambula nfiru yakuyi na kalonga, "Hapeni ntendi hangu!"

4 Ali ndo lyankananguziyiti kayi Mtuwa Mlungu. Nimwoniti Mtuwa Mlungu kankuwatoza wantu kwa motu. Motu agu gulunguziyiti matiwa makulu ga bahali na gulunguziyiti isi iyuma. 5 Shakapanu ntakula. "Gwee Mtuwa Mlungu nikuluwa guleki kukomanga! Wiwuka wa Yakobo hawawezi ashi kulikala? Womberi ndo wadidini nentu na wanyongi!" 6 Hangu Mtuwa Mlungu kagalambula nfiru yakuyi,

kalonga, "Ali viraa hapeni lilawiri."

7 Ali ndo lyakananguziyi kayi Mtuwa Mlungu. Nimwoniti Mtuwa Mlungu kagoloka pakwegera na shibambaza, mumawoku mwakuyi kabata shintu shizotopa su kashipimi shibambaza kawoni handa shinyosheka. 8 Mtuwa kankosiya, Amosi guwona shishi? Nimwakula,

"Niwuwona ubunta wa biriji." Shakapanu Mtuwa Mlungu kalonga,

Guloli! Ntula biriji iwapimi wantu toziya womberi ndo handa shibambaza shashipinditi.

Hangu hapeni hepeleri kayi makontola gawu. 9 "Pahala pampindi pavigongu kweni wiwuka wa Isaka watambikira, hapahalibisiwu na pahala pa kulikala Waisraeli hapaweri mahami. Hanilukomangi kwa nkondu lukolu lwa mfalumi Yeroboamu."

10 "Shakapanu Amazia yakaweriti mtambika gwa mji gwa Betheli kalagaliriti ulagilagi kwa mfalumi Yeroboamu gwa Israeli pakalonga, Amosi kankukuvuluvutira gwenga muisi ya Israeli. Wantu hapeniwakupikaniri kayi gwenga. 11 Toziya yomberi katakula, Yeroboamu hakahowi kwa nkondu na wantu wa Israeli hawajegwi muwuhamisiwu, kutali nakamu na isi yawu.

12 Shakapanu Amazia kamgambira Amosi, guwuki na umbuyi waku! Gugendi muisi ya Yuda gwakalaviyi umbuyi waku na wantu wa aku hawakupanani shiboga. 13 Nagulaviya kayi umbuyi panu Beteli toziya pahala panu ndo pahala pa kuguwira mfalumi, kayi ndo numba ya mfalumi."

14 "Amosi kamwakula Amaziya pakalonga, neni nambuyindiri gwashibena mgongu, kumbiti neni ndo mshungaji gwa kondolu na mlolera mikuyu. 15 Kumbiti Mtuwa Mlungu kambusiyiti mlihengu ali lya ushungaji kondolu na kandagalira nizi kuwagambira umbuyi wantu wakuyi wa Israeli. 16 Vinu Amaziya, gupikanili shisoweru sha Mtuwa Mlungu. Gwenga gung'ambira nandaviya umbuyi kwa wantu wa Israeli, pota kubwera kwa wiwuka wa Isaka. 17 Su Mtuwa Mlungu kalonga hangu, mdala gwaku hakaweri mhumba mumji na wana waku wapalu na wadala hawalaguwi munkondu. Isi yaku hayibagulwi na kupananwa wamonga na gwenga haguhoweli muisi ya uhamisiwu na wantu wa Israeli hawajegwi muwuhamisiwu, kutali nakamu na isi yawu."