1 "Mtuwa Mlungu kalonga hangu, wantu wa Moabu watenda kayi vidoda, nakaka haniwakomangi. Toziya wapambiti mihonju ya mfalumi gwa Edomu, mpaka iwera livu." 2 Su hanjegi motu muisi ya Moabu na kugalunguziya nakamu maboma ga mji gwa Keriyoti. Wamashonta pawatenda umatu wa liziwu lya lipenka, wantu wa Moabu hawahowi kwa umatu awu wa nkondu. 3 "Hanimlagi mkolamlima gwa Mowabu pamuhera na maafisa wakuyi woseri muisi ayi.

4 Mtuwa Mlungu kalonga hangu, wantu wa Yuda watenda kayi madoda, nakaka haniwakomangi, toziya walema lagiru zyangu pota kufata malagalira gangu. Wapotiziwa na wamlungu walawalii yawayitenderiti wambuyi wawu." 5 Hanjegi motu kuisi ya Yuda na kugalunguziya nakamu mboma ga Yerusalemu.

6 "Mtuwa Mlungu kalonga hangu, wantu wa Israeli watenda kayi madoda, nakaka haniwakomangi, toziya wawawuza wantu yawana haki kwa mpiya na kuwashuwuza wantu waneni wahushu kwa kuwabadili kwa malapa." 7 Wawawonera yawahera makakala na wahushu wawabagula nawapata haki zawu. Mwana na tati gwakuyi wagonja na yaya yumu, hangu mlipananandiri ligoya litawu lyangu linanagala. 8 Wagonjera pambwega mukila shitalawanda kwa nguwu zawatoliti kwa wahushu handa poni ya uwanda wawu na munumba ya mlungu gwawu walanda divayi yayihemilitwi kwa mpiya yazitozitwi kwa wawanda wawu.

9 Hangu mwenga wantu wa neni, toziya ya mwenga niwagamiziyiti nakamu Waamori yawaweriti watali handa mierezi, wanamakakala handa mitera ya mialoni. Nakaka niziagamiziyiti ntambi na mishigira. 10 Niwalaviya kulawa isi ya Misri, niwalongoziya kushiwala vinja arobayini na kuwapanana isi ya Waamoni. 11 "Niwasyaguliti wamu wa wana wa mwenga waweri wambuyi na wamu wa wantemba wenu walilaviyi kwajili ya lihengu lya Mlungu. Hashi mwenga waisraeli, gantakula aga ganakakandiri? Neni Mtuwa Mlungu ntakula." 12 Kumbiti muwatenditi Wantemba awa walandi divayi na kuwalagalira wambuyi nawalaviya umbuyi. 13 Vinu su haniwaposholangi gambira mbutuka ntambu yayiposholanga, shaka imemiziwa viboga. 14 Mtuga mgangamala hapeni kashapili, yawana makakala hawapeluwi makakala gawu na wanjagira hawasindi kugalopola makaliru gawu. 15 Njagira yakaguma msali hakatugi, wanjagira yawatuga hapeni wawezi kushapira na mkwena farasi hapeni kalopoli makaliru gakuyi. 16 "Lishaka ali ata mashonta wagangamala hawasi vikomangiru vyawu na kutuga. Ntakula neni Mtuwa Mlungu."