1 "Nimwoniti Mtuwa Mlungu kagoloka pambwega pa shitalawanda na yomberi kandagalira pakalonga, gukomi pampindi pa mpanda za numba ya Mlungu Mnanagala mpaka miyanjiru yakuyi itikinyiki. Guzimegi mpanda azi, su shitwiku shiwaguwiri wantu mumituyi mpaka wahowi. Walii yawasigala haniwalagi kwa nkondu, kwahera ata yumu gwawu hakaponeki, kwahera yanakatoloki." 2 Ata pawalibawira njira ya kugenda kwa wantu yawahowiti, kulawa aku haniwatoli kwa liwoku lyangu, pawakwena kumpindi, haniwasulusiyi pasi. 3 Handa pawalififa pawupeleru palugongu Karimeli, haniwasakuli aku na kuwatola, handa pawalififa kumashi matali ga bahari, aku hantagaliri njoka songu kawalumi. 4 Ata pawatolwa kwa makakala na wankondu wawu, aku haniwatendi walaguwi ku nkondu. Haniwatenderi madoda kumbiti maherindiri.

5 Mtuwa Mlungu yakana makakala, kashinkula pasipanu,

na peni palendemera

na wenikaya wakuyi wankudaya,

pasipanu poseri pankukwena na kusuluka

handa kumema na kusera kwa lushemba Naili lwa Misri.

6 Mtuwa Mlungu kanyawa numba yakuyi ya shifalumi kumpindi,

na kutula miyanjiru yakuyi pasipanu, yomberi kagashema mashi ga bahari,

na kugayita pampindi paisi.

Mtuwa Mlungu ndo litawu lyakuyi!

7 Mtuwa Mlungu kalonga hangu, "Kwaneni mwenga wantu wa Israeli niwaholera ntambu yaniwaholeriti wantu wa mji gwa Kushi! Ntambu yaniwalaviyiti Waisraeli kulawa mji gwa Misri. 8 Nakaka masu ga Mtuwa Mlungu galola ufalumi yawana vidoda. Naneni haniwuwagamiziyi kulawa sheni sha pasipanu. Hangu hapeni niwuwagamiziyi wiwuka wa Yakobo."

9 Mana handagaliri na kuwapeta wantu wa Israeli yawawera muisi zimonga, handa muntu yakapeta viboga, su kuwusiya ushafu na kutenda ata mbeyu yimu nayituluka. 10 "Yawana vidoda muwamu mwa wantu waneni, hawahoweri munkondu, awa ndo yawatakula, matenduwa hapeni gatwiziri pota kutupata."

11 Lishaka lyakwiza haniwutendi uweri na makakala kayi ufalumi wa Dawudi, gambira numba yayinyawitwi. Hanimtendi kayi ntambu yakaweriti makashu. 12 "Su wantu wa Israeli hawawakolimlima wantu yawasigaliti wa Edomu na isi zimonga zoseri yaziweriti zyangu. Neni Mtuwa Mlungu ntakula na hantendi hangu.

13 Mtuwa Mlungu kalonga shaka shankwiza,

pamberi pa kubenanga na mabenangu hagaweri kala kubenangwa

katepu pahala pa kuyala zabibu hashifati shaka sha kubenanga zabibu.

Migongu hayibwituli divayi yasyayi,

na vigongu havinyililiki divayi."

14 Hanyawi kayi ntambu ya wantu waneni Waisraeli.

Hawanyawi miji yawu yayihalibisiwitwi na kulikala amu,

Hawayali mizabibu na kulanda divayi yakuyi

hawalimi bostani na kuliya mabwajubwaju gakuyi.

15 "Haniwatendi wantu waneni Israeli walikali muisi yawu weni,

hapeni wawusiwi kayi kulawa muisi yaniwapananiti.

Ntakula neni Mtuwa Mlungu."