1 Amshiwoni mwenga yamunemelera na kwikuta mu Sayuni na yamulikala poneka kumigongu Samariya! Mwenga yamuliwona handa walonguziya wamanika muisi yayimanika. 2 Mgendi mpaka mji gwa Kaline mwakaloli kila pahala na mlawi mgendi mpaka mji mkulu gwa Hamati, shakapanu msuluki mpaka mji gwa Gati kwa Wafilisti. Hashi falumi zyawu zyana makakala kuliku falumi zyenu na isi yawu ndo nkulu kuliku yenu? 3 Mwenga mlema kujimira handa lishaka lya ntabiku lyankwiza. Kumbiti kwa kutenda hangu mtenda lishaka ali liweri lya pakwegera. 4 Hamshiwoni mwenga yamgonja muvitanda vyavilembitwi na magoli ga ntembu na mlitalipisiya pampindi pa makochi, pamliya vinofu vya kondolu na ng'ombi wadidika. 5 Mwenga mfira kwimba vuluvulu na liziwu lya vinubi, na kutunga nyimbu ya syayi handa mfalumi Dawudi. 6 Mwankulanda divayi mumabakuli na kulipakaziya utuli uherepa nentu. Kumbiti mudayandiri kwa kulaguwa kwa wiwuka wa Yosefu. 7 Hangu hamuweri wa kwanja kujegerwa muuhamisiwu na misambu yenu ya kulinemiziya hayagamili.

8 Mtuwa Mlungu kalilapira mweni, "Mlungu Yakana Makakala kalilapira mweni pakalonga, nkalaziwa nentu na kulitumba kwa wiwuka wa Yakobo, kayi nkaliziwa na nyumba zyawu ziherepa. Mji gwawu na vyoseri vyaviweriti haniwapanani wankondu wawu."

9 Payiwera wantu lilongu hawasigali munumba yimu womberi hawahowi. 10 Pakizaku mlongu gwa yakahowiti kugalaviya mauti kunja su kagapambili,

na pakakosiya, "Hashi kwana muntu yoseri mungati amu yakalififa, nakwana muntu gwingi pamuhera na gwenga?" Na yomberi hakamwankuli,

"Kwahera!" Shakapanu mlongu uliya hakamgambili, "Gunyamaliri! Natulikanta litawu lya Mtuwa Mlungu."

11 Guloli Mtuwa Mlungu pakalagalira wankondu hawazibomoli numba nkulu na ndidini vipandivipandi vididini. 12 Hashi, farasi kaweza kutuga mumatalabuyi? Na wantu waweza kuyilima bahari kwa ligembi lya ng'ombi? Kumbiti mwenga muyigalambula lagiru kuwera usungu na yagawera maheri kuwera madoda.

13 Mwenga mwankulitumba kugulopola mji gwa Lo Debari. Na kulonga, "Tuyipata Karinayimu kwa makakala getu"

14 Mtuwa Mlungu yakana makakala goseri kalonga, "Mwenga wantu wa Israeli nakaka haniwalagaliri wantu wa isi yimonga iwakomangi na hayiwatabisiyi mwenga kwanjira Lebo Hamati yayiwera kushana, mpaka lushemba lya Araba uwega wa kusika."