1 Mpikanili ntambu yandaya kwajili ya mwenga wantu wa Israeli.

2 "Mwenga wantu wa Israeli mguwa na hapeni mgoloki kayi

mlekwa gweka muisi mwenu,

kwahera ata muntu gwa kukunyasula."

3 Mtuwa Mlungu kalonga hangu, "Mji gumu hagulagaliri wamashonta elufu yimu kugenda kulikomanga kumbiti hawawuyi wamashonta miyayimu hera na mji gumonga hagulagaliri wamashonta miya yimu kumbiti hawaponeki wamashonta kumi hera."

4 Mtuwa Mlungu kawagambira hangu wantu wa Israeli, "Munsakuli na mwenga hamwendeleyi kulikala! 5 Kumbiti namunsakula Beteli pota namgenda Giligali, pota namloka Beeri Sheba. Mana wenikaya wa Gilgali nakaka hawatorwi muuhamisiwu na Beteli hayiyagamiziwi!"

6 Mumsakuli Mtuwa Mlungu na mwenga hamwendeleyi kulikala! Hera hangu, hakawangamiziyi wiwuka wa Yosefu handa motu. Motu haguwalunguziyi wenikaya wa beteli na kwahera muntu yakaweza kuguzimiya. 7 Mliloliweri mwenga yamgalambula haki kuwera utama na kutenda mirandu yayifiruwa shintundiri.

8 Ayu yakatenditi vipinga vya ntondu zyazishemwa Kilimiya na Oriyoni,

yakagalambula

luwidu kuwera paliwala

na paliwala kuwera pashiru,

yomberi kagashema mashi ga bahari gaweri pamuhera

na kugayita kumpindi pa isi iyuma,

Mtuwa Mlungu ndo litawu lyakuyi.

9 Mweni ndo yakawalaga yawana makakala na kugahalibisiya maboma gawu.

10 Mwenga mwankuwakalalira yawakomangira haki na kumbeziya ulii yakatakula nakaka. 11 Mwenga mwankuwayonera wahushu na muwashonga wawapanani seemu nkulu ya shirii shawabenangiti. Tembera mwankulinyawira numba zya mabuwi ga kusongola, kumbiti mwenga hapeni mlikali amu, mwankulima malambu gaherepa ga mizabibu, kumbiti hapeni mlandi divayi yakuyi. 12 Mana neni nivimana uvuwa wa makontola genu na ukulu wa vidoda vyenu, mwenga muwatabisiya wantu waheri na mtola swinda na kulewelera wahushu nawapata haki kumahakama. 13 Mushaka handa ashi muntu yakana luhala hakanyamalijii, toziya shaka ashi ndo shidoda.

14 Msakuli kutenda yagawera maheri pota namtenda makontola, su Mtuwa Mlungu yakana makakala yamlonga kapamuhera na mwenga kaweri nakaka na mwenga ntambu yamtakula. 15 Mukalalili makontola na mtendi haki mumahakama. Pamonga Mtuwa Mlungu yakana makakala hakawawoneri lusungu wantu wa Yosefu yawasigaliti.

16 Shakapanu Mtuwa Mlungu, "Mlungu yakana makakala kalonga hangu, hapaweli na shiwembu kila pahala mumitaa, wantu hawadayi munjira zoseri na kulira kwa utama munjira nkulu. Yawalima hawashemwi wizi kulira na yawalipwa kwa kudaya hawashemwi su wizi kudaya. 17 Hapaweri na kudaya mumalambu goseri ga mizabibu, mana hampiti pakati penu kuwakomanga. Neni Mtuwa Mlungu ntakula."

18 Shondi mwenga yamuhepera kwa nfiru lishaka lya Mtuwa Mlungu! Ntambu gaa mlifira nentu lishaka ali? Lishaka ali haliweri lya luwindu na kwahera kulangala! 19 Hayiweri gambira muntu yakamtira simba shakapanu kaliwona na kanyama yakashemwa dubu! Ama handa muntu yakawuya ukaya kwakuyi na kulitula liwoku lyakuyi mushibambaza na kulumwa na njoka! 20 Lishaka lya Mtuwa Mlungu haliweri luwindu na hapeni kuweri na kulangala, haliweri dunyu pota kuwera kulangala koseri.

21 Mtuwa Mlungu kolonga hangu, nkalalira na kubeziya misambu yenu ya kunguwira, nikusekelerandiri kujojonika kwenu kwa kuguwira. 22 Pamndaviliraku tambiku zyenu zya kulunguziwa na zya ubumu, neni hapeni njimili kuzyanka na tambiku zyenu zya ponga zya wankanyama yawanenipiti neni hapeni niziloli nakamu. 23 Mumbusiliri umatu wa nyimbu zyenu! Nfirandiri kupikanira lwimbu lwa vingutinguti vyenu! 24 Kumbiti mtendi mirandu miheri yayifiruwa na mirandu ayi miheri nayipela ila iweri handa mashi yaganyililiki.

25 Mwenga numba ya Israeli, hashi munjegeliti ata mara yimu tambiku na malaviwu pamuweriti kushiwala vinja arubaini? 26 Shaka shirii mpapitindiri vinyagu vya mfalumi gwenu, Sakuti mlungu gwenu mkolamlima na Kayiwani mlungu gwenu ntondu, weni muwanyawiti maweni. Kumbiti vinu hamvipapi vinyagu avi. 27 Toziya ayi haniwajegeri muuhamisiwu, "Kutali kuliku Damesku, aga kalonga Mtuwa Mlungu, mweni litawu lyakuyi ndo Mlungu yakana makakala goseri."